ខេត្តស្វាយរៀង ៖ មានកម្មករ-កម្មការនីជាង៥០០នាក់នៅរោងចក្រតម្លើងនាឡិកាដៃនីសសី ក្នុងតំបន់សេដ្ឋកិច្ចពិសេសនាគរាជ បាននាំគ្នាដង្ហែក្បួនតាមរថយន្ត និងម៉ូតូមកកាន់មុខសាលាខេត្តស្វាយរៀង ដើម្បីសុំឲ្យលោកអភិបាលខេត្តជួយអន្តរាគមន៍ ដោះស្រាយទាមទារលក្ខខណ្ឌ១៦ចំណុច ដែលបានចោទថា ថៅកែររោងចក្ររំលោភលើលក្ខខណ្ឌច្បាប់ការងារនៃព្រះរាជាណាចក្រកម្ពុជា និងរំលោភលើសិទ្ធិកម្មករ ។ ករណីកម្មករ-កម្មការនីរោងចក្រធ្វើកូដកម្មនេះកើតឡើងកាលពីរវេលាម៉ោង១០ និង៣០នាទីព្រឹក ដល់ម៉ោង១១ និង១០នាទីព្រឹក ថ្ងៃទី២៤ ខែមេសា ឆ្នាំ២០១៥ នៅខាងមុខសាលាខេត្ត ស្ថិតនៅភូមិមេភ្លើង សង្កាត់ស្វាយរៀង ក្រុងស្វាយរៀង ។
នៅវេលាម៉ោង១១ព្រឹក លោកហ៊ូរ វឌ្ឍនៈ អភិបាលរងខេត្ត និងជាតំណាងលោកអភិបាលខេត្ត បានមកជួបតំណាងសម្ពន្ធ័សហជីពចលនាកម្មករ និងតំណាងកម្មករ ដោយទទួលយកសំណើររបស់កម្មករ-កម្មការនី និងបានណាត់តំណាងរោងចក្រជួបដោះស្រាយនៅសាលាក្រុងបាវិតនាម៉ោង២ និង៣០នាទីរសៀល ។
បើតាមលោកកឹម ចំរើន តំណាងសម្ពន្ធ័សហជីពចលនាកម្មករបានឲ្យដឹងថា លក្ខខណ្ឌ១៦ចំណុចដែលកម្មករ-កម្មការនីទាមទារនោះរួមមាន ១-ក្រុមហ៊ុនត្រូវផ្តល់ប្រាក់ឈ្នួលដល់កម្មករធ្វើការវេនយប់ត្រូវគុណនឹងពីររយភាគរយ ផ្អែកលើគោលការស្មគ្រ័ចិត្ត ។ ២-នៅពេលកម្មករ-កម្មការនីឈឺ មានច្បាប់ពេទ្យ ក្រុមហ៊ុនត្រូវរក្សាប្រាក់ឈ្នួល និងអត្ថប្រយោជន៍ផ្សេងៗឲ្យនៅដដែល ។ ៣-មិនត្រូវបង្ខំឲ្យកម្មករ-កម្មការនីហូបបាយរបស់ក្រុមហ៊ុនទេ គឺផ្អែកលើការស្មគ្រ័ចិត្ត ។ ៤-ត្រូវរៀបចំថ្នាំពេទ្យឲ្យបានគ្រប់គ្រាន់ និងមានគ្រូពេទ្យប្រចាំការរាល់ម៉ោងធ្វើការ ។ ៥-ត្រូវឲ្យកម្មករ-កម្មការនីសម្រាកហូបបាយថ្ងៃត្រង់នៅម៉ោង១១ និង២៥នាទី និងចេញពីធ្វើការនៅម៉ោង៤ និង២០នាទីល្ងាច ។ ៦-ត្រូវផ្តល់សិទ្ធិសម្រាប់អ្នកមានផ្ទៃពោះចូលបន្ទប់ទឹកដោយមិនបាច់ប្រើកាត ។ ៧-ត្រូវផ្តល់ប្រាក់ឈ្នួល៥០%សម្រាប់កម្មការនីដាក់ច្បាប់ទៅសម្រាលកូនរយៈពេល៣ខែ ។ ៨-ត្រូវផ្តល់ប្រាក់ទឹកដោះគោចំនួន១០ដុល្លាររយៈពេល១៨ខែដល់បុត្រកម្មការនី ។ ៩-ត្រូវឲ្យសិស្ស-និស្សិតទៅរៀនថ្ងៃសៅរ៍ សូមក្រុមហ៊ុនកុំកាត់ប្រាក់ប្រចាំថ្ងៃ និងអត្ថប្រយោជន៍ផ្សេងៗ ។ ១០-សុំប្រាក់ជំនាញកម្មករ-កម្មការនីដែលមានស្នាដៃ និងប្រាក់ប្រធានក្រុម៣០ដុល្លា ។ ១១-ពេលឡាន និងម៉ូតូមកយឺតម្តងម្កាល សូមក្រុមហ៊ុនរក្សាអត្ថប្រយោជន៍ផ្សេងៗឲ្យកម្មករ ។ ១២-ស្នើសុំស៊ិទ្ធិនិយាយទូរសព្ទ័ ។ ១៣-មិនត្រូវបង្ខំឲ្យកម្មករ-កម្មការនីធ្វើការថែមម៉ោងនៅថ្ងៃសៅរ៍ទេ ។ ១៤-ពេលកម្មករ-កម្មការនីភ្លេចមួកសូមក្រុមហ៊ុនយោគយល់ ។ ១៥-ក្រុមហ៊ុនមិនត្រូវបញ្ឈប់កម្មករ-កម្មការនីដោយគ្មានមូលហេតុ ។ ១៦-ក្នុងអំឡុងពេលធ្វើកូដកម្ម សូមឲ្យក្រុមហ៊ុនរក្សាប្រាក់ឈ្នួល និងអត្ថប្រយោជន៍ផ្សេងៗនៅដដែល ហើយក្រមហ៊ុនមិនត្រូវគុំគួន ឬក៏បញ្ឈប់កម្មករ-កម្មការនីម្នាក់ណាឡើយ ។
ក្រោយពីលោកហ៊ូរ វឌ្ឍនៈ ចេញមកទួលសំណើ និងអញ្ជើញតំណាងកម្មករ-កម្មការនីចូលពិភាក្សារកន្លះម៉ោងក្រោយមក កកម្មរ-កម្មការនីយល់ព្រម និងនាំគ្នាឡើងជិះរថយន្ត និងម៉ូតូត្រឡប់ទៅវិញ និងត្រៀមចូលដោះស្រាយនៅម៉ោង២ និង៣០នាទីរសៀលនៅសាលាក្រុងបាវិត ។
លទ្ធផល់យ៉ាងណាសូមរង់ចាំតាមដាននៅពេលក្រោយទៀត ៕
ចែករំលែកព័តមាននេះ