ខេត្តស្វាយរៀង ៖ ក្រុមចោរប្លន់ប្រដាប់អាវុធវែងខ្លី៣ដើម ចេញធ្វើសកម្មភាពប្លន់ និងបា.ញ់ប្រហារយ៉ាងឃោរឃៅ បណ្តាលឲ្យលោកគ្រូបង្រៀនម្នាក់ ស្លា.ប់បាត់បង់ជីវិតនៅក្នុងថ្លុកឈាម យ៉ាងអាណោចអាធម៌ និងប្លន់យកប្រាក់អស់៣១លានរៀល
ខេត្តស្វាយរៀង ៖ ក្រុមចោរប្លន់ប្រដាប់អាវុធវែងខ្លី៣ដើម ចេញធ្វើសកម្មភាពប្លន់ និងបាញ់ប្រហារយ៉ាងឃោរឃៅ បណ្តាលឲ្យលោកគ្រូបង្រៀនម្នាក់ ស្លាប់បាត់បង់ជីវិតនៅក្នុងថ្លុកឈាម យ៉ាងអាណោចអាធម៌ និងប្លន់យកប្រាក់អស់៣១លានរៀល ប្រាក់ដុល្លារ៤,០០០ដុល្លា និងមាស៥ជី ។ ករណីក្រុមចោរប្លន់ប្រដាប់អាវុធប្លន់ផ្ទះផ្ទេរប្រាក់វីងនេះ កើតឡើងកាលពីវេលាម៉ោង៦ និង២០នាទីល្ងាច ថ្ងៃទី២១ មេសា ២០១៥ នៅភូមិបុស្សគីរី ឃុំអណ្តូងពោធិ ស្រុករមាសហែក ។
បើតាមមន្ត្រីកងរាជអាវុធហត្ថខេត្ត បានឲ្យដឹងថា ជនរងគ្រោះឈ្មោះ គង់ យឿន ភេទប្រុស អាយុ៣៥ឆ្នាំ ជាគ្រូបង្រៀន មានទីលំនៅភូមិកើតហេតុខាងលើ ត្រូវក្រុមចោរបាញ់ប្រហារចំនួន៣គ្រាប់ ចំភ្លៅ១គ្រាប់ និងផ្លោកនោម២គ្រាប់ បណ្តាលឲ្យស្លាប់ភ្លាមៗ នៅនឹងកន្លែង ។
ប្រភពដដែលបន្តទៀតថា មុនពេលកើតហេតុគេឃើញក្រុមចោរប្រដាប់អាវុធមានគ្នាប្រហែល៣ទៅ៤នាក់ ប្រដាប់ដោយអាវុធ AK47 មួយដើម និងអាវុធខ្លី២ដើម ចូលធ្វើសកម្មភាពប្លន់ផ្ទះផ្ទេរប្រាក់វីង ជាផ្ទះរបស់ឈ្មោះ អ៊ិន សារ៉ាន ភេទប្រុស អាយុ៤៥ឆ្នាំ នៅភូមិបុស្សគីរី ឃុំអណ្តូងពោធិ ហើយខណៈក្រុមចោរកំពុងធ្វើសកម្មភាពប្លន់នោះ លោកគ្រូគង់ យឿន បានចូលទៅជួយ ក៏ត្រូវក្រុមចោរបាញ់ប្រហារចំនួន៣គ្រាប់ ត្រូវចំភ្លៅ១គ្រាប់ និងចំផ្លោកនោម២គ្រាប់ បណ្តាលឲ្យស្លាប់ភ្លាមៗ នៅក្នុងថ្លុកឈាម ហើយក្រុមចោរនាំគ្នាឡើងជិះម៉ូតូ បើកគេចខ្លួនដោយសុវត្តិភាព កន្លះម៉ោងក្រោយមក សមត្ថកិច្ចនគបាលក៏មកពិនិត្យកន្លែងកើតហេតុ និងដាក់កម្លាំងស្ទាក់គ្រប់ច្រកល្ហក នៅតែមិនឃើញក្រុមចោរឡើយ ។ រីឯសពលោកគ្រូបង្រៀន សមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី ។ ប្រជាពលរដ្ឋបានរិះគន់យ៉ាងចាស់ដៃថា ក្រុមចោរប្លន់ទាំងក្បាលប្រលប់មិនគួរណាសមត្ថកិច្ចស្ទាក់ចាប់មិនបាន តើសង្ឃឹមអីឯណាទៅភូមិឃុំមានសុវត្តិភាព ?
ចែករំលែកព័តមាននេះ