ខេត្តកណ្តាល៖ បុរសជាអ្នកបើកអាអ៊ិចកាយដីម្នាក់បានដេកស្លាប់លើអង្រឹងបង្កឱ្យមានការភ្ញាក់ផ្អើលកាលពីវេលាម៉ោង៦ និង២០នាទីព្រឹក ថ្ងៃទី២១ មេសា ២០១៥ នៅចំណុចដីឡូត៍មួយកន្លែងស្ថិតក្នុងភូមិជ័យឧត្តម ឃុំសំរោងធំ ស្រុកកៀនស្វាយ។
ជនរងគ្រោះដែលស្លាប់ឈ្មោះម៉ុក រ៉ាមុន្នី ភេទប្រុស អាយុ៣៥ឆ្នាំ ជាអ្នកបើកអាអ៊ិចកាយដី មានស្រុកកំណើតនៅ ភូមិអូររោង ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
បើតាមប្រភពព័ត៌មានពីឈ្មោះអឿន ធារិទ្ធ ភេទប្រុស អាយុ២០ឆ្នាំ ត្រូវជាក្មួយបង្កើតជនរងគ្រោះបានរៀបរាប់ឱ្យដឹងថា រូបគេ និងជនរងគ្រោះទើបមកពីស្រុកបានមួយថ្ងៃមិនទាន់ចូលធ្វើការទេ ដេកចាំព្រឹកឡើងចាំចូលធ្វើការ ស្រាប់តែព្រឹកឡើងវេលាម៉ោងជាង៦ រូបគេបានឮទូរស័ព្ទជនរងគ្រោះរោទិ៍ក៏ដើរទៅដាស់ពូឱ្យភ្ញាក់លើកទូរស័ព្ទ។ ពេលទៅដល់ស្រាប់តែឃើញពូរបស់គេដេកស្លាប់ក្នុងអង្រឹងទៅហើយក៏ស្រែកប្រាប់ម្ចាស់ផ្ទះរាយការណ៍ទៅសមត្ថកិច្ចឱ្យចុះមកពិនិត្យតែម្តង។
បន្ទាប់ពីទទួលព័ត៌មាននេះភ្លាម សមត្ថកិច្ចបានចុះទៅដល់កន្លែងកើតហេតុ ហើយបង្កើតគណៈកម្មការចម្រុះត្រួតពិនិត្យ មាននគរបាល ប៉េអឹម គ្រូពេទ្យ អាជ្ញាធរភូមិ-ឃុំដើម្បីពិនិត្យសពជនរងគ្រោះ។ ក្រោយពីពិនិត្យរួចក្រុមគណៈកម្មការចម្រុះបានបញ្ជាក់ថា ជនរងគ្រោះស្លាប់ដោយសារខ្យល់គរ គឺមិនមានស្លាកស្នាមអ្វីពាក់ព័ន្ធនឹងរឿងឃាតកម្មទេ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ