ខេត្តកំពង់ឆ្នាំង ៖ កូនដំណាំហូបផ្លែ ដូចជា ស្វាយ មៀន ខ្នុរ ប្រមាណ១២០០ដើម និងផ្ទះមួយខ្នង នៅក្នុងចម្ការមួយកន្លែង ស្ថិតនៅចំណុចខ្សាច់ពូន ក្នុងភូមិក្រសាំងដុះឡើង ឃុំក្បាលទឹក ស្រុកទឹកផុស ត្រូវបានជនខិលខូចមួយក្រុមដែលគេថា មានគ្នា៥នាក់ នាំគ្នាដុតបំផ្លាញចោលដោយមិនដឹងមូលហេតុ កាលពីវេលាម៉ោង០៩ និង៥០នាទីព្រឹកថ្ងៃទី១៩ មេសា ២០១៥ ស្ថិតនៅលើដីចម្ការ៥៥
ហិកតារបស់លោកគង់ ប៊ុនធឿន និងអ្នកស្រីអ៊ុន ណាវី ដែលជាដីកំពុងប្រឈមនឹងអាជ្ញាធរខេត្តចេញដីកាដកហូត ។
ប្រភពបានឱ្យដឹងនៅវេលាព្រឹកថ្ងៃទី២០ មេសា ២០១៥ ថា លោកសេង អេង អាយុ៥៦ឆ្នាំ និងប្រពន្ធឈ្មោះយឹម ហេង អាយុ៥៥ឆ្នាំ ជាអ្នកស៊ីឈ្នួលចាំចម្ការកើតហេតុខាងលើ បាននិយាយឱ្យដឹងថា នៅវេលាម៉ោង៩ និង៥០ព្រឹកថ្ងៃទី១៩ មេសា ពួកគាត់បានឃើញភ្លើងព្រៃកំពុងឆាបឆេះយ៉ាងសន្ធោសន្ធៅមានប្រវែងទទឹងយ៉ាងធំ ឆេះចេញពីក្នុងចម្ការទិសខាងត្បូងចំណុចផ្លូវរទេះដេញមកក្នុងចម្ការផ្នែកខាងជើង ពេលនោះគាត់បានរត់ជិតដល់ក៏ឃើញមានមនុស្សប្រុស៥នាក់ បានចេញមកពីចំណុចភ្លើងឆេះនោះ ហើយឡើងម៉ូតូ២គ្រឿងជិះចេញទៅតាមផ្លូវលំទិសខាងត្បូងបាត់ ។
ដោយហេតុនេះ គាត់សង្ស័យថា ពិតជាពួកមនុស្សប្រុស៥នាក់នេះ ជាអ្នកលួចដុតបំផ្លាញដំណាំ និងផ្ទះចោលជាពុំខាន ។ដោយសារតែភ្លើងព្រៃឆេះដំណាំក្នុងចម្ការយ៉ាងសន្ធោសន្ធៅមានប្រវែងវែងបែបនេះ ពួកគាត់ពុំមានលទ្ធភាពពន្លត់បានឡើយ រហូតរាលដាលដល់ផ្ទះជញ្ជាំងស្លឹក ដំបូលស័ង្កសីទំហំ៣ គុណ៤ម៉ែត្រខ្ទេចអស់១ខ្នង និងកូនដំណាំក្នុងចម្ការអស់ប្រមាណ១២០០ដើម ទើបរលត់វិញ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ