ខេត្តបាត់ដំបង ៖ ខណៈដែលព្រះរាជពិធីបុណ្យច្រត់ព្រះនង្គ័លដែលធ្វើឡើងនៅក្នុងខេត្តបាត់ដំបង កាន់តែខិតជិតមកដល់នាពេលខាងមុខនេះ រដ្ធបាលសាលាខេត្តបានចេញសេចក្ដីជូនដំណឹងមួយច្បាប់ កាលពីថ្ងៃទី២០ មេសា ដើម្បីអំពាវនាវដល់ប្រជាពលរដ្ធ និងគ្រប់មជ្ឍដ្ធាននានា ចូលរួមឲ្យបានច្រើនកុះករ និងឲ្យបានអធឹកអធមបំផុត ក្នុងព្រះរាជពិធីបុណ្យវប្បធម៌ជាតិដ៏ឧត្តុងឧត្តមនេះ។
យោងខ្លឹមសារលិខិតជួនដំណឹងរបស់រដ្ធបាលសាលាខេត្តបាត់ដំបង ចុះថ្ងៃទី២០ មេសា ២០១៥ ដែលចុះហត្ថលេខាដោយអភិបាលខេត្តបាត់ដំបង លោកច័ន្ទ សុផល បានឲ្យដឹងថា ព្រះរាជពិធីបុណ្យច្រត់ព្រះនង្គ័លសម្រាប់ឆ្នាំ២០១៥នេះ នឹងចាប់ផ្ដើមពីថ្ងៃទី០៣ ឧសភាដល់ថ្ងៃទី០៨ ឧសភា ២០១៥ ដែលប្រព្រិត្តទៅនៅលើទីលានបាល់ទាត់វាលបែកចាន ស្ថិតក្នុងភូមិរំចេក៤ សង្កាត់រតនះ ក្រុងបាត់ដំបង។
លោកច័ន្ទ សុផល បានថ្លែងនៅក្នុងសេចក្ដីជូនដំណឹងដោយបង្ហាញនូវក្ដីរីករាយយ៉ាងក្រៃលែងថា នេះជាមោទនភាពដ៏ធំបំផុតដែលខេត្តបាត់ដំបង ទទួលបាននូវកិត្តិយសដ៏ធំធេងពីរាជរដ្ធាភិបាលកម្ពុជា ឲ្យរៀបចំព្រះរាជពិធីបុណ្យច្រត់ព្រះនង្គ័លសម្រាប់ឆ្នាំ២០១៥នេះ ក្រោមព្រះរាជធិបតិភាពដ៏ខ្ពង់ខ្ពស់ ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជណាចក្រកម្ពុជា ជាទីសក្ការៈដ៏ខ្ពង់ខ្ពស់។
លោកមានប្រសាសន៍ថា ដើម្បីអបអរសាទរ និងញ៉ាំងឲ្យព្រះរាជពិធីដ៏ឧត្តុងឧត្តមនេះ ប្រព្រឹត្តទៅប្រកបដោយភាពមហោឡារិក អធិកអធមសប្បាយរីករាយ អាជ្ញធរខេត្ត បានរៀបចំឲ្យមានកម្មវិធីជាច្រើននៅក្នុងព្រះរាជពិធីនេះ ដើម្បីឲ្យមន្ត្រីរាជការ បងប្អូនប្រជាពលរដ្ធចូលរួមទស្សនានាកំសាន្តនាពេលរាត្រី ដែលមានរយៈពេលជិត១សប្ដាហ៍។
សូមបញ្ជាក់ថា បន្ទាប់ពីរដ្ធបាលខេត្តបាត់ដំបង ទទូលបាននូវការអនុញ្ញាតពីរាជរដ្ធាភិបាលឲ្យរៀបចំព្រះរាជពិធិបុណ្យច្រត់ព្រះនង្គ័លសម្រាប់ឆ្នាំ២០១៥នេះ មន្ត្រីសាលាខេត្តដែលដឹកនាំដោយលោកច័ន្ទ សុផល អភិបាលខេត្តបានចាប់ផ្ដើមយ៉ាងសកម្ម ក្នុងការរៀបចំសាងសង់ទីតាំងប្រារព្ធព្រះរាជពិធីបុណ្យច្រត់ព្រះនង្គ័លនេះ តាំងពីដើមខែមេសារហូតមក នៅលើទីលានបាត់ទាត់វាលបែកចាន ដែលលោកអភិបាលខេត្តមានប្រសាសន៏បញ្ជាក់ថា មានផ្ទៃដីទំហំរហូតជាង៥ហិកតាឯណោះ។
ជាមួយនឹងសកម្មភាពដ៏មមាញឹករបស់ក្រុមការងាររដ្ធបាលសាលាខេត្តបាត់ដំបងខាងលើនេះ គេឃើញក្រុមរថយន្តពន្លត់អគ្គិភ័យរបស់ស្នងការដ្ធានខេត្តចំនួន៣គ្រឿង និងរថយន្តដឹកទឹកសម្រាប់ស្រោចស្រពរបស់សាលាខេត្តផងក៏បានធ្វើសកម្មភាពរាល់ថ្ងៃយ៉ាងសកម្មផងដែរ ដើម្បីដឹកទឹកស្រោចស្រពលើវាលស្មៅដ៏ខៀវខ្ចី នៅកន្លែងប្រារព្ធព្រះរាជពិធីបុណ្យ និងស្រោចស្រពនៅតាមបណ្ដាសួនច្បារនានានៅក្នុងក្រុងបាត់ដំបង។
ដោយឡែកប្រព័ន្ធអគ្គិសនីតាមបណ្ដាដងផ្លូវនានា នៅក្នុងក្រុង ឬ តាមទីប្រជុំជននានាក៏ត្រូវបានរៀបចំកែសម្រូល ដើម្បីបំភ្លឺលំអរពេលរាត្រីដែរ។ អភិបាលខេត្តបាត់ដំបង លោកច័ន្ទ សុផល ក៏បានមានប្រសាសន៍បញ្ជាក់បន្ថែមប្រាប់កោះសន្តិភាពតាមទូរស័ព្ទនៅរសៀលថ្ងៃទី២១ មេសា អំពីកិច្ចការដ៏មមាញឹកខាងលើនេះដែរថា ការងារទាំងអស់នេះ នឹងត្រូវធ្វើឲ្យចប់រួចរាល់យ៉ាងយូរត្រឹមថ្ងៃទី០២ ឧសភា ព្រោះនៅថ្ងៃទី០៣ ឧសភា កម្មវិធីនានា នៅក្នុងព្រះរាជពិធីបុណ្យនេះនឹងចាប់ដំណើរការហើយ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ