ខេត្តព្រះសីហនុ ៖ អគ្គិភ័យឆេះព្រៃត្រូវបានពន្លត់បានទាំងស្រុងដោយកម្លាំងពន្លត់អគ្គិភ័យនៃស្នងការដ្ឋាននគរបាលខេត្តព្រះសីហនុ ត្រឹមតែរយៈពេលជិត១ម៉ោង បន្ទាប់ពីបានឆាបឆេះរាលដាលពីកន្លែងមួយទៅកន្លែងមួយសំដៅកាន់ពន្ឋនាគាខេត្តព្រះសីហនុ និងផ្ទះប្រជាពលរដ្ឋដែលនៅក្បែរនោះយ៉ាងសន្ឋោរសន្ឋៅរួចមក ។ អគ្គិភ័យនេះបានឆាបឆេះនាវេលាម៉ោង៨ និង១៥នាទីយប់ ថ្ងៃទី២០ ខែមេសា ឆ្នាំ២០១៥ ក្បែរពន្ឋនាគាខេត្តព្រះសីហនុ ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ។
លោកវរសេនីយ៍ទោស៊ុន សុផាត ស្នងការរងទទួលផែនបង្ការ និងពន្លត់អគ្គិភ័យ នៃស្នងការដ្ឋាននគរបាលខេត្តព្រះសីហនុបានឱ្យដឹងថា អគ្គិភ័យនេះត្រូវបានគ្រប់គ្រងទាំងស្រុងត្រឹមតែរយៈពេលជាងកន្លះម៉ោងតែប៉ុណ្ណោះ បើទោះបីកន្លែងកើតហេតុមានសភាពលំបាកចូលពន្លត់បន្តិចក្តី ប៉ុន្តែកម្លាំងជំនាញរបស់លោកបានខិតខំយ៉ាងខ្លាំងអស់ពីសមត្ថភាព ប្រយោជន៍ជួយសង្គ្រោះដល់ផ្ទះប្រជាពលរដ្ឋនិងទីតាំងពន្ឋនាគាខេត្តព្រះសីហនុដែលនៅក្បែរនោះ បើយើងមិនបានជួយសង្គ្រោះទាន់ពេលនោះទេនឹងមានការខាតបង់ច្រើន ព្រោះព្រៃ និងស្មៅវាមានលក្ខណៈក្រៀមស្វិត វាជាអំណោយផលយ៉ាងខ្លាំងដល់អគ្គិភ័យ ។
លោកបន្តថា អគ្គិភ័យនេះបានឆាបឆេះចេញពីព្រៃដីឡូត៍ទុកចោលមួយកន្លែងស្ថិតនៅក្បែរកំពូលភ្នំក្បែរពន្ឋនាគាខេត្តព្រះសីហនុ ហើយបានរាលដាលមកសំដៅផ្ទះប្រជាពលរដ្ឋ និងពន្ឋនាគាខេត្តព្រះសីហនុ ។ អគ្គិភ័យនេះបានគ្រប់គ្រងទាំងស្រុងត្រឹមតែជិត១ម៉ោងតែប៉ុណ្ណោះដោយប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន២គ្រឿង និងប្រើប្រាស់ទឹកតែ២រថយន្តតែប៉ុណ្ណោះ ។
ជុំវិញអគ្គិភ័យនេះដែរ មានមតិប្រជាពលរដ្ឋជាច្រើនបានស្នើដល់អាជ្ញាធរដែនដីគ្រប់លំដាប់ថ្នាក់ សូមមេត្តារឹតបន្តឹងដល់គ្រប់ម្ចាស់ដីឡត៍ទាំងអស់ដែលពុំទាន់បានសាងសង់សំណង់ឱ្យមានទំនួលខុសត្រូវ មិនគួរទុកដីទំនេរឱ្យកើតជាព្រៃ និងស្មៅដុះបង្កឱ្យមានអគ្គភ័យកើតឡើងជាញឹកញ៉ាប់ បង្កការភ័យខ្លាចដល់ប្រជាពលរដ្ឋដែលរស់នៅក្បែរៗនោះ ជាក់ស្តែងនៅខេត្តព្រះសីហនុអគ្គិភ័យដែលកើតឡើងពីការឆេះព្រៃ និងស្មៅនេះគិតត្រឹមខែមេសារនេះកើតឡើងមិនក្រោមពី៤ទៅ៥ដងនោះទេ ៕
ចែករំលែកព័តមាននេះ