ខេត្តបាត់ដំបង ៖ បើតាមសេចក្តីរាយការណ៍បានឱ្យដឹងថា មនុស្សម្នាក់ទៀតហើយនៅក្នុងឃុំរកា ស្រុកសង្កែ ដែលឆ្លងមេរោគ
អេដស៍បានស្លាប់ហើយ នៅវេលាម៉ោង០១ និង៣០នាទីរសៀលថ្ងៃទី២០ មេសា ២០១៥ នេះ បន្ទាប់ពីជនរងគ្រោះបានធ្លាក់ខ្លួនឈឺក្នុងអំឡុងខែមករាមកនោះ ខណៈដែលស្ថានភាពធ្ងន់ធ្ងរខ្លាំងឡើងលែងដឹងខ្លួន ។
ប្រភពបានឱ្យដឹងថា ជនរងគ្រោះឈ្មោះតាត ឆយ ភេទប្រុស អាយុ៨៧ឆ្នាំ ។
គួររំលឹកថា ជំទប់ទី២ម្នាក់នៅក្នុងឃុំរកា ស្រុកសង្កែ ដែលឆ្លងមេរោគអេដស៍បានស្លាប់នៅវេលាម៉ោង០៤ និង០៥នាទីរសៀលថ្ងៃទី០៦ មេសា ២០១៥ នេះ បន្ទាប់ពីក្រុមគ្រួសារបញ្ជូនពីមន្ទីរពេទ្យបង្អែកខេត្ត មកកាន់លំនៅឋានវិញដោយមានរៀបចំពិធីសូត្រធម៌ ខណៈស្ថានភាពធ្ងន់ធ្ងរខ្លាំងឡើងលែងដឹងខ្លួន ។
សូមបញ្ជាក់ថា អ្នកផ្ទុកមេរោគអេដស៍បានស្លាប់សរុបចំនួន៨នាក់ ក្នុងនោះមានមនុស្សចាស់៧នាក់ និងទារកម្នាក់ ដែលអ្នកឆ្លងមេរោគអេដស៍ មានទាំងអស់ចំនួនជាង២០០នាក់ក្នុងឃុំរកានោះ ។
ប្រភពបានឱ្យដឹងទៀតថា អ្នកផ្ទុកមេរោគអេដស៍៥នាក់ទៀតកំពុងប្រឈមធ្ងន់ធ្ងរ រាប់ទាំងបុរសឈ្មោះសឿន ឆម, ឈ្មោះសាប់ ឆយ ភេទស្រី អាយុ៤៨ឆ្នាំ, ឈ្មោះលួង អម ភេទស្រី អាយុ៨៥ឆ្នាំ, ឈ្មោះជិន វុន ភេទស្រី អាយុ៧៧ឆ្នាំ និងឈ្មោះប៉ាត់ ធឿត ភេទស្រី អាយុ៧៨ឆ្នាំ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ