ខេត្តកែប ៖ ក្មេងស្រីពីរនាក់បានស្លាប់ និងម្នាក់ទៀតរងរបួសត្រូវបានគេដឹកទៅសង្គ្រោះភ្លាមៗនៅមន្ទីរពេទ្យបង្អែកខេត្ត បន្ទាប់ពីក្មេងស្រីទាំង៣នាក់ជិះម៉ូតូឌុបគ្នាលើផ្លូវជាតិលេខ33 ហើយត្រូវរថយន្តម៉ាកហ្ស៊ីបបុកពីក្រោយក្នុងទិសដៅស្របគ្នា។ ហេតុការណ៍នេះបានកើតឡើងកាលពីវេលាម៉ោង១០ និង៣០នាទីព្រឹក ថ្ងៃទី១៧ មេសា នៅចំណុចភូមិអូក្រសារ សង្កាត់អូក្រសារ ក្រុងកែប ។
ប្រភពព័ត៌មានពីលោកឧត្តមសេនីយ៍ត្រី អ៊ីង សំអុល ស្នងការខេត្តបានឲ្យដឹងថា ក្រោយកើតហេតុ អ្នកបើកបររថយន្តបានចុះរត់គេចខ្លួនបាត់បន្សល់ទុករថយន្ត និងម៉ូតូជនរងគ្រោះនៅកន្លែងកើតហេតុ ហើយត្រូវបានកំលាំងសមត្ថកិច្ចចរាចរណ៍ខេត្តនាំទៅរក្សាទុកដើម្បីដោះស្រាយតាមច្បាប់ ។ ចំណែកសាសពក្មេងស្រីទាំងពីរនាក់សមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសត្រូវបានដឹកទៅសង្គ្រោះនៅមន្ទីពេទ្យបង្អែកខេត្ត ។
សមត្ថកិច្ចចរាចរណ៍ខេត្តបានឲ្យដឹងថា សពក្មេងស្រីទាំងពីរមានឈ្មោះហៀវ សាវរិ អាយុ ១៥ឆ្នាំ និងឈ្មោះ ថាវ ស្រីលីម អាយុ១៨ឆ្នាំ មានទីលំនៅភូមិដំណក់ចំបក់ សង្កាត់អូក្រសារ ក្រុងកែប ។ ចំណែកអ្នករងរបួសមិនបានស្រង់ឈ្មោះមានទីលំនៅភូមិ សង្កាត់ជាមួយគ្នាខាងលើ ។
ប្រភពពីមន្ត្រីសាលាខេត្តម្នាក់បានឲ្យដឹងថា នៅរសៀលថ្ងៃដដែល(17/4/2015) លោកកែន សត្ថា អភិបាលនៃគណៈអភិបាលខេត្ត រួមនិងប្រធានសាខាកាកបាទក្រហមខេត្តបាននាំយកអំណោយជាសម្ភារមួយចំនួន និងថវិកាឧបត្ថម្ភដល់គ្រួសារសព ក្នុងមួយគ្រួសារ១.៨០០.០០០រៀល(មួយលានប៉ែតសិបម៉ឺនរៀល) ដើម្បីរៀបចំធ្វើបុណ្យតាមប្រពៃណី៕
ចែករំលែកព័តមាននេះ