ឃីម បូរ៉ា ប៉ះមាស ច័ន្ទមាន លើកទី2នៅSEA TV ថ្ងៃនេះ
រាជធានីភ្នំពេញ ៖ ក្នុងចំណោមការប្រកួតរបស់កីឡាករ៦នាក់នៅក្នុងព្រឹត្តិការណ៍ដណ្ដើមខ្សែក្រវាត់ជើងឯកK.Cement ប្រភេទទម្ងន់៦០គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍(SEA TV )
រាជធានីភ្នំពេញ ៖ ក្នុងចំណោមការប្រកួតរបស់កីឡាករ៦នាក់នៅក្នុងព្រឹត្តិការណ៍ដណ្ដើមខ្សែក្រវាត់ជើងឯកK.Cement ប្រភេទទម្ងន់៦០គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍(SEA TV ) មានតែកីឡាករ៣រូបប៉ុណ្ណោះ ដែលកន្ត្រាក់បានការចាប់អារម្មណ៍ខ្លាំងក្លាជាងគេ ។ ក្នុងចំណោមអ្នកទាំង៣នោះជំនួបរវាង ឃីម បូរ៉ា និងមាស ច័ន្ទមាន កាន់តែទាក់ទាញអារម្មណ៍ឲ្យមានការតាមដានជាងគេ នៅល្ងាចថ្ងៃសៅរ៍ ទី២៥ មេសា នេះ ដោយសារតែពួកគេប៉ះគ្នាសងសឹកផង និងស្ទាបស្ទង់កម្លាំងដើម្បីប៉ែងជើងគ្នាផង ។
យ៉ាងហោចជាងពាក់កណ្ដាលនៃអ្នកតាមដានការប្រកួតនេះចំណាយការពិភាក្សាវែកញែកជាមុន ចំពោះការប៉ះគ្នារបស់អ្នកទាំងពីរក្នុងពេលដែលអ្នកណាក៏មើលឃើញថា ឃីម បូរ៉ា គឺជាមនុស្សតែម្នាក់ដែលខ្ទាស់មិនឲ្យមាស ច័ន្ទមាន ឡើងដណ្ដើមខ្សែក្រវាត់ ហើយមាស ច័ន្ទមាន ក៏ជាមនុស្សតែម្នាក់ដែលអាចបង្អាក់មិនឲ្យឃីម បូរ៉ា ឡើងទៅដល់វគ្គចុងក្រោយដូចគ្នា ។ បន្ថែមពីលើភាពខ្លាំងក្លាអ្នកទាំងពីរត្រូវពឹងលើសំណាងចៀសមិនផុត ក្នុងការប៉ែងជើងគ្នាឆ្ពោះទៅកាន់ការដណ្ដើមយកកៅអីទៅជួបសូត្រ ប៊ុនធី ដែលមានសង្ឃឹមខ្ពស់រួចជាស្រេច សម្រាប់វគ្គថ្មីនេះទៀត។ បើទោះជាការប្រកួតក្នុងវគ្គ២ ស្ថិតនៅត្រឹមជាជំហានចាប់ផ្ដើម ប៉ុន្តែគេដឹងរួចទៅហើយថាសូត្រ ប៊ុនធី នឹងធ្វើបានល្អមិនខុសពីវគ្គ១នោះទេ បន្ទាប់ពីអាចផ្ដួលមាស ច័ន្ទមាន ដែលជាកីឡាករតែម្នាក់ដែលគេចាញ់ក្នុងវគ្គមុន កាលពី២សប្ដាហ៍មុនបែបនេះ ។
អញ្ចឹងហើយទើបក្នុងចំណោមកីឡាករ៥រូបដែលគេត្រូវប៉ះបន្ត មានតែឃីម បូរ៉ា ម្នាក់ប៉ុណ្ណោះ ដែលសូត្រ ប៊ុនធី នឹងបន្តការបុកពោះសម្រាប់វគ្គនេះ ។
អ្នកវិភាគកាន់តែច្រើនបង្ហាញការលើកឡើងថា ការប៉ះគ្នារវាងឃីម បូរ៉ា និងមាស ច័ន្ទមាន នៅថ្ងៃសៅរ៍នេះ គឺជាជំនួបដ៏សំខាន់ ដោយសារតែឃីម បូរ៉ា ក៏ត្រូវការឈ្នះ ហើយមាស ច័ន្ទមាន ក៏ត្រូវការឈ្នះជាលើកទី២ ដើម្បីរក្សាមុខមាត់ ។ ប្រសិនបើឃីម បូរ៉ា ចាញ់ជាលើកទី២ មានន័យថា ទោះជាគេប៉ះគ្នាជាលើកទី៣ ក៏ការដណ្ដើមយកខ្សែក្រវាត់នៅវគ្គចុងក្រោយក៏មិនមែនជារបស់ឃីម បូរ៉ា នោះដែរ ប៉ុន្តែបើគេអាចឈ្នះសម្រាប់ការប្រកួតថ្ងៃនេះមានន័យថា ស្ថានភាពឈ្នះចាញ់នឹងស្ថិតនៅលើភាពអំណោយផលរបស់កីឡាករម្ខាងៗនៅពេលប៉ះគ្នាជាថ្មី ។ ចំពោះមាស ច័ន្ទមានវិញ គេត្រូវការឈ្នះខ្លាំងណាស់ដ្បិតបើឈ្នះលើកនេះនឹងត្រូវបានគេសរសើរថាខ្លាំង ប៉ុន្តែបើចាញ់ក្រៅពីអាម៉ាស់ក៏ពិតជាត្រូវសិស្សប្អូនយកកៅអីទៅវគ្គបន្តអង្គុយបាត់ ។
ថ្វីដ្បិតតែការប្រកួតវគ្គនេះនឹងជម្រុះតែ២នាក់ចោល ដែលមានន័យទោះឃីម បូរ៉ា ចាញ់មាស ច័ន្ទមាន ឬមាស ច័ន្ទមាន ចាញ់ក៏ត្រូវតែឡើងដោយស្វ័យប្រវត្តិទៅកាន់វគ្គ៣ ដោយសារពួកគេទាំងពីរសុទ្ធតែខ្លាំងជាងគូប្រកួតផ្សេងក្នុងចំណោម៥ប្រកួត(លើកលែងសូត្រ ប៊ុនធីចេញ) ក៏កម្រិតនៃការឈ្នះចាញ់នឹងក្លាយជាការព្យាករមួយដ៏សំខាន់នៅពេលអ្នកទាំងពីរប៉ះគ្នាក្នុងវគ្គ៣។ ឃីម បូរ៉ា ដែលជាជើងខ្លាំងម្នាក់ទំនងមិនអាចទទួលរងនូវសម្ពាធរិះគន់ជាថ្មីទៀតទេ ប្រសិនបើគេបណ្ដោយឲ្យចាញ់សម្រាប់ការសងសឹកលើកនេះ ប៉ុន្តែមាស ច័ន្ទមាន ដែលឈរចំណាត់ថ្នាក់លេខ១ក្នុងវគ្គ១ ក៏មិនអាចបណ្ដោយឲ្យចាញ់ដូចគ្នាផងដែរ សម្រាប់ការប្រកួតថ្ងៃនេះ ។
ក្រោយការចាញ់កីឡាករសូត្រ ប៊ុនធី កាលពី២សប្ដាហ៍មុន មាស ច័ន្ទមាន ប្រឈមធ្លាក់ទៅចំណាត់ថ្នាក់លេខ២រួចទៅហើយ ប្រសិនបើបន្តឈ្នះគូប្រកួតផ្សេងទៀត ដូចជុំទី១ ។ ប៉ុន្តែបើភ្លាត់ឲ្យចាញ់ ឃីម បូរ៉ា មានន័យថា ចំណាត់ថ្នាក់លេខ២ដែលត្រូវរំពឹងទុកក៏មិនបាននោះដែរ គឺពិតជារអិលធ្លាក់ទៅឈរចំណាត់ថ្នាក់លេខ៣ ទាំងបាក់មុខតែម្ដង ក្នុងពេលដែលក្នុងចំណោមកីឡាករទាំង៦ គេគឺជាជើងខ្លាំងជំនាន់មុនគេដែលត្រូវគេចាំតែមើល និងរិះគន់ពេលប្រឡូកជាមួយក្មេងជំនាន់ក្រោយស្រេចទៅហើយ ។
អ្នកវិភាគសុទ្ធតែមើលឃើញថា ទោះជាមានលទ្ធផលដូចម្ដេចក៏ ឃីម បូរ៉ា និងមាស ច័ន្ទមាន ពិតជាប្ដូរសាច់ស្រស់ឈាមស្រស់ទម្រាំរកចាញ់ឈ្នះឃើញនៅថ្ងៃសៅរ៍នេះ ។ ទាំងនេះគឺជាចលករកាន់តែមានទម្ងន់ជួយឲ្យការប៉ះគ្នារបស់អ្នកទាំងពីរទទួលបានការចាប់អារម្មណ៍លើសលប់សម្រាប់ការប្រកួតសន្សំពិន្ទុ ។
យោងតាមកំណត់ត្រា ឃីម បូរ៉ា គឺជាជើងខ្លាំងវ័យក្មេងមកពីក្លិបរស្មីភូមិគាបខេត្តបន្ទាយមានជ័យ ដែលឈានមកដល់ជើងឯករងក្នុងការប្រកួតដណ្ដើមខ្សែក្រវាត់របស់ស្រាបៀរកម្ពុជាកាលពីខែវិច្ឆិកា ក្នុងឆ្នាំ២០១៤ ។ គេប្រកួតបាន៤៨ដង ឈ្នះ៣៦ដង ចាញ់១២ដង និងផ្ដួលដៃគូឲ្យសន្លប់បាន៨ដង ។ ដោយឡែកសម្រាប់កំណត់ត្រារបស់ មាស ច័ន្ទមាន វិញ គេប្រកួតបាន៩៥ដង ឈ្នះ៧២ដង និងចាញ់២៣ដង ។ កីឡាកររូបនេះ គឺជាជើងខ្លាំងមកពីសមាគមកីឡាប្រដាល់ក្រសួងការពារជាតិ ដែលកាលពីប៉ុន្មានឆ្នាំមុន គ្មានអ្នកណាមិនស្គាល់ និងមិនល្បីឈ្មោះគេនោះទេ តាមរយៈការប្រើឈ្មោះថា សារឹម ង៉ា ។
នៅថ្ងៃនោះដែរ កីឡាករ សូត្រ ប៊ុនធី មកពីក្លិបបក្សីស្លាបដែក ប៉ះឱម សំរេច មកពីក្លិបកងពលតូចទ័ពឆត្រយោង៩១១ ដោយការប្រកួតគូនេះ គេមើលឃើញរួចទៅហើយថា ជ័យជម្នះគឺជារបស់សូត្រ ប៊ុនធី ដែលកំពុងខ្លាំងក្លាដូចគោឡើង-ក ។ ប៊ុនធី ធ្លាប់ប្រកួតបាន៤៦ដង ឈ្នះ២៨ដង ចាញ់១៦ដង ស្មើ២ដង និងធ្លាប់ផ្ដួលដៃគូឲ្យសន្លប់បាន១៨ដង ។ ឱម សំរេចវិញ ធ្លាប់ប្រកួតបាន៣៥ដង ឈ្នះ២៧ដង ចាញ់៨ដង មិនដែលស្មើ និងធ្លាប់វាយគូប្រកួតឲ្យសន្លប់បាន៦ដង ។
មួយគូចុងក្រោយជាការប៉ះគ្នារវាងកីឡាករដែលមានពិន្ទុធុនកណ្ដាលកាលពីវគ្គ១ លាស់ យីន មកពីក្លិបសម្រែករាជសីហ៍បង្ក្រាបគ្រឿងញៀន និង ថុល មករា មកពីក្លិបឃ្លាំងមឿងកីឡា ។ លាស់ យីន ធ្លាប់ប្រកួតបាន ៦០ដង ឈ្នះ៤៥ដង ឯថុល មករា ធ្លាប់ប្រកួតបាន ៥២ដង ឈ្នះ៣៥ដង ៕
ចែករំលែកព័តមាននេះ