រាជធានីភ្នំពេញ ៖ យុវជនម្នាក់ត្រូវបានសមត្តកិច្ចនគរបាលផ្នែកព្រហ្មទណ្ឌខណ្ឌ៧មករា ធ្វើការឃាត់ខ្លួនកាលពីវេលម៉ោង១០ និង៣០នាទី ថ្ងៃទី២១ មេសា នៅចំណុចផ្លូវលេខ២៧៤ កែងផ្លូវលេខ៩៣ សង្កាត់បឹងព្រលឹត ដោយជាប់ពាក់ពន្ធថា បានធ្វើសកម្មភាពឆក់ខ្សែ.កអ្នកដំណើរមុននេះ៣ថ្ងៃ ។
យុវជនដែលសមត្តកិច្ចឃាត់ខ្លួននោះឈ្មោះសុខ កក្កដា អាយុ២៣ឆ្នាំ មុខរបរជាងជួសជុលទូរស័ព្ទ ស្នាក់នៅផ្ទះលេខ១៥៧ ផ្លូវលេខ៩០០ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ដែលគេស្គាល់ថា ជាកូនចៅសង្កាត់រងទួសង្កែម្នាក់ ដោយសារគាត់ធ្វើសកម្មភាពញឹកញប់ ។
ទាក់ទិននឹងការឃាត់ខ្លួនយុវជនជាជនសង្ស័យឆក់ខ្សែ.កខាងលើនេះ ត្រូវបានមន្ត្រីផ្នែកនគរបាលព្រហ្មទណ្ឌខណ្ឌ៧មករា ឲ្យដឹងថា កាលពីវេលាម៉ោង៥ និង៥០នាទីល្ងាច ថ្ងៃទី១៨ មេសា ២០១៥ យុវជនរូបនោះ បានធ្វើសកម្មភាពឆក់ខ្សែ.ក ពីនារីម្នាក់អាយុ៣៥ឆ្នាំ នៅចំណុចមុខធនាគារមួយ ស្ថិតក្នុងសង្កាត់វាលវង់ខណ្ឌ៧មករា ។
មន្ត្រីនគរបាលខណ្ឌ៧មករាបានបន្តថា នៅពេលយុវជនរូបនោះ ធ្វើសកម្មភាពឆក់ខ្សែ.កជនរងគ្រោះ ហើយជនសង្ស័យបានជ្រុះកាបូបដៃ នៅកន្លែងកើតហេតុ ដែលនៅក្នុងកាបូបដៃនោះ មានកាតសំគាល់ខ្លួនផងដែរ ហើយត្រូវបានជនរងគ្រោះរើសទុកយកទៅប្តឹងសមត្តកិច្ច ។ ក្រោយពីមានពាក្យបណ្តឹងដែលភ្ជាប់ជាមួយ និងកាតសំគាល់ខ្លួននោះ សមត្តកិច្ចបានកំណត់មុខសញ្ញារួចជាស្រេចហើយ ព្រោះជនសង្ស័យធ្លាប់មានប្រវត្តធ្វើសកម្មភាពឆក់ និងធ្លាប់ត្រូវបានសមត្តកិច្ចធ្វើការឃាត់ខ្លួន ដូច្នោះមិនពិបាកស្រាវជ្រាវ និងស្វែងរកចាប់ខ្លួនទេ បានជាជាប់អន្ទាក់របស់កំលាំងល្បាតនគរបាលខណ្ឌ៧មករានោះ ។
មន្ត្រីនគរបាលបន្តថា ជនសង្ស័យម្នាក់នេះធ្វើសកម្មភាពឆក់ កន្លងមកភាគច្រើនគឺតែម្នាក់ឯង និងជិះម៉ូតូលឿនបំផុត ពិបាកនឹងដេញតាមគាត់ណាស់ លើកនេះបើកុំតែគាត់ជ្រុះកាបូបដៃ មានជាប់កាតសំគាល់ខ្លួន កុំអីពិបាកស្វែងរកគាត់បន្តិច ។ ក្រោយពីឃាត់ខ្លួនសមត្តកិច្ចបានកសាងសំណុំរឿង បញ្ជួនទៅកាន់សាលាដំបូងរាជធានីភ្នំពេញតាមនិតិវិធី ៕
ចែករំលែកព័តមាននេះ