ខេត្តព្រះសីហនុ ៖ ស្ត្រីសង្ស័យចំនួន៦នាក់ ត្រូវបានកម្លាំងនគរបាលខេត្តព្រះសីហនុ បានធ្វើការស្រាវជ្រាវ រហូតឈានទៅដល់ការឃាត់ខ្លួនជាបន្តបន្ទាប់ ក្នុងនោះមានទាំងអនីតិជន៣នាក់ ជាប់ពាក់ព័ន្ធនឹងសកម្មភាពលួចទ្រព្យសម្បត្តិរបស់ប្រជាពលរដ្ឋនៅតំបន់ឆ្នេរអូរឈើទាល កាលពីល្ងាចថ្ងៃទី១៧ មេសា ២០១៥។
លោកអនុសេនីយ៍ទោ លុយ ហាង នាយប៉ុស្តិ៍នគរបាលរដ្ឋាបាលសង្កាត់លេខ៤ បានបញ្ជាក់ថា ការស្រាវជ្រាវតាមចាប់ខ្លួនស្ត្រីសង្ស័យទាំងនេះ បានធ្វើឡើងក្រោយពីមានពាក្យបណ្តឹងរបស់ប្រជាពលរដ្ឋជុំវិញការបាត់បង់សម្ភារនៅឆ្នេរអូរឈើទាល កាលពីថ្ងៃទី១៦ មេសា ២០១៥។ ក្រោយទទួលបានពាក្យរបស់ប្រជាពលរដ្ឋជុំវិញការបាត់ទ្រព្យ និងសម្ភារ ខណៈកំពុងលេងទឹកសមុទ្រនៅឆ្នេរអូរឈើទាលនោះ ស្នងការនគរបាលខេត្តលោកឧត្តមសេនីយ៍ ជួន ណរិន្ទ បានបញ្ជាឲ្យនគរបាលជំនាញ និងនគរបាលមូលដ្ឋានចុះទៅធ្វើការស្រាវជ្រាវជាបន្ទាន់ រហូតចាប់បានជនសង្ស័យទាំង៦នាក់តែម្តង។ មុខសញ្ញាសង្ស័យទាំង៦នាក់ រួមមាន ១-ឈ្មោះប្រុស ដារី ភេទស្រី អាយុ១៦ឆ្នាំ ២-ឈ្មោះម៉ៅ រី ភេទស្រី អាយុ១៥ឆ្នាំ ៣-ឈ្មោះសេង ជួច ភេទស្រី អាយុ១៣ឆ្នាំ ៤-ឈ្មោះហង្ស ស្រីនិច ភេទស្រី អាយុ១៣ឆ្នាំ ៥-ឈ្មោះទី ធីតា ភេទស្រី អាយុ១៣ឆ្នាំ និង៦-ឈ្មោះស្វាយ ថន ភេទស្រី អាយុ៤៧ឆ្នាំ ជាអ្នកទួលផលចោរកម្ម។
ក្រោយការចាប់ខ្លួនមុខសញ្ញាទាំងនេះ សមត្ថកិច្ចបានដកហូតវត្ថុតាង រួមមាន កាបូបយួរដៃពណ៌ក្រហមចំនួន០១ កូនសោររថយន្តចំនួន០១, ទូរស័ព្ទចំនួន០១គ្រឿង និងលុយចំនួន៥០ដុល្លារ ។
លោកអនុសេនីយ៍ទោបន្តថា ដោយពិនិត្យលើនីតិវិធីក្នុងការអនុវត្តជំនាញ លោកឧត្តម សេនីយ៍ស្នងការនគរបាលខេត្តបានពិភាក្សារជាមួយនឹងស្ថាប័នតុលាការ ហើយក៏សំរេចឃាត់ខ្លួនមុខសញ្ញាសង្ស័យចំនួន៣នាក់ ដើម្បីបញ្ជូនទៅសាលាដំបូង ដើម្បីចាត់ការតាមនីតិវិធីមាន១-ឈ្មោះ ប្រុស ដារី ២-ឈ្មោះម៉ៅ រី និង៣-ឈ្មោះស្វាយ ថន ។ ឯជនសង្ស័យចំនួន៣នាក់ ជាអនីតិជន សមត្ថកិច្ចប្រគល់ឱ្យអាណាព្យាបាលធ្វើកាអប់រំកែប្រែ រីឯសម្ភារ និងវត្ថុតាងប្រគល់ឱ្យម្ចាស់ដើមវិញ៕
ចែករំលែកព័តមាននេះ