ខេត្តបន្ទាយមានជ័យ ៖ នាឱកាសបុណ្យចូលឆ្នាំថ្មី ប្រពៃណីជាតិ គិតពីថ្ងៃទី១៣ដល់១៦ មេសា ២០១៥ គ្រោះថ្នាក់ចរាចរណ៍ទូទាំងខេត្តបានកើតឡើងចំនួន៤ករណី គឺជាប្រភេទធ្ងន់ បណ្តាលឲ្យមនុស្សស្លា.ប់ចំនួន៣នាក់ របួសធ្ងន់ចំនួន៣នាក់
ខេត្តបន្ទាយមានជ័យ ៖ នាឱកាសបុណ្យចូលឆ្នាំថ្មី ប្រពៃណីជាតិ គិតពីថ្ងៃទី១៣ដល់១៦ មេសា ២០១៥ គ្រោះថ្នាក់ចរាចរណ៍ទូទាំងខេត្តបានកើតឡើងចំនួន៤ករណី គឺជាប្រភេទធ្ងន់ បណ្តាលឲ្យមនុស្សស្លាប់ចំនួន៣នាក់ របួសធ្ងន់ចំនួន៣នាក់និងស្រាលចំនួន២នាក់ នេះបើតាមយោងតាមរបាយការណ៍របស់ការិយាល័យនគរបាលចរាចរណ៍ជើងគោកខេត្ត ដែលទទួលបាននៅថ្ងៃទី១៧ មេសា ២០១៥។
របាយការណ៍បានបង្ហាញទៀតថា គ្រោះថ្នាក់ដែលកើតឡើងមាននៅក្រុងសិរីសោភ័ណ១ករណី បណ្តាលឲ្យរបួសធ្ងន់ម្នាក់ , ស្រុកម៉ាឡៃ១ករណីស្លាប់មនុស្សចំនួន២នាក់ ស្រី១នាក់, ស្រុកព្រះនេត្រព្រះ ១ករណីស្លាប់មនុស្សស្រី១នាក់ និងស្រុកមង្គលបូរី១ករណី របួសធ្ងន់មនុស្សចំនួន២នាក់ ស្រី១នាក់ និងរបួសស្រាលចំនួន២នាក់។
បើប្រៀបធៀបករណីគ្រោះថ្នាក់ចរាចរណ៍កើតឡើងនៅឱកាសបុណ្យចូលឆ្នាំថ្មីប្រពៃណីជាតិខ្មែរនាឆ្នាំ២០១៤ គ្រោះថ្នាក់ចរាចរណ៍កើតឡើង១៨ករណី ដូច្នេះឃើញថាឆ្នាំនេះ មានការថយចុះចំនួន១៤ករណី ស្មើនឹង៧៨% , គ្រោះថ្នាក់ប្រភេទធ្ងន់ថយចុះ១១ករណីស្មើនឹង៧៣% មនុស្សរងរបួសធ្ងន់២៥នាក់ ថយចុះ២២នាក់ស្មើ៨៨%, គ្រោះថ្នាក់ប្រភេទស្រាល៤ករណី ស្មើនឹង១០០% របួសមនុស្សចំនួន១៧នាក់ ថយចុះ១៥នាក់ស្មើ៨៨% , ស្លាប់មនុស្ស៤នាក់ថយចុះ១នាក់២៥%។
ផ្នែកសម្ភារ ម៉ូតូខូចធ្ងន់៣គ្រឿងលើ១២គ្រឿង ថយចុះ៩គ្រឿងស្មើ៧៥%, ស្រាល៣គ្រឿងលើ៧គ្រឿងថយចុះ៤គ្រឿងស្មើ៥៧%, រថយន្តតូចខូចធ្ងន់២គ្រឿងលើ៤គ្រឿង ថយចុះ២គ្រឿងស្មើ៥០%។ លោកវរសេនីយ៍ត្រីសន គឺមសួគ៌ បានបញ្ជាក់ថា គ្រោះថ្នាក់ចរាចរណ៍កើតឡើង មានម៉ូតូបុកជាមួយម៉ូតូ, ម៉ូតូបុកជាមួយរថយន្តតូច, ម៉ូតូបុកជាមួយគោយន្តកន្ត្រៃ និងម៉ូតូបុកជាមួយម៉ូតូ និងរថយន្តតូច ។ ចំពោះមូលហេតុដែលបង្កឲ្យមានគ្រោះនេះ គឺបត់ឆ្វេងមិនប្រយ័ត្ន១ករណី, ប្រជែងក្នុងស្ថានភាពគ្រោះថ្នាក់មាន២ករណី និងផ្សេងៗ១ករណី៕
ចែករំលែកព័តមាននេះ