ផល សោភ័ណ្ឌ មិនស្តាយតំណែងកីឡាករជម្រើសជាតិ
រាជធានីភ្នំពេញ ៖ ទោះជាបាត់ឱកាសចេញប្រកួតក្រៅស្រុកក្រោយលាឈប់ពីតំណែងកីឡាករជម្រើសជាតិក៏ដោយ ក៏កីឡាករជើងខ្លាំង ផល សោភ័ណ្ឌ ហាក់មិនមានការសោកស្ដាយនោះទេ ។
រាជធានីភ្នំពេញ ៖ ទោះជាបាត់ឱកាសចេញប្រកួតក្រៅស្រុកក្រោយលាឈប់ពីតំណែងកីឡាករជម្រើសជាតិក៏ដោយ ក៏កីឡាករជើងខ្លាំង ផល សោភ័ណ្ឌ ហាក់មិនមានការសោកស្ដាយនោះទេ ។ ផ្ទុយទៅវិញ លោកបែរជាទទួលស្គាល់ថា ការសម្រេចចិត្តនេះនឹងជួយឲ្យអ្នកមានសមត្ថភាពជំនួសខ្លួនមានឱកាសយកមេដាយឲ្យកម្ពុជាពីព្រឹត្តិការណ៍អន្តរជាតិនោះផង ។
ប្រមាណ២លើករួចមកហើយដែលកីឡាកររូបនេះបានបង្ហាញខ្លួននៅក្នុងព្រឹត្តិការណ៍ប្រដាល់សាកលស៊ីហ្គេមនៅក្នុងប្រទេសឡាវ និងប្រទេសមីយ៉ាន់ម៉ាក្នុងឆ្នាំ២០១១ និង២០១៣ បើទោះមិនបានផ្លែផ្កាសូម្បីបន្តិចត្រឡប់មកវិញ។ សម្រាប់ព្រឹត្តិការណ៍ស៊ីហ្គេមក្នុងឆ្នាំ២០១៥នេះ កីឡាករផល សោភ័ណ្ឌ ក៏ត្រូវមានឈ្មោះក្នុងបញ្ជី៦រូបដើម្បីចេញប្រកួតក្រៅប្រទេសផងដែរ ប៉ុន្តែដោយសារតែលោកបានសុំដកខ្លួន ទើបកីឡាករម្នាក់ផ្សេងទៀតបានចូលជំនួស ហើយធ្វើឲ្យលោកបាត់ឱកាសបង្ហាញខ្លួនលើឆាកអន្តរជាតិ ។ ការសុំដកខ្លួននោះកើតឡើងបន្ទាប់ពីលោកចង់ត្រឡប់មកប្រដាល់ក្បាច់គុនបុរាណខ្មែរវិញដើម្បីទទួលបានទីផ្សារការងារឲ្យបានញឹកញយ ។
មនុស្សមួយចំនួនបន្ទោសថា លោកជ្រើសរើសផ្លូវខុស ដោយបានអង្គុយកៅអីក្នុងក្រុមជម្រើសជាតិទៅហើយបែរជាចុះខ្លួនឯងក្នុងពេលដែលតំណែងនោះមិនមែនធម្មតា ដ្បិតក្រៅពីទទួលបានឱកាសចេញទៅប្រកួតក្រៅស្រុក ក៏នឹងងាយក្លាយខ្លួនជាវីរបុរសរបស់កម្ពុជាផងដែរ បើអាចដណ្ដើមបានមេដាយមាសពីព្រឹត្តិការណ៍អន្តរជាតិណាមួយ។ ក្រុមអ្នកមិនស្របគំនិតរបស់ ផល សោភ័ណ្ឌ យល់ថាគេជាមនុស្សមិនចេះអត់ធ្មត់ មិនតស៊ូ ទើបសម្រេចចិត្តលាចេញពីតំណែងជម្រើសជាតិដែលមិនខុសពីចោលកៅអីខ្លួនឯងប្រគល់ឲ្យអ្នកផ្សេង ។ អ្នកទាំងនោះបានទាំងហៅការបកមកប្រកួតប្រដាល់សេរីរបស់កីឡាកររូបនេះថាជាការដើរផ្លូវដើម្បីតែក្រពះមួយគែ ហើយមិនមើលអនាគតពិតប្រាកដ ។ គាប់ជួនជាការប្រដាល់នៅលើសង្វៀនរាល់ថ្ងៃទទួលបានកម្រៃមិនខ្ពស់ មិនខុសពីការប្រកួតឲ្យតែល្អមើល ឬត្រូវគេហៅថាគ្រាន់តែប្ដូរបាយ មិនអាចមានបានផង ទើបរឹតតែមានអ្នកបន្ទោសចំពោះការសម្រេចចិត្តរបស់គេ ។
ក្រុមដដែលបានទាំងរិះគន់ថា ផល សោភ័ណ្ឌ មិនគិតវែងឆ្ងាយព្រោះតែប្រាក់កាសល្អិតដែលខុសពីការប្រឹងយកមេដាយឲ្យបានពីការប្រដាល់អន្តរជាតិណាមួយ បើនៅបន្តតំណែងជម្រើសជាតិនោះផង ។ យោងតាមការបញ្ជាក់ពីគណៈកម្មាធិការជាតិអូឡាំពិកកម្ពុជាបានអះអាងថា បើកុំតែផល សោភ័ណ្ឌ លាឈប់ពីក្រុមជម្រើសជាតិ កុំអីដំណើរចេញប្រកួត President Cup នៅក្នុងប្រទេសឥណ្ឌូណេស៊ីក្នុងសប្ដាហ៍នេះ និងការប្រកួតក្នុងព្រឹត្តិការណ៍ស៊ីហ្គេមនៅខែមិថុនានេះជារបស់គេយ៉ាងពិតប្រាកដ ។ បើទោះជាការចេញប្រកួត២លើកកន្លងមក មិនអាចឲ្យ ផល សោភ័ណ្ឌ ស្វែងរកចំណាត់ថ្នាក់ជូនជាតិ ក៏ក្រេឌីតនិងភាពល្បីល្បាញរបស់គេនៅតែឈរក្នុងបញ្ជីចេញប្រកួតស្វ័យប្រវត្តិសម្រាប់ព្រឹត្តិការណ៍ប្រដាល់សាកលអន្តរជាតិទាំងពីរ។ ម្នាក់ៗយល់ថា កីឡាកររូបនេះទំនងជាដេកស្ដាយក្រោយមិនតិចឡើយក្នុងពេលដែលក្រុមជម្រើសជាតិ៦រូបដែលត្រូវចេញទៅ បែរមិនមានវត្តមានខ្លួន ព្រោះតែការគិតខ្លីមួយពេល ។ ប៉ុន្តែភាគីសាមីខ្លួនបានអះអាងថា មិនមានការសោកស្ដាយនោះទេ ។
ផល សោភ័ណ្ឌ និយាយថា មុនពេលលាចេញលោកបានសម្រេចចិត្តច្បាស់ហើយ ដោយសារតែជីវភាពជាក់ស្ដែងរបស់លោកមិនអាចបន្តប្រឡូកក្នុងអាជីពប្រដាល់សាកល ដែលទាល់តែមានព្រឹត្តិការណ៍ប្រចាំឆ្នាំ ឬចេញក្រៅស្រុកទើបមានការងារនោះ ។ លោកហាក់សំដៅថា ខ្លួនមិនមានសមត្ថភាពដណ្ដើមយកមេដាយជូនជាតិនោះឡើយ ទើបសម្រេចចិត្តលាឈប់ដើម្បីផ្ដល់ឱកាសឲ្យអ្នកជំនាន់ក្រោយ ក្រែងមានសំណាងលើឆាកអន្តរជាតិ ។ លោកនិយាយដោយត្រង់ថា សម្រាប់ការប្រដាល់សាកល កម្ពុជាស្ថិតក្នុងកម្រិតមិនទាន់ល្អនោះទេ ក្នុងពេលប៉ះជាមួយជើងខ្លាំងនៅក្នុងតំបន់។ គាប់ជួនជាស្ថានភាពហ្វឹកហាត់ និងការរស់នៅរបស់កីឡាករជម្រើសជាតិកម្ពុជានៅមានកម្រិតមិនទាន់ល្អដូចបរទេស ទើបលោកមិនរំពឹងដូចអ្វីដែលក្រុមអ្នករិះគន់យល់ឃើញ បើនៅបន្តក្រាញតំណែងចេញប្រកួតតំណាងជាតិទៀត។ លោកថា ការប្រដាល់សាកលល្អតែពេលមានការប្រកួតក្រៅស្រុកប៉ុណ្ណោះ ប៉ុន្តែសម្រាប់កីឡាករដែលត្រូវការប្រាក់ និងត្រូវការឡើងប្រដាល់យកលុយដូចខ្លួន គឺប្រឡូកផ្នែកសេរីទើបជារឿងប្រសើរ ។
ផល សោភ័ណ្ឌ លើកឡើងដោយការទទួលស្គាល់ការពិតថា សមត្ថភាពខ្លួននៅមានកម្រិត ដូច្នេះលោកមិនចង់បន្តបំបាក់មុខជាតិទៀតទេ ទើបទុកឲ្យអ្នកក្រោយទៅម្ដងទៅក្រែងបានមេដាយត្រឡប់មកវិញ។ ការអះអាងនេះមានន័យថា លោកជាបុគ្គលស្រឡាញ់កិត្តិយសជាងការស្រឡាញ់ផលប្រយោជន៍ ខណៈដែលកីឡាករ-កីឡាការិនីជម្រើសជាតិច្រើននាក់មកហើយត្រូវគេឃើញមានឈ្មោះចេញប្រកួតក្រៅស្រុករហូត ក្រោមការជ្រោមជ្រែងរបស់ខ្សែទុយោនៅក្នុងសហព័ន្ធដោយមិនព្រមទុកឱកាសដល់អ្នកផ្សេងទាល់តែសោះ បើទោះជាការប្រកួតនៅក្រៅប្រទេសរបស់ពួកគេបានត្រឹមតែលទ្ធផលបរាជ័យដដែលជាដដែលត្រឡប់មកវិញ ។ ការដកខ្លួនរបស់ ផល សោភ័ណ្ឌ បានក្លាយជាការទទួលខុសត្រូវមួយគួរឲ្យសរសើរជាគំរូដល់កីឡាករជម្រើសជាតិផ្សេងទៀតដើម្បីឲ្យអ្នកទាំងនោះហ៊ានសុំលាឈប់ដោយសារតែអ្នកជំនាន់ក្រោយ ដ្បិតថានៅមានបទពិសោធន៍ស្ដួចស្ដើង ប៉ុន្តែក៏មិនប្រាកដថា ចាញ់បរទេសសម្រាប់ការប្រកួតក្នុងកម្រិតអន្តរជាតិដូចអ្នកទៅច្រើនលើកហើយស្ពាយបរាជ័យឡើងកីឡាករបរទេសស្គាល់មុខច្បាស់ លែងចង់ប្រកួតជាមួយនាំឱ្យអន់ដល់គេនោះទេ ៕
ចែករំលែកព័តមាននេះ