ខេត្តប៉ៃលិន ៖ បុរសចំណាស់ម្នាក់ ទើបតែទិញរថយន្តបានជាង១សប្តាហ៍ ព្រោះតែមិនទាន់ចេះបើកស្ទាត់ លុះបើកឡើងលើផ្លូវជាតិបម្រុងចួកទៅចម្ការ ក៏វាក់ជាមួយរថយន្តឡិចស៊ីស១គ្រឿងដែលកំពុងបើកបញ្ច្រាសទិសគ្នាចំពីមុខយ៉ាងពេញទំហឹង បណ្តាលឱ្យរងការខូចខាត និងមានរបួសទាំងសងខាង តែត្រូវម្ចាស់រថយន្តបង្ក ព្រមសងការខូចខាត ដើម្បីបញ្ចប់រឿង ។
ហេតុការណ៍នេះកើតឡើង កាលពីវេលាម៉ោង០៩ និង៣០នាទីព្រឹកថ្ងៃទី២១ មេសា ២០១៥ នេះ ស្ថិតនៅចំណុចគល់ស្ពានតារៀប លើផ្លូវជាតិលេខ៥៧ ក្នុងភូមិទួលល្វា សង្កាត់ទួលល្វា ក្រុងប៉ៃលិន ខេត្តប៉ៃលិន ។
ប្រភពបានឱ្យដឹងថា អ្នកបើកបររថយន្តបង្កឈ្មោះសោម សុខ អាយុ៦៥ឆ្នាំ ជាកសិករ (រងរបួសទ្រូង និងមាត់) មានទីលំនៅភូមិ កើតហេតុខាងលើ ជិះរថយន្តម៉ាកតាកូម៉ា ពណ៌ខ្មៅ ពាក់ស្លាកលេខភ្នំពេញ2N-4938 រងការខូចខាតផ្នែកខាងមុខយ៉ាងដំណំ ។ ចំណែកឯអ្នកបើករថយន្តម៉ាកឡិចស៊ីស ពណ៌ស ពាក់ស្លាកលេខ 2L-2992 ឈ្មោះជុំ សុខា ភេទប្រុស អាយុ៣៦ឆ្នាំ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ជាអ្នករកស៊ីបើកបររថយន្តឈ្នួល ដោយរថយន្តខូចខាតផ្នែកខាងមុខទាំងស្រុង និងស្ត្រីរួមដំណើរម្នាក់ក្នុងចំណោម៥នាក់អត់ស្គាល់អត្តសញ្ញាណ បានរងរបួសធ្ងន់ ។
ប្រភពពីសាក្សីនៅកន្លែងកើតហេតុបានឱ្យដឹងថា គេឃើញរថយន្តរបស់បុរសចំណាស់ម្នាក់នោះ បើកបរចេញពីផ្ទះឡើងទៅផ្លូវជាតិដោយបត់ឆ្វេងមិនបានមើលមុខក្រោយ ស្របពេលនោះ មានរថយន្តឡិចស៊ីសដឹកអ្នកដំណើរពេញក្នុងរថយន្តបើកបរក្នុងល្បឿនលឿនដែរ ក្នុងទិសដៅពីជើងទៅត្បូង ក៏បានបុកចំពីមុខយ៉ាងពេញទំហឹង បណ្តាលឱ្យអ្នករួមដំណើរជិះនៅខាងមុខម្នាក់របួសធ្ងន់ ចំណែក៤នាក់ផ្សេងទៀតគ្មានរបួសទេ ។ រីឯរថយន្តតាកូម៉ាអ្នកបើកបររបួសស្រាល បច្ចុប្បន្នម្ចាស់រថយន្តទាំង២ព្រមសម្របសម្រួលដោយភាគីម្ខាងព្រមសងថ្លៃការខូចខាត និងចេញថ្លៃព្យាបាលជំងឺឱ្យអ្នករបួស ៕
ចែករំលែកព័តមាននេះ