ប្រធានាធិបតីអាហ្វហ្គានីស្ថានលោកអាស្ត្រាហ្វ ហ្គានី បានទៅដល់ទីក្រុងតេហេរ៉ង់កាលពីព្រឹកថ្ងៃទី១៩ មេសា ដើម្បីបំពេញទស្សនកិច្ចផ្លូវការរយៈពេល២ថ្ងៃនៅប្រទេសអីុរ៉ង់ បន្ទាប់ពីការវាយប្រហារភេរវកម្មយ៉ាងបង្ហូរឈាមមួយនៅទីក្រុងហ្សាឡាឡាបាដ ជាការវាយប្រហារលើកដំបូងរបស់ក្រុមជីហាដរដ្ឋអ៊ិស្លាម ។
យោងតាមទីភ្នាក់ងារព័ត៌មានផ្លូវការអីុរ៉ង់ IRNA ថា លោកហ្គានី ត្រូវជួបពិភាក្សាជាមួយសមភាគីអីុរ៉ង់លោកហាសាន់ រ៉ូហានី ពីមធ្យោបាយនានាដើម្បីពង្រឹងកិច្ចសហប្រតិបត្តិការទ្វេភាគី ព្រមទាំងពីបណ្តាបញ្ហាតំបន់ និងអន្តរជាតិ។
លោកហ្គានី អមដំណើរដោយសមាជិករដ្ឋាភិបាលជាច្រើនរូប ពិសេសរដ្ឋមន្ត្រីការបរទេស និងរដ្ឋមន្ត្រីក្រសួងរ៉ែ និងប្រេងកាត ។
ប្រទេសអីុរ៉ង់បានចូលរួមក្នុងការតស៊ូប្រឆាំងក្រុមរដ្ឋអ៊ិស្លាមដោយជួយទ្រទ្រង់ដល់រដ្ឋាភិបាលស៊ីរី និងអីុរ៉ាក់ ជាប្រទេសពីរដែលអង្គការរដ្ឋអ៊ិស្លាមដណ្តើមត្រួតត្រាដែនដីមួយផ្នែកយ៉ាងធំដូចគ្នា ។
ទស្សនកិច្ចរបស់លោកហ្គានី នៅអីុរ៉ង់គ្រោងធ្វើតាំងពីខែកុម្ភៈ ក៏ប៉ុន្តែត្រូវពន្យារពេលបណ្តាលមកពីការបាក់ដីច្រើនកន្លែងនៅអាហ្វហ្គានីស្ថានបណ្តាលឱ្យមនុស្សស្លាប់ជាង២៨០នាក់ ៕
ចែករំលែកព័តមាននេះ