ខេត្តព្រះសីហនុ ៖ មនុស្សម្នាក់បានស្លាប់ភ្លាមៗនៅនឹងកន្លែងកើតហេតុ ម្នាក់ទៀតរបួសធ្ងន់ និង៣នាក់របួសស្រាលក្នុងហេតុការណ៍គ្រោះថ្នាក់ចរាចរណ៍មួយដែលកើតឡើងរវាងម៉ូតូ និងម៉ូតូ និងរថយន្តសាំងយ៉ុង១គ្រឿង ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៩ និង៣០នាទីព្រឹកថ្ងៃទី១៩ ខែមេសា ឆ្នាំ២០១៥ តាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៧២ និង១៧៣ ក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ ។
តាមប្រភពពីសមត្ថកិច្ចស្រុកព្រៃនប់បានឱ្យដឹងថា គ្រោះថ្នាក់ចរាចរណ៍ខាងលើកើតឡើងរវាងម៉ូតូ២គ្រឿង និងរថយន្ត១គ្រឿង ដោយដំបូងមានម៉ូតូ១គ្រឿងម៉ាកវ៉េវឆ្លាម គ្មានស្លាកលេខ ជិះគ្នា២នាក់បានបើកពីមុខម៉ូតូ១គ្រឿងទៀតម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ព្រះសីហនុ 1B-9925 ជិះគ្នា៣នាក់ ក្នុងទិសដៅស្របគ្នាពីត្បូងទៅជើង (ខេត្តព្រះសីហនុមកភ្នំពេញ) លុះដល់កន្លែងកើតហេតុម៉ូតូម៉ាកហុងដាឌ្រីម សេ១២៥ បានបើកទៅបុកគូម៉ូតូវ៉េវ បណ្តាលឱ្យម៉ូតូទាំង២ដួល រីឯមនុស្សក៏ធ្លាក់ចេញពីម៉ូតូរៀងៗខ្លួន ។
ប្រភពដដែលបានបន្តទៀតថា ខណៈពេលដែលម៉ូតូទាំង២គ្រឿងដួលនោះ ក៏មានរថយន្តសាំងយ៉ុង១គ្រឿង ពណ៌ស ពាក់ស្លាកលេខ ភ្នំពេញ 2M-6306 បើកក្នុងទិសដៅស្របគ្នាមកដល់ហើយកិនស្ត្រីម្នាក់ស្លាប់នៅនឹងកន្លែងកើតហេតុ ហើយអូសម៉ូតូហុងដាឌ្រីម សេ១២៥ ទៅជាមួយប្រមាណជា១០០ម៉ែត្រ ។
សមត្ថកិច្ចបានឱ្យដឹងទៀតថា គ្រោះថ្នាក់ចរាចរណ៍នេះបណ្តាលឱ្យ ១-ឈ្មោះណុប ស្រីអូន ភេទស្រី អាយុ២៣ឆ្នាំ មុខរបរកសិករ ជាអ្នកបើកម៉ូតូសេ១២៥ មានទីលំនៅភូមិត្រពាំងមូល ឃុំជើងគោ ស្រុកព្រៃនប់ រងរបួសធ្ងន់ ។ ២-ឈ្មោះខាត់ ណាង ភេទស្រី អាយុ១៦ឆ្នាំ មានទីលំនៅភូមិអុង ឃុំរាម ស្រុកព្រៃនប់ ជាអ្នករួមដំណើរជាមួយម៉ូតូសេ១២៥ ស្លាប់នៅនឹងកន្លែងកើតហេតុ ។ ៣-ឈ្មោះហា ប៉ិច ភេទស្រី អាយុ១៥ឆ្នាំ មានទីលំនៅភូមិត្រពាំងមូល ឃុំជើងគោក ស្រុកព្រៃនប់ ជាអ្នករួមដំណើរជាមួយម៉ូតូសេ១២៥ រងរបួសស្រាល ។ ៤-ឈ្មោះអ៊ុយ ចាន់ណា ភេទស្រី អាយុ១៨ឆ្នាំ ជាសិស្ស ជាអ្នកបើកម៉ូតូវ៉េវឆ្លាម មានទីលំនៅភូមិត្រពាំងមូល ឃុំជើងគោ ស្រុកព្រៃនប់ រងរបួសស្រាល និង៥-ឈ្មោះអ៊ុយ ចាន់ណី ភេទស្រី អាយុ១៥ឆ្នាំ ត្រូវជាប្អូន រងរបួស្រាល ។ ចំណែកឯអ្នកបើកបររថយន្តបានរត់គេចខ្លួនបាត់ ៕
ចែករំលែកព័តមាននេះ