បណ្តាមេដឹកនាំអឺរ៉ុបត្រូវប្រកាសនាថ្ងៃទី២៣ មេសា ពីប្រតិបត្តិការយោធាមួយប្រឆាំងពួកអ្នករត់ពន្ធជនអន្តោប្រវេសន៍នៅប្រទេសលីប៊ី ដោយសារពួកទាំងនេះជាអ្នកទទួលខុសត្រូវ
បណ្តាមេដឹកនាំអឺរ៉ុបត្រូវប្រកាសនាថ្ងៃទី២៣ មេសា ពីប្រតិបត្តិការយោធាមួយប្រឆាំងពួកអ្នករត់ពន្ធជនអន្តោប្រវេសន៍នៅប្រទេសលីប៊ី ដោយសារពួកទាំងនេះជាអ្នកទទួលខុសត្រូវដល់សោកនាដកម្មដ៏អាក្រក់បំផុតក្នុងសមុទ្រមេឌីទែរ៉ាណេ ដែលពួកអ្នកនៅរស់រានមានជីវិតចាប់ផ្តើមជួបប្រទះក្តីរន្ធត់ ។
យោងតាមគម្រោងសេចក្តីថ្លែងការណ៍នៃកិច្ចប្រជុំកំពូលវិសាមញ្ញរបស់សហភាពអឺរ៉ុប ដែលកោះធ្វើបន្ទាប់ពីការលិចនាវាពួកអន្តោប្រវេសន៍កាលពីថ្ងៃទី១៨ មេសា ក្នុងដែនទឹកលីប៊ី បណ្តាលឱ្យមនុស្សស្លាប់ប្រមាណជា៨០០នាក់ ថា គេត្រូវធ្វើការខិតខំប្រឹងប្រែងជាប់ជានិច្ចដើម្បីកំណត់អត្តសញ្ញាណ ចាប់ខ្លួននិងកម្ទេចបណ្តានាវាមុនពេលនាវាទាំងនោះត្រូវប្រើប្រាស់ដោយពួកអ្នករត់ពន្ធមនុស្ស ។ អឺរ៉ុបត្រូវផ្តល់ចម្លើយខ្លាំងមួយលើសពីការពង្រឹងមធ្យោបាយត្រួតពិនិត្យតាមសមុទ្រ ឬការរួមសាមគ្គីគ្នាក្នុងការទទួលពួកជនភៀសខ្លួន ។
គម្រោងសេចក្តីថ្លែងការណ៍នេះបន្តថា បណ្តាប្រមុខរដ្ឋ និងប្រមុខរដ្ឋាភិបាលសហភាពអឺរ៉ុប ត្រូវធ្វើការរៀបចំនានា សម្រាប់ប្រតិបត្តិការរក្សាសន្តិសុខ និងការពារមួយ មានន័យថា ប្រតិបត្តិការយោធាមួយដែលនោះនឹងជាលើកដំបូងក្នុងការតស៊ូប្រឆាំងការធ្វើអន្តោប្រវេសន៍លួចលាក់ ។
ចំពោះប្រទេសអុីតាលីវិញ ក្នុងចំណោមសំណើរបស់ខ្លួន ដើម្បីបញ្ឈប់ការសម្រុកចូល ពួកជនអន្តោប្រវេសន៍មកពីលីប៊ី មានសំណើគួរឱ្យភ្ញាក់ផ្អើលមួយ គឺចង់ឱ្យមានការកម្ទេចដោយប្រើយន្តហោះគ្មានមនុស្សបើកប្រដាប់អាវុធ បណ្តានាវាដែលប្រើសម្រាប់ដឹកពួកអន្តោប្រវេសន៍លួចលាក់ក្នុងឆ្នេរសមុទ្រលីប៊ី ។
សំណើនេះជាផ្នែកមួយនៃផែនការ៥ចំណុច រៀបរៀងដោយបណ្តាមនុស្សរបស់នាយករដ្ឋមន្ត្រីអីុតាលី លោក Matteo Renzi សម្រាប់លើកក្នុងពេលប្រជុំវិសាមញ្ញរបស់ក្រុមប្រឹក្សាអឺរ៉ុប ដែលគ្រោងធ្វើនាថ្ងៃទី២៣ មេសា ប្រឈមមុខនឹងវិបត្តិអន្តោប្រវេសន៍នៅសមុទ្រមេឌីទែរ៉ាណេ ។
ការប្រើប្រាស់យន្តហោះគ្មានមនុស្សបើក ប្រដាប់អាវុធសម្រាប់ទិសដៅបែបនោះ នឹងជាលើកដំបូងពុំធ្លាប់មាននៅសមុទ្រមេឌីទែរ៉ាណេ ហើយចោទជាបញ្ហា៣ គឺ ភាពអាចធ្វើទៅរួចនៃបេសកកម្មបែបនោះ ភាពស្របច្បាប់នៃសកម្មភាព ផលប៉ះពាល់លើការហូរចូលនៃជនអន្តោប្រវេសន៍ និងដំណោះស្រាយវិបត្តិចម្បងនោះ ។
ចាប់តាំងពីច្រើនសប្តាហ៍មកហើយ ប្រទេសអីុតាលីលើកឡើងពីលទ្ធភាពនៃអន្តរាគមន៍យោធាមួយនៅលីប៊ី អតីតអាណានិគមរបស់ខ្លួនពេលដណ្តើមត្រួតត្រាដោយលោក មូសូលីនី ហើយប្រទេសនេះស្ថិតនៅទល់មុខឆ្នេរសមុទ្រអីុតាលី ។
រដ្ឋមន្ត្រីការពារប្រទេសអីុតាលីធ្លាប់បានលើកឡើងពីការត្រៀមរបស់អីុតាលី បញ្ជូនទាហាន៥ពាន់នាក់សម្រាប់អន្តរាគមន៍មួយនៅលីប៊ី ក៏ប៉ុន្តែប្រមុខរដ្ឋាភិបាលបដិសេធគំនិតនោះ ។ អាស្រ័យហេតុនេះហើយ បានជាអីុតាលីវិលមកដោះស្រាយវិបត្តិអន្តោប្រវេសន៍ជាមួយទិសដៅតូចជាងនេះ ដោយនឹងពុំមែនជាអន្តរាគមន៍ចំពោះសង្គ្រាមស៊ីវិលនៅលីប៊ីទេ ក៏ប៉ុន្តែជាទិសដៅរារាំងការសម្រុកហូរចូលនៃពួកអន្តោប្រវេសន៍លួចលាក់ មកកាន់អីុតាលីនិងអឺរ៉ុប ។
សំណើរបស់អីុតាលី គឺរៀបចំការល្បាតរបស់យន្តហោះគ្មានមនុស្សបើកតាមបណ្តោយឆ្នេរសមុទ្រលីប៊ី មានប្រវែង២ពាន់គីឡូម៉ែត្រ ហើយកម្ទេចបណ្តានាវាបញ្ជូនពួកអន្តោប្រវេសន៍ មុនពេលពួកអន្តោប្រវេសន៍ឡើងជិះ សម្រាប់ដំណើរផ្សងព្រេង ។
កងទ័ពអាកាសអីុតាលី បច្ចុប្បន្នមានយន្តហោះគ្មានមនុស្សបើកប្រដាប់អាវុធ១២គ្រឿង ប្រភេទ 6MQ-9 Reaper និងប្រភេទ 6MQ-1C Predator ។ យន្តហោះធុន 6MQ-1C ជាប្រភេទដែលពួកអាមេរិកតែងប្រើក្នុងការវាយប្រហាររបស់ខ្លួននៅប៉ាគីស្ថាន ឬនៅយេម៉ែន ព្រោះវាអាចហោះហើរបានយូរ រហូតដល់៣៦ម៉ោង ហើយអាចបំពាក់មីស៊ីលអាកាស-ដី និងគ្រាប់បែកបញ្ជា ៕
ចែករំលែកព័តមាននេះ