ខេត្តសៀមរាប ៖ កម្មវិធីអង្គរសង្ក្រាន្តដែលរៀបចំនៅខេត្តសៀមរាប នាពេល ថ្មីៗកន្លងមក មានអ្នកទេសចរជាតិពីទូទាំងប្រទេស និងអ្នកទេសចរបរទេសចម្រុះជាតិសាសន៍ច្រើនកុះករចូលរួម ។
ខេត្តសៀមរាប ៖ កម្មវិធីអង្គរសង្ក្រាន្តដែលរៀបចំនៅខេត្តសៀមរាប នាពេល ថ្មីៗកន្លងមក មានអ្នកទេសចរជាតិពីទូទាំងប្រទេស និងអ្នកទេសចរបរទេសចម្រុះជាតិសាសន៍ច្រើនកុះករចូលរួម ។ អ្នកទេសចរគាប់ភ្នែកទស្សនាអង្រុតយក្ស មួកស្លឹកត្នោតយក្ស នំអន្សមយក្ស និងបំពង់ទឹកត្នោតយក្សជាដើម ។ លើសពីនោះក៏មានផ្ទាំងទស្សនីយភាពសិល្បៈជាច្រើនបានរំលេចឡើង ធ្វើឱ្យអ្នកទស្សនាហាក់មិនជិនណាយឡើយ ដូចជាការរាំចង្វាក់ម៉ាឌីហ្ស៊ន ដែលមានមនុស្សចូលរួម២០១៥នាក់ជាដើម ។
និស្សិតឈ្មោះ នី មករា រៀននៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចដែលបានចំណាយពេលទៅកម្សាន្តនៅតំបន់អង្គរវត្តនាឱកាសបុណ្យចូលឆ្នាំថ្មី ឆ្នាំមមែបាននិយាយថា «គោលដៅដែលរូបខ្ញុំ និងមិត្តភក្តិទៅខេត្តសៀមរាប ដើម្បីចូលឱ្យកៀកកន្លែងគួរឱ្យចាប់អារម្មណ៍ដូចជាចង់ទៅថតរូប និងទស្សនាស្លឹកត្នោតយក្ស អង្រុតយក្ស បំពង់ទឹកត្នោតយក្ស និងកន្លែង សំខាន់ៗមួយចំនួនទៀតឱ្យអស់ចិត្តក្នុងន័យចូលរួមលើកទឹកចិត្តអ្នករៀបចំកម្មវិធីដែលមានគំនិត ល្អៗលើកស្ទួយអ្វីដែលជាលក្ខណៈខ្មែរ ។ ពិតជាអស្ចារ្យដែលយើងបានបង្ហាញរូបភាពទាំងអស់នេះដល់ភ្ញៀវជាតិ និងអន្តរជាតិ បើទោះជារូបខ្ញុំ និងក្រុមមិត្តភក្តិទៅទស្សនាក្តៅ ហត់នឿយក៏សប្បាយរីករាយដែរ ។ ខ្ញុំរំពឹងថា អង្គរសង្ក្រាន្តឆ្នាំ២០១៦នឹងបន្តមានរូបភាព ល្អៗ ថ្មីៗទៀតដើម្បីវប្បធម៌ខ្មែរជាតិខ្មែរ ប្រទេសខ្មែរដែលកំពុងតែមានភាពទាក់ទាញ និងល្បីល្បាញលើសាកលលោកគួរឱ្យកត់សម្គាល់» ។
អ្នកស្រីសុដារី ដែលនាំសមាជិកគ្រួសារមួយចំនួនទៅចូលរួមកម្មវិធីអង្គរសង្ក្រាន្តឱ្យដឹងថា គ្រាន់តែឮដំណឹងផ្សព្វផ្សាយមានកម្មវិធីច្រើននៅក្នុងអង្គរសង្ក្រាន្ត គាត់ក៏នាំកូនចៅទៅលេងកម្សាន្ត ។ អ្នកស្រីដាវីឮដំណឹងថា នំអន្សមយក្សធំជាងមុនត្រៀមយកឯតទគ្គកម្មពិភពលោក ហើយទីបំផុតបានសម្រេច ។ គាត់ថែមទាំងបានឃើញការរាំចង្វាក់ម៉ាឌីហ្ស៊នបំបែកឯតទគ្គកម្មពិភពលោកទៀត រឹតតែអស្ចារ្យសម្រាប់មុខមាត់កម្ពុជា។ ម្ល៉ោះហើយក្នុងនាមជាកូនខ្មែរអ្នកស្រីសុដារី ថាត្រូវតែនាំកូនចៅទៅឃើញភាពរីកចម្រើនផ្នែកវប្បធម៌នៃឱកាសបុណ្យចូលឆ្នាំខ្មែរក្នុងកម្មវិធីអង្គរសង្ក្រាន្តដោយមិនឱ្យរំលងឡើយ ។
ដោយសារតែឃើញជោគជ័យនោះហើយ ទើបអ្នកស្រីសុដារី ចង់ឱ្យសហភាពសហព័ន្ធយុវជនកម្ពុជារៀបចំកម្មវិធីអង្គរសង្ក្រាន្តបន្តទៀតប្រសិនជាអាចដើម្បីឱ្យជនរួមជាតិខ្មែរ និងភ្ញៀវបរទេសសប្បាយរីករាយ ។
ដោយសារតែមានស្នាមអនុស្សាវរីយ៍រីករាយពីអង្គរសង្ក្រាន្តប៉ុន្មានលើកនោះ ទើបមហាជនទទូចឱ្យសហភាពសហព័ន្ធយុវជនកម្ពុជារៀបចំកម្មវិធីនេះទៀតនាឆ្នាំក្រោយ ដោយមិនចង់ឱ្យអង្គរសង្ក្រាន្តរៀបចំឡើង៥ឆ្នាំម្តងដូចការលេចឮនោះឡើយ ៕
ចែករំលែកព័តមាននេះ