រាជធានីភ្នំពេញ ៖ បន្ទាប់ពីការចរចានយោបាយឱ្យមានភាពល្អប្រសើរឡើងជាមួយគណបក្សប្រជាជនកម្ពុជា ដែលជាគណបក្សកាន់អំណាចនោះ គណបក្សសង្គ្រោះជាតិដែលជាគណបក្សក្រៅរដ្ឋាភិបាលបានចេញថ្លែងការណ៍ប្រកាស
រាជធានីភ្នំពេញ ៖ បន្ទាប់ពីការចរចានយោបាយឱ្យមានភាពល្អប្រសើរឡើងជាមួយគណបក្សប្រជាជនកម្ពុជា ដែលជាគណបក្សកាន់អំណាចនោះ គណបក្សសង្គ្រោះជាតិដែលជាគណបក្សក្រៅរដ្ឋាភិបាលបានចេញថ្លែងការណ៍ប្រកាសជំហររបស់ខ្លួនភ្លាមចំពោះគោលដៅរបស់គណបក្ស ។
ការចេញសេចក្តីថ្លែងការណ៍របស់គណបក្សសង្គ្រោះជាតិ ក៏ស្របពេលដែលមតិមហាជនមួយចំនួនលើកឡើងថា គណបក្សសង្គ្រោះជាតិអាចនឹងឈានទៅរកដូចគណបក្សហ៊្វុនស៊ិនប៉ិច បន្ទាប់ពីចូលរួមធ្វើជាដៃគូជាមួយគណបក្សប្រជាជនកម្ពុជា ។
យោងតាមសេចក្តីថ្លែងការណ៍របស់គណបក្សសង្គ្រោះជាតិ ចុះថ្ងៃទី១៣ មេសា បានលើកឡើងពីជំហរនិងគោលដៅរបស់ខ្លួនថាមិនប្រែប្រួលនយោបាយទេក្នុងការចរចានយោបាយជាមួយគណបក្សប្រជាជនកម្ពុជា ។ សេចក្តីថ្លែងការណ៍របស់គណបក្សសង្គ្រោះជាតិបញ្ជាក់ថា «ជាមួយនឹងប្រជារាស្ត្រខ្មែរទាំងមូល គណបក្សសង្គ្រោះជាតិអបអរសាទរពីការដោះលែងពីពន្ធនាគារនូវ សកម្មជនដីធ្លី សកម្មជនគណបក្ស និងអ្នកតវ៉ាដទៃទៀត ដែលត្រូវបានអាជ្ញាធរចាប់យកទៅឃុំឃាំងទាក់ទងទៅនឹងព្រឹត្តិការណ៍នយោបាយដែលបានកើតឡើងក្រោយពីការបោះឆ្នោតថ្ងៃទី២២ កក្កដា ឆ្នាំ២០១៣ ។ ទន្ទឹមនឹងនេះ ពិធីមួយដែលត្រូវបានរៀបចំ ដើម្បីផ្ទេរតំណែងសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ដែលមានប្រធាន១រូប អនុប្រធាន១រូប និងសមាជិកថ្មី៧រូប បានចូលកាន់តំណែងនៅក្នុង គ.ជ.ប ស្របទៅនឹងកិច្ចព្រមព្រៀងថ្ងៃទី២២ កក្កដា ឆ្នាំ២០១៤ រវាងគណបក្សប្រជាជនកម្ពុជា និងគណបក្សសង្គ្រោះជាតិ» ។
សេចក្តីថ្លែងការណ៍គូសបញ្ជាក់ថា ក្នុងការចរចា ដែលខ្លួនបានចាប់ផ្តើមហើយបន្តមកទល់នឹងថ្ងៃនេះជាមួយគណបក្សប្រជាជនកម្ពុជា រហូតសម្រេចបង្កើត គ.ជ.ប ថ្មី ខាងលើនេះថ្នាក់ដឹកនាំគណបក្សសង្គ្រោះជាតិមិនដែល ប្រែប្រួលជំហររបស់ខ្លួនម្តងណាឡើយ ហើយបានរក្សាគោលដៅរបស់ខ្លួនតាំងពីដើមទីយ៉ាង ជាប់លាប់ គឺការជំរុញឱ្យមានការរៀបចំ គ.ជ.ប ថ្មីមួយដែលមានសមាសភាពអាចទុកចិត្តបាន ។
ក្នុងឱកាសនៃការបង្កើត គ.ជ.ប មួយថ្មីដែលមានលក្ខណៈដូចចែងខាងលើ ហើយដែលបានចេញជារូបរាង និងក្នុងឱកាសទន្ទឹមគ្នានៃការដោះលែងសកម្មជនរបស់ខ្លួនពីពន្ធនាគារនៅថ្ងៃជាមួយគ្នានោះ គណបក្សសង្គ្រោះជាតិសូមសម្តែងនូវការគោរពចំពោះវីរភាពរបស់សកម្មជនរងគ្រោះទាំងឡាយដែលកន្លងមកបានបញ្ជូនសារជានិច្ចពីពន្ធនាគារមិនឱ្យថ្នាក់ដឹកនាំគណបក្សសង្គ្រោះជាតិយល់ព្រមយកពួកគាត់ធ្វើជាថ្នូរក្នុងការចរចារណាមួយ ហើយត្រូវរក្សាជំហរឱ្យនៅរឹងមាំជានិច្ចក្នុងការចរចាជាមួយគណបក្សប្រជាជនកម្ពុជា ដើម្បីសម្រេចឱ្យបានគោលដៅជាតិនិយម និងប្រជាធិបតេយ្យ ។
ទាក់ទិននឹងការលើកឡើងថា គណបក្សសង្គ្រោះជាតិអាចនឹងដូចគណបក្សហ៊្វុនស៊ិនប៉ិចនោះ កាលពីពេលថ្មីៗនេះ មេដឹកនាំគណបក្សសង្គ្រោះជាតិលោក សម រង្ស៊ី បានច្រានចោលនូវមតិរិះគន់លើរូបលោក ដែលថាការប្រើវប្បធម៌សន្ទនាជាមួយសម្តេចតេជោនាយករដ្ឋមន្ត្រី ហ៊ុន សែន នៅថ្ងៃខាងមុខនឹងនាំឱ្យបក្សប្រឆាំងបាត់បង់អាសនៈដូចប្រធានគណបក្សហ្វុ៊នស៊ិនប៉ិច គឺសម្តេចក្រុមព្រះ ។
លោក សម រង្ស៊ី ថ្លែងថា គណបក្សសង្គ្រោះជាតិបង្កើតវប្បធម៌សន្ទនាជាមួយសម្តេចនាយករដ្ឋមន្ត្រី ហ៊ុន សែន គឺដើម្បីប្រយោជន៍ និងយុត្តិធម៌សង្គម ប៉ុន្តែការសន្ទនារវាងសម្តេចក្រុមព្រះ និងសម្តេច ហ៊ុន សែន កន្លងទៅ ដើម្បីចង់បានប្រយោជន៍បក្សពួកខ្លួន ។
លោក សម រង្ស៊ី សង្កត់ធ្ងន់ថា «អ្នកខ្លះទៅប្រៀបធៀបថា សម រង្ស៊ី ជជែកជាមួយសម្តេច ហ៊ុន សែន ដូចរណឫទ្ធិ ដូចហ៊្វុនស៊ិនប៉ិច ខុសគ្នាស្រឡះម្ចាស់ថ្លៃអើយ ដូចមេឃនឹងដី ។ សម្តេចក្រុមព្រះជជែកជាមួយសម្តេច ។ ហ៊ុន សែន ដើម្បីទារតំណែង ដើម្បីបានផលប្រយោជន៍ផ្ទាល់ខ្លួនបក្ខពួករបស់លោក សម្តេច ហ៊ុន សែន បានប្រាប់ខ្ញុំថា ព្រះអង្គម្ចាស់រណឫទ្ធិទៅជជែកជាមួយ ហ៊ុន សែន គឺទារតំណែងគឺពុះជាពីរ សូម្បីនាយកសាលាខាង CPP អ៊ីចឹងនាយករងខាងហ៊្វុនស៊ិនប៉ិច ទាមទារតំណែង ផលប្រយោជន៍ឱ្យខ្លួនឱ្យបក្សហ្នឹង មិនមែនវប្បធម៌សន្ទនាទេ ហ្នឹងវប្បធម៌បំផ្លាញ វប្បធម៌ពុករលួយ» ។
ទោះជាយ៉ាងណាក្តី សម្តេចក្រុមព្រះនរោត្តមរណឫទ្ធិ ប្រធានគណបក្សហ្វុ៊នស៊ិនប៉ិច នាព្រឹកថ្ងៃទី១៩ មេសា ឆ្នាំ២០១៥ បានមានបន្ទូលគាំទ្រចំពោះការបង្កើតវប្បធម៌សន្ទនារវាងសម្តេចតេជោ ហ៊ុន សែន និងលោក សម រង្ស៊ី ៕
ចែករំលែកព័តមាននេះ