ខេត្តព្រះវិហារ ៖ ទាហានម្នាក់បានស្លា.ប់ក្នុងថ្លុកឈាមនៅលើផ្ទះរបស់ខ្លួនឯងដោយសារទាស់គ្នារឿងលេងល្បែងហើយប្រើចុងកាណុងដើម្បីពន្លត់កំហឹងរបស់ខ្លួន ទីបំផុតម្នាក់បានស្លា.ប់ ឯម្នាក់ទៀតរត់គេចខ្លួនចូលព្រៃបាត់ ។
ខេត្តព្រះវិហារ ៖ ទាហានម្នាក់បានស្លាប់ក្នុងថ្លុកឈាមនៅលើផ្ទះរបស់ខ្លួនឯងដោយសារទាស់គ្នារឿងលេងល្បែងហើយប្រើចុងកាណុងដើម្បីពន្លត់កំហឹងរបស់ខ្លួន ទីបំផុតម្នាក់បានស្លាប់ ឯម្នាក់ទៀតរត់គេចខ្លួនចូលព្រៃបាត់ ។ ហេតុការណ៍ដ៏សាហាវនេះបានកើតឡើងកាលពីវេលាម៉ោង៦ និង០៥នាទីល្ងាច ថ្ងៃទី២០ ខែមេសា ឆ្នាំ២០១៥ នៅផ្ទះជនរងគ្រោះ ស្ថិតក្នុងភូមិរុងរឿង៤ ឃុំមរតក ស្រុកជាំក្សាន្ត ខេត្តព្រះវិហារ ។
លោកញ៉ែម សុភាព អធិការរងទទួលបន្ទុកព្រហ្មទណ្ឌស្រុកជាំក្សាន្តបានឱ្យដឹងថា ករណីទំនាស់ដែលកើតចេញពីការលេងបៀរហូតឈានដល់ប្រើប្រាស់កាំភ្លើងអាកាបាញ់សម្លាប់យ៉ាងសាហាវដូចបាញ់ចាបនេះគឺជនដៃដល់ និងជនរងគ្រោះបានទាស់សំដីគ្នាជាយូរមកហើយ ហើយពេលលេងបៀជុំគ្នាក៏ទាស់សំដីគ្នាទៀត ពេលនោះជនរងគ្រោះក៏បានគំរាមដកកាំភ្លើងខ្លីបាញ់ក្បាលជនដៃដល់ទៀត ។ ដោយទ្រាំនិងពាក្យសំដីមិនបាន និងដោយសារមានគំនុំជាយូរមកហើយផងនេះ ជនដៃដល់ក៏ទាញកាំភ្លើងអាកា៤៧ដែលនៅជិតខ្លួនបាញ់ជនរងគ្រោះចំនួន៣គ្រាប់ស្លាប់ភ្លាមមួយរពេច ហើយក៏រត់គេចខ្លួនចូលព្រៃបាត់ដោយយកទាំងកាំភ្លើងអាកា៤៧ទៅជាមួយផង បន្សល់ទុកតែសាកសពជនរងគ្រោះនៅផ្ទះប៉ុណ្ណោះ ។
លោកអធិការរងបន្តទៀតថា ជនរងគ្រោះដែលស្លាប់បាត់បង់ជីវិតមានឈ្មោះព្រា ទូច ភេទប្រុស អាយុ៤៥ឆ្នាំ មានឋានន្តរស័ក្តិអនុសេនីយ៍ឯក មានតួនាទីជា អនុប្រធាន«គ» និងជាមេបញ្ជាការរងអនុសេនាធំលេខ៣ ចំណុះវរសេនាតូចលេខ៣៩៤ នៃកងពលលេខ៩ រីឯជនដៃដល់ជាទាហានក្នុងអង្គភាពជាមួយគ្នាមានឈ្មោះហេង ប្រុស អាយុ៣៨ឆ្នាំ ឋានៈនាយសំណង់, អនុប្រធាន«គ» និងជាមេបញ្ជាការរងអនុសេនាធំលេខ៣ ចំណុះវរសេនាតូចលេខ៣៩៤ នៃកងពលលេខ៩ បានរត់ចូលព្រៃបាត់ដោយយកកាំភ្លើងដែលធ្វើសកម្មភាពទៅជាមួយផង ។
លោកវរសេនីយ៍ទោអ៊ុំ សារិន ប្រធានការិយាល័យបច្ចេកទេសវិទ្យាសាស្ត្រដែលបានចុះពិនិត្យនៅកន្លែងកើតហេតុបានឱ្យដឹងថា ជនរងគ្រោះជាទាហានដែលត្រូវជនដៃដល់បាញ់ស្លាប់នៅលើផ្ទះដោយកាំភ្លើងអាកា៤៧ គឺបាញ់ចំដើមទ្រូង២គ្រាប់ និងដៃឆ្វេង១គ្រាប់បណ្តាលឱ្យស្លាប់ភ្លាមៗនៅលើផ្ទះកន្លែងកើតហេតុ ។
ក្រោយពិនិត្យសាកសពរួច សមត្ថកិច្ចជំនាញបានប្រគល់សាកសពជនរងគ្រោះទៅឱ្យសាមីអង្គភាពដើម្បីដឹកទៅស្រុកកំណើតនៅស្រុកស្រីសន្ធរ ខេត្តកំពង់ចាម ដើម្បីយកទៅធ្វើបុណ្យតាមប្រពៃណី ។
ព័ត៌មានចុងក្រោយពីសមត្ថកិច្ចបានឱ្យដឹងថា សមត្ថកិច្ចចម្រុះរួមមាននករបាល កងរាជអាវុធហត្ថ រួមទាំងសាមីអង្គភាពកំពុងដុតដៃដុតជើងតាមរកជនដៃដល់រយៈពេល២ថ្ងៃហើយដើម្បីយកមកផ្តន្ទាទោសទៅតាមផ្លូវច្បាប់ឱ្យខាងតែបាន ៕
ចែករំលែកព័តមាននេះ