ខេត្តព្រះវិហារ ៖ បុរស៤នាក់ត្រូវសមត្ថកិច្ចឃាត់ខ្លួនបញ្ជូនទៅកាន់ស្នងការដ្ឋានខេត្តព្រះវិហារ ពីបទរំលោ.ភសេពសន្ថវៈទៅលើស្ត្រីមេម៉ាយកូនមួយក្នុងថ្ងៃចូលឆ្នាំខ្មែរថ្ងៃទី២ ឋិតក្នុងភូមិស្ទឹង ឃុំរអាង ស្រុកសង្គមថ្មី ខេត្តព្រះវិហារ ។
ខេត្តព្រះវិហារ ៖ បុរស៤នាក់ត្រូវសមត្ថកិច្ចឃាត់ខ្លួនបញ្ជូនទៅកាន់ស្នងការដ្ឋានខេត្តព្រះវិហារ ពីបទរំលោភសេពសន្ថវៈទៅលើស្ត្រីមេម៉ាយកូនមួយក្នុងថ្ងៃចូលឆ្នាំខ្មែរថ្ងៃទី២ ឋិតក្នុងភូមិស្ទឹង ឃុំរអាង ស្រុកសង្គមថ្មី ខេត្តព្រះវិហារ ។
តាមការបញ្ជាក់ឲ្យដឹងពីលោកអនុសេនីយ៍ឯកវ៉ាន់ ណារ៉េត អធិការរងនគរបាលស្រុកសង្គមថ្មីកាលពីរសៀលថ្ងៃទី១៨ ខែមេសា ឆ្នាំ២០១៥នេះថា ដោយយោងតាមពាក្យបណ្តឹងរបស់ឈ្មោះឈួន សុខណាន ភេទប្រុស អាយុ៣១ឆ្នាំ ត្រូវជាបងថ្លៃស្ត្រីរងគ្រោះឈ្មោះសូត តម អាយុ២០ឆ្នាំ មុខរបរជាកម្មករស៊ីឈ្នួលធ្វើចម្ការ រស់នៅភូមិស្ទឹង ឃុំរអាង ស្រុកសង្គមថ្មី បានប្តឹងសមត្ថកិច្ចឲ្យឃាត់ខ្លួន ជនសង្ស័យ៤នាក់ ទី១-ឈ្មោះប៉ុង រី អាយុ១៦ឆ្នាំ ទី២-ឈ្មោះហេង ចាន់ហុង អាយុ២៥ឆ្នាំ ទី៣-ឈ្មោះគង់ ម៉ូត អាយុ២៨ឆ្នាំ និងទី៤-ឈ្មោះនឿន វ៉ាន់ថៃ អាយុ២៥ឆ្នាំ ទាំង៤នាក់នេះរស់នៅភូមិស្ទឹង ឃុំរអាង ស្រុកសង្គមថ្មី ព្រោះជនសង្ស័យទាំង៤នាក់ខាងលើបានចាប់បង្ខំប្អូនថ្លៃរបស់ខ្លួនរំលោភ ខណៈដែលប្អូនស្រីរបស់ខ្លួនបានចុះពីលើផ្ទះទៅបន្ទោបង់នៅព្រៃក្បែរផ្ទះកាលពីវេលាម៉ោង៧ និង៣០នាទីយប់ ថ្ងៃទី១៥ ខែមេសា ឆ្នាំ២០១៥ ។
បងថ្លៃស្ត្រីរងគ្រោះបានឱ្យសមត្ថកិច្ចដឹងទៀតថា ដំបូងមានជនសង្ស័យ២នាក់បានចាប់ប្អូនថ្លៃរបស់ខ្លួនរំលោភរហូតបានសម្រេច បន្ទាប់មកបក្សពួកជនសង្ស័យ២នាក់ទៀតក៏បានមកដល់ និងបានបង្ខំប្អូនរបស់ខ្លួនរំលោភទៀត ក្រោយពីរំលោភបានសម្រេច ជនសង្ស័យទាំង៤នាក់បានគេចខ្លួនបាត់ទៅ ។
លោកអធិការរងនគរបាលស្រុកសង្គមថ្មីបន្តថា ក្រោយពីទទួលបានបណ្តឹងភ្លាម សមត្ថកិច្ចបានចំណាត់ការភ្លាមៗ ឃាត់ខ្លួនជនសង្ស័យបាន៣នាក់ក្នុងថ្ងៃទី១៦ ខែមេសា និងឃាត់ខ្លួនបានម្នាក់ទៀតនៅថ្ងៃទី១៧ ខែមេសា រួចក៏បានបញ្ជូនមកកាន់ស្នងការដ្ឋានខេត្តព្រះវិហារ ដើម្បីចាត់ការតាមផ្លូវច្បាប់ ។
តាមចម្លើយសារភាពរបស់ជនសង្ស័យទាំង៤នាក់ខាងលើនៅចំពោះមុខសមត្ថកិច្ចថា ខ្លួនទាំង៤នាក់ពិតជាបានចាប់រំលោភស្ត្រីឈ្មោះសូត តម ពិតប្រាកដមែន ខណៈពេលដែលស្រី្តខាងលើដើរទៅបត់ជើងធំក្បែរផ្ទះខ្លួន ។
សូមបញ្ជាក់ផងដែរតាមការបញ្ជាក់ឲ្យដឹងពីសមត្ថកិច្ចថា ជនសង្ស័យឈ្មោះប៉ុង រី និងឈ្មោះនឿន វ៉ាន់ថៃ ជាមុខសញ្ញាដែលធ្លាប់ជាប់ពន្ធនាគារពីបទបង្កហិង្សាដោយចេតនាផងដែរ ។
រហូតមកដល់ពេលនេះជនសង្ស័យទាំង៤នាក់ត្រូវបានសមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្តព្រះវិហារ ដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ