រាជធានីភ្នំពេញ ៖ អ្នកប្រដាល់កម្ពុជា៦រូបដែលស្ថិតក្នុងក្រុមជម្រើសជាតិមានកីឡាករណាត សៀកនិន, សាន តុលា, ស្រម៉ៃ សួន, វ៉ែន រដ្ឋា, សុខ ទូច និងកីឡាការិនី វី ស្រីខួច ត្រូវបានសហព័ន្ធកីឡាប្រដាល់កម្ពុជាបញ្ជូនឱ្យទៅចូលរួមប្រកួត
រាជធានីភ្នំពេញ ៖ អ្នកប្រដាល់កម្ពុជា៦រូបដែលស្ថិតក្នុងក្រុមជម្រើសជាតិមានកីឡាករណាត សៀកនិន, សាន តុលា, ស្រម៉ៃ សួន, វ៉ែន រដ្ឋា, សុខ ទូច និងកីឡាការិនី វី ស្រីខួច ត្រូវបានសហព័ន្ធកីឡាប្រដាល់កម្ពុជាបញ្ជូនឱ្យទៅចូលរួមប្រកួតនៅក្នុងព្រឹត្តិការណ៍ប្រេស៊ីឌិនខាប់លើកទី២២ នៅទីក្រុងហ្សារការតា ប្រទេសឥណ្ឌូណេស៊ី ដែលនឹងចាប់ផ្តើមពីថ្ងៃទី២២ ដល់ថ្ងៃទី២៥ ខែមេសា ។
លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជា ដែលបានជូនដំណើរកីឡាករ-កីឡាការិនីទាំង៦រូបដល់អាកាសយានដ្ឋានអន្តរជាតិភ្នំពេញកាលពីថ្ងៃសៅរ៍ ទី១៨ មេសា កន្លងមកនេះឱ្យដឹងថា ការទៅចូលរួមប្រកួតលើកនេះត្រូវបានចាត់ទុកថា គឺជាការស្វែងរកនូវបទពិសោធន៍មួយថ្មីទៀតសម្រាប់ត្រៀមទៅចូលរួមប្រកួតកីឡាសីុហ្គេមលើកទី២៨ ឆ្នាំ២០១៥ នៅប្រទេសសិង្ហបុរី ក្រោយពីកីឡាករ-កីឡាការិនីទាំង៦រូបនេះបានធ្វើការហ្វឹកហាត់នៅក្នុងប្រទេសអស់រយៈពេលជាច្រើនខែកន្លងមកនេះ ។
លោកតែម ម៉ឺន បានឱ្យដឹងទៀតថា ក្នុងចំណោមកីឡាករ-កីឡាការិនីទាំង៦រូបនេះ លោកមានសង្ឃឹមយ៉ាងមុតមាំថា ពួកគេនឹងអាចដណ្តើមបានមេដាយពីការប្រកួតកីឡាស៊ីហ្គេម ជាពិសេសកីឡាការិនី វី ស្រីខួច តែម្តង ព្រោះកីឡាការិនីរូបនេះធ្លាប់មានបទពិសោធន៍ប្រកួតនៅលើសង្វៀនច្រើនជាងគេ ។ ទោះបីយ៉ាងណា សម្រាប់កីឡាករ៥រូបផ្សេងទៀតក៏មិនអន់ដែរ គ្រាន់តែពួកគេខ្លះជាអ្នកប្រដាល់ជើងថ្មីមិនសូវមានបទពិសោធន៍ប្រកួតដូច វី ស្រីខួច បុ៉ណ្ណោះ ។ យ៉ាងណាក៏ដោយ កីឡាករ-កីឡាការិនីទាំង៦រូបនេះត្រូវបានធ្វើការជ្រើសរើសយ៉ាងសម្រិតសម្រាំងដើម្បីប្រមូលផ្តុំធ្វើការហ្វឹកហាត់មុនពេលចេញទៅប្រកួតផងដែរ ។
គួររំលឹកថា នៅទសវត្សឆ្នាំ១៩៦០ កីឡាករប្រដាល់កម្ពុជាធ្លាប់បានសាងកេរ្តិ៍ឈ្មោះយ៉ាងល្បីល្បាញបំផុតនៅក្នុងតំបន់នៃបណ្តាប្រទេសអាស៊ាន ហើយថែមទាំងធ្លាប់ដណ្តើមបានមេដាយមាសយ៉ាងច្រើនសន្ធឹកសន្ធាប់មកជូនជាតិទៀតផង ។ បច្ចុប្បន្នកីឡាប្រដាល់សាកលកម្ពុជាហាក់នៅមានកម្រិតនៅឡើយ ខណៈដែលសហព័ន្ធកីឡាប្រដាល់កម្ពុជាកំពុងតែយកចិត្តទុកដាក់ជំរុញ និងលើកកម្ពស់វិស័យកីឡាមួយនេះឱ្យមានការរីកចម្រើនឡើងវិញ ៕
ចែករំលែកព័តមាននេះ