យោងតាមអង្គការសិទ្ធិមនុស្សស៊ីរី OSDH ដែលមានប្រភពព័ត៌មានច្រើនក្នុងប្រទេសថា មនុស្ស២.០៧៩នាក់ភាគច្រើនជាពួកជីហាដនៃក្រុមរដ្ឋអ៊ិស្លាមបានត្រូវស្លា.ប់នៅស៊ីរី ដោយសារការ
យោងតាមអង្គការសិទ្ធិមនុស្សស៊ីរី OSDH ដែលមានប្រភពព័ត៌មានច្រើនក្នុងប្រទេសថា មនុស្ស២.០៧៩នាក់ភាគច្រើនជាពួកជីហាដនៃក្រុមរដ្ឋអ៊ិស្លាមបានត្រូវស្លាប់នៅស៊ីរី ដោយសារការវាយប្រហារតាមអាកាសរបស់ក្រុមចម្រុះអន្តរជាតិ នាំមុខដោយសហរដ្ឋអាមេរិកចាប់តាំងពី៧ខែកន្លងមកនេះ ។
តុល្យការនេះរបស់ OSDH បញ្ជាក់ថា យុទ្ធជនក្រុមរដ្ឋអ៊ិស្លាម១.៩២២នាក់ភាគច្រើនជាជនបរទេសបានត្រូវស្លាប់ចាប់តាំងពីថ្ងៃទី២៣ កញ្ញា ឆ្នាំ២០១៤មក ក្នុងការវាយឆ្មក់ និងការវាយប្រហារតាមអាកាសរបស់ក្រុមចម្រុះអន្តរជាតិលើបណ្តាទីតាំងរបស់ក្រុមរដ្ឋអ៊ិស្លាម ព្រមទាំងលើបណ្តាទីតាំងប្រេងកាតនៅប្រទេសស៊ីរី។ ការវាយប្រហារទាំងនេះសំដៅជាពិសេសលើទីតាំងរបស់ក្រុមរដ្ឋអ៊ិស្លាមនៅខេត្តហូមហាម៉ា អាឡែប រ៉ាកា ហាស់សាកេ និងឌៀរអេស័រ ។
ម្យ៉ាងវិញទៀត យុទ្ធជនរបស់ក្រុមរណសិរ្សអាល់ណូស្ត្រា ជាសាខាអាល់កៃដានៅស៊ីរី៩០នាក់ក៏ត្រូវស្លាប់ក្នុងការវាយប្រហារនានាលើបណ្តាទីតាំងរបស់គេ ជាពិសេសនៅភាគខាងជើងប្រទេស ។
តុល្យការក៏រួមមានជនស៊ីវិលស៊ីរីស្លាប់៦៦នាក់ ក្នុងនោះមានកុមារ១០នាក់ផងដែរ ។ ការវាយប្រហារតាមអាកាសរបស់ក្រុមចម្រុះអន្តរជាតិបានជួយជាពិសេសដល់កងកម្លាំងឃើតស៊ីរីវាយបណ្តេញពួករដ្ឋអ៊ិស្លាមកាលពីដំណាច់ខែមករា ចេញពីទីក្រុងកូបានេ ស្ថិតនៅជាប់ព្រំដែនតួកគី ។
ជម្លោះនៅស៊ីរីកាន់តែមានភាពស្មុគស្មាញខ្លាំងឡើងក្នុងឆ្នាំ២០១៤ ជាមួយនឹងការពង្រឹងកម្លាំងរបស់ពួកជីហាដ ពិសេសកម្លាំងរបស់ក្រុមរដ្ឋអ៊ិស្លាមដែលត្រួតត្រាតំបន់នានានៅភាគខាងជើង និងភាគខាងកើតប្រទេស ហើយវាយប្រហារលើកងកម្លាំងផ្សេងៗក្នុងប្រទេស ។
រយៈពេល៤ឆ្នាំកន្លងមកនេះ សង្គ្រាមនៅស៊ីរីបណ្តាលឱ្យមនុស្សស្លាប់ជាង២២០.០០០នាក់ ហើយបង្ខំឱ្យមនុស្សដល់ទៅ១១,២លាននាក់រត់ភៀសខ្លួនចេញពីភូមិឋាន ៕
ចែករំលែកព័តមាននេះ