រាជធានីភ្នំពេញ ៖ ការប្រកួតប្រដាល់ថ្ងៃសៅរ៍នៅលើសង្វៀនស៊ីធីអិន នឹងត្រូវចាប់ផ្តើមដំណើរការជាធម្មតាវិញនៅថ្ងៃសៅរ៍ ទី២៥ មេសា បន្ទាប់ពីបានខកខានអស់រយៈពេលជាច្រើនខែកន្លងមកនេះ ។ សម្រាប់ថ្ងៃបើកឆាកប្រកួតឡើងវិញនេះមានការប្រកួតជាលក្ខណៈមិត្តភាពអន្តរជាតិរវាងកីឡាករកម្ពុជានិងថៃចំនួន២គូ ដែលសុទ្ធតែជាអ្នកប្រដាល់ជើងខ្លាំង និងកំពុងតែឡើងកូដដូចគ្នា ។
កីឡាកររឿង សោភ័ណ្ឌ មកពីក្លិបមកុដរាជសីហ៍ ត្រៀមកណ្តាប់ដៃស្វាគមន៍កីឡាករថៃ ថាន់ វ៉ាឡេក ក្នុងប្រភេទទម្ងន់៦៨គីឡូក្រាម ចំណែក ផល សោភ័ណ្ឌ មកពីក្លិបតាឡីដំរីមានរិទ្ធ ជួបប្រកួតជាមួយកីឡាករថៃ ផាត់ ឆៃដែន ក្នុងប្រភេទទម្ងន់៦៣,៥គីឡូក្រាម ។ តាមការឱ្យដឹងអ្នកប្រដាល់ថៃទាំង២រូបនេះមិនធ្លាប់មកប្រកួតនៅស្រុកខ្មែរម្តងណាឡើយ ទើបគេមិនដឹងពីសមត្ថភាពពិតប្រាកដថាខ្លាំងដល់កម្រិតណា ។ យោងតាមការបញ្ជាក់គូអន្តរជាតិទី១ រឿង សោភ័ណ្ឌ ធ្លាប់ប្រកួតបាន១២២ដង ឈ្នះ១០៦ដង ចាញ់១៤ដង ស្មើ២ដង ។ ចំណែក ថាន់ វ៉ាន់ឡេក ធ្លាប់ប្រកួតបាន៧០ដង ឈ្នះ៥០ដង ចាញ់២០ដង មិនដែលស្មើ តាមរយៈតួលេខប្រកួតរបស់កីឡាករទាំង២ខាងលើឃើញថា ភាគីកម្ពុជាមានប្រៀបជាងភាគីថៃ ធ្វើឱ្យ រឿង សោភ័ណ្ឌ ទទួលបាននូវទំនុកចិត្តខ្ពស់ពីអ្នកគាំទ្រសម្រាប់ការប្រកួតលើកនេះ ។
គូអន្តរជាតិទី២ កីឡាករថៃ ផាត់ ឆៃដែន ធ្លាប់ប្រកួតបាន៦៥ដង ឈ្នះ៥០ដង ចាញ់១៥ដង ដែលមានន័យថា កីឡាករឆ្លងដែនរូបនេះមិនមែនជាជើងថ្មី ឬមិនមានបទពិសោធន៍ប្រកួតនោះទេ ។ ដោយឡែកសម្រាប់កីឡាករផល សោភ័ណ្ឌ ធ្លាប់ប្រកួត៦១ដង ឈ្នះ៤៩ដង និងចាញ់១២ដង ។ ក្រៅពីមានតួលេខប្រកួតលើសខ្វះគ្នាបន្តិចបន្តួច កីឡាករកម្ពុជាត្រូវគេមើលឃើញថា មានប្រៀបត្រង់មានមាឌធំ និងមាំជាងកីឡាករថៃផងដែរ ថ្វីដ្បិតថាអ្នកទាំង២ត្រូវគេដាក់ថាមានទម្ងន់បុ៉នគ្នាក្តី ។ គាប់ជួន ផល សោភ័ណ្ឌ ត្រូវគេដឹងរួចទៅហើយថា ជាជើងខ្លាំងម្នាក់ដែលមានប្រវត្តិផ្តួលគូបរទេសមិនឱ្យហើបមាត់រួចគ្រប់លើក ទើបគេប៉ាន់ស្មានថា កីឡាករថៃអាចមិនមែនជាគូប្រកួតស្វិតស្វាញរបស់កីឡាករកម្ពុជាឡើយ ។ កីឡាករផល សោភ័ណ្ឌ ជាជើងខ្លាំងពូកែកែង ទាត់ និងម៉ាត់ ចំណែកកីឡាករថៃ ផាត់ ឆៃដែន នៅមិនមានភស្តុតាងណាមួយបង្ហាញថា ពូកែលើបច្ចេកទេសអ្វីនោះទេ ។
យ៉ាងណាក៏ដោយ លោកម៉ា សេរី ដែលជាអ្នកគ្រប់គ្រងកម្មវិធីកីឡាប្រចាំស្ថានីយទូរទស្សន៍ស៊ីធីអិនប្រាប់ថា កីឡាករថៃគូនេះគឺជាជើងល្អម្នាក់ ដូច្នេះ ផល សោភ័ណ្ឌ បើពិតជាឈ្នះ ក៏មិនមែនជារឿងងាយស្រួលដែរ។ ស្រួលមិនស្រួលក្តីសង្ឃឹមរបស់ភាគីខ្មែរអាចនឹងត្រូវបាត់បង់ផងក៏មិនដឹង បើហ៊ានតែប្រហែសមើលស្រាលដៃគូនោះ ។ បុ៉ន្តែអ្នកដែលយល់ឃើញបែបនេះមានចំនួនតិចបំផុតក្នុងពេលដែលមនុស្សទាំងនោះហាក់ជឿជាក់ភាគច្រើនទៅលើកីឡាករផល សោភ័ណ្ឌ ។
ចំណែកគូប្រកួតរវាងកីឡាករកម្ពុជាគ្នាឯងវិញមាន ផន ភឿត មកពីក្លិបឃ្លាំងមឿងកីឡា ប្រកួតជាមួយ ឆេង ពន្លក មកពីក្លិបតាព្រហ្មមានជ័យបង្ក្រាបគ្រឿងញៀន ។ ង៉ែត្រ រដ្ឋា មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយ រឿម វណ្ណៈ មកពីសមាគមកីឡាប្រដាល់ក្រសួងការពារជាតិ និងគូចុងក្រោយ ធី តុងហុី មកពីក្លិបសាលវ័ន្តកីឡា ប្រកួតជាមួយ សំអាង ឌុន មកពីក្លិបអេភូថងកីឡា ៕
ចែករំលែកព័តមាននេះ