ពួកឧទ្ទាមហ៊ូធីយេម៉ែនបានទាមទារឱ្យបញ្ឈប់ទាំងស្រុងនូវការវាយប្រហារតាមអាកាសរបស់ក្រុមចម្រុះនាំមុខដោយអារ៉ាប៊ី សាអ៊ូឌីត មុនពេលមានការចរចាឡើងវិញជាយថាហេតុក្រោមការឧបត្ថម្ភរបស់ អ.ស.ប បន្ទាប់ពីការប្រកាសរបស់ក្រុងវីយ៉ាដបញ្ចប់ការវាយប្រហារ តែនៅបន្តនាថ្ងៃទី២២ មេសា ។
កាលពីយប់ថ្ងៃទី២១ មេសា អារ៉ាប៊ី សាអ៊ូឌីត ប្រកាសបញ្ចប់យុទ្ធនាការវាយប្រហារតាមអាកាសដែលធ្វើចាប់តាំងពីថ្ងៃទី២៦ មីនាមក ដើម្បីបញ្ឈប់ការវាយរុលទៅមុខរបស់ពួកឧទ្ទាមហ៊ូធី គាំទ្រដោយអុីរ៉ង់ហើយប្រកាសបើកដំណាក់កាលនយោបាយ និងមនុស្សធម៌ថ្មី ។
ទោះជាមានការប្រកាសបែបនេះក្តី ក៏ក្រុមចម្រុះនៅរក្សាសិទ្ធិធ្វើការវាយប្រហារថ្មីៗ ប្រសិនបើបណ្តាចលនារបស់ពួកឧទ្ទាមពិនិត្យទៅមានភាពគំរាមកំហែង ។ នាថ្ងៃទី២២ មេសា ក្រុមចម្រុះបានធ្វើការវាយប្រហារតាមអាកាសលើទីតាំងជាច្រើនរបស់ពួកហ៊ូធី នៅជិតទីក្រុង TAEZ ព្រោះពួកឧទ្ទាមវាយយកមូលដ្ឋានយោធាមួយនៅទីនោះ ព្រមទាំងលើក្រុងវ៉ាហាត ។
បុ៉ន្មានម៉ោងមុននេះ ពួកហ៊ូធីបានស្នើបញ្ឈប់ទាំងស្រុងនូវការវាយប្រហារតាមអាកាសលុបចោលការហ៊ុមព័ទ្ធ និងឱ្យមានការចរចាក្រោមការឧបត្ថម្ភរបស់ អ.ស.ប ។
លោកម៉ូហាម៉េដអាប់ដែលសាឡាម អ្នកនាំពាក្យរបស់ពួកហ៊ូធីក្នុងសេចក្តីប្រកាសមួយថ្លែងថា បន្ទាប់ពីការបញ្ឈប់ទាំងស្រុងនូវការឈ្លានពានប្រឆាំងយេម៉ែន ហើយលុបចោលការហ៊ុមព័ទ្ធខាងអាកាស និងសមុទ្រ យើងទាមទារឱ្យមានការចរចានយោបាយឡើងវិញក្រោមការឧបត្ថម្ភរបស់ អ.ស.ប ។ អ្នកនាំពាក្យរូបនេះក៏ស្វាគមន៍ផងដែរចំពោះការខិតខំប្រឹងប្រែងជាវិជ្ជមានរបស់ អ.ស.ប និងការគាំទ្ររបស់ អ.ស.ប ចំពោះការចរចាជាតិ ។
ជាសញ្ញានៃសុឆន្ទៈពួកឧទ្ទាមហ៊ូធីបានដោះលែងឥស្សរជន៣នាក់ដែលត្រូវចាប់ខ្លួនកាលពីថ្ងៃទី២៥ មីនា នៅភាគខាងត្បូងប្រទេស ក្នុងនោះមានរដ្ឋមន្ត្រីការពារប្រទេសលោកម៉ាហ៍មូដ អែលស៊ូបីហុី និងឧត្តមសេនីយ៍ ណាស័រ ម៉ាន់សួរហាឌី ប្អូនប្រុសរបស់លោកប្រធានាធិបតី អាបដ៍រ៉ាបបូម៉ាន់សួរហាឌី ដែលភៀសខ្លួនទៅកាន់អារ៉ាប៊ី សាអ៊ូឌីត ៕
ចែករំលែកព័តមាននេះ