រាជធានីភ្នំពេញ ៖ បុរសម្នាក់ត្រូវបានកម្លាំងនគរបាលខណ្ឌទួលគោក ចាប់ខ្លួនកាលពីវេលាម៉ោង២យប់រំលងអធ្រាត្រចូលថ្ងៃទី១៩ មេសា ២០១៥ នៅចំណុចផ្ទះហ្គេមមួយកន្លែងតាមផ្លូវលេខ២២៣ ក្នុងសង្កាត់ផ្សារដើមគរ បន្ទាប់ពីធ្វើសកម្មភាពគាស់ផ្ទះយកម៉ូតូម៉ាកសេ១០០ កូរ៉េ ពណ៌ក្រហម មួយគ្រឿង ពីសង្កាត់ទឹកល្អក់ទី៣ ខណ្ឌទួលគោក បានតែ៣ថ្ងៃ។
ជនសង្ស័យដែលត្រូវចាប់ខ្លួនឈ្មោះជុំ ធឿន អាយុ២៥ឆ្នាំ មានលំនៅស្នាក់នៅតាមសំយាបផ្ទះគេតាមផ្លូវលេខ២២៣ សង្កាត់ផ្សារដើមគរ ខណ្ឌទួលគោក និងមានស្រុកកំណើតភូមិសំបួរ ឃុំពាមរ ស្រុកពាមជរ ខេត្តព្រៃវែង។
តាមនគរបាលខណ្ឌទួលគោកបានឱ្យដឹងថា កាលពីវេលាម៉ោង២រំលងអធ្រាត្រចូលថ្ងៃទី១៦ មេសា ២០១៥ ជនសង្ស័យមានគ្នាតែម្នាក់ឯង បានធ្វើសកម្មភាពគាស់ផ្ទះលេខ២៨ ផ្លូវលេខ១៩២ សង្កាត់ទឹកល្អក់ទី៣ ខណ្ឌទួលគោក ខណៈពេលដែលម្ចាស់ឈ្មោះឡេង ស្រ៊ុន ភេទប្រុស អាយុ៣៤ឆ្នាំ ចាក់សោរផ្ទះធ្វើដំណើរទៅលេងស្រុកស្រីសន្ធរ ខេត្តកំពង់ចាម។នៅក្នុងសកម្មភាពជនសង្ស័យគាស់យកម៉ូតូធុនសេ១០០កូរ៉េ ពណ៌ក្រហម មួយគ្រឿង បានសម្រេចរួចជិះយកទៅលាក់ទុកនៅផ្ទះហ្គេម ក្នុងសង្កាត់ផ្សារដើមគររួចគេចខ្លួនបាត់ ។ ដោយមានការស្រាវជ្រាវពីកម្លាំងនគរបាលខណ្ឌទួលគោក ក៍កំណត់មុខសញ្ញាឈានទៅដកហូតបានម៉ូតូនោះត្រឡប់មកវិញ ប្រមាណជាង១ម៉ោងក្រោយមក។ លុះនៅវេលារំលងអធ្រាត្រចូលថ្ងៃទី១៩ មេសា ២០១៥ ជនសង្ស័យក៏បានវិលត្រឡប់ចូលទៅកន្លែងហ្គេមក៏ត្រូវឃាត់ខ្លួនបានតែម្តង។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ