ខេត្តពោធិ៍សាត់ ៖ ក្នុងឧិកាសបុណ្យចូលឆ្នាំថ្មី២០១៥នេះ បន្ទាប់ពីទៅវត្តធ្វើកិច្ចតាមទំនៀមទំលាប់ប្រពៃណីព្រះពុទ្ធសាសនារួចមក បងប្អូនប្រជាពលរដ្ឋខ្លះជួបជុំបងប្អូនក្រុមគ្រួសារសប្បាយតាមផ្ទះ និងខ្លះទៀតនាំគ្នាដើរលេងសប្បាយតាមរមណីយដ្ឋាននានាដែលមាននៅក្នុងខេត្តពោធិ៍សាត់ដោយមធ្យោបាយម៉ូតូ និងរថយន្ត។
តាមរបាយការណ៍ពីស្នងការដ្ឋាននគរបាលខេត្តពោធិ៍សាត់ដែលផ្ដល់ដោយលោកវរសេនីយ៍ទោរស់ ចំរើន ប្រធានការិយាល័យនគរបាលចរាចរណ៍ផ្លូវគោកខេត្តឲ្យដឹងថា រយៈពេល០៣ថ្ងៃ គឺថ្ងៃទី១៤, ១៥ និង១៦ មេសា ២០១៥ ក្នុងឧិកាសបុណ្យចូលឆ្នាំថ្មីប្រពៃណីជាតិខ្មែរនេះនៅខេត្តពោធិ៍សាត់មានគ្រោះថ្នាក់ចរាចរណ៍កើតឡើង០៧ករណី បណ្ដាលឲ្យមនុស្សរងរបួសធ្ងន់០៦នាក់ ស្រី០៣នាក់ និងរបួសស្រាល០៨នាក់ ប្រុសទាំងអស់សរុប១៤នាក់ ប៉ុន្តែសំណាងល្អពុំមានអ្នកស្លាប់នោះទេ។
លោកបន្តទៀតថា នៅស្រុកភ្នំក្រវាញកើតឡើង០២ករណី, ស្រុកក្រគរ០២ករណី, ស្រុកវាលវែង០១ករណី, ក្រុងពោធិ៍សាត់០១ករណី និងស្រុកបាកាន០១ករណី។ គ្រោះថ្នាក់ចរាចរណ៍ទាំងអស់នេះបណ្ដាលមកពីប្រើប្រាស់ល្បឿនលឿន០២ករណី, ជែងគ្នា០៣ករណី, បើកបរមិនប្រកាន់ស្ដាំ០១ករណី និងកត្តាផ្លូវ០១ករណី ដែលភាគច្រើនបង្កឡើងដោយរថយន្តជាមួយរថយន្ត, ម៉ូតូជាមួយម៉ូតូ, ម៉ូតូជាមួយរថយន្ត និងគោយន្តបុកផ្ទះប្រជាពលរដ្ឋ។
លោករស់ ចំរើន ឲ្យដឹងដែរថា ចូលឆ្នាំ២០១៥នេះ គ្រោះថ្នាក់ចរាចរណ៍នៅខេត្តពោធិ៍សាត់មានការថយចុះចំនួន០២ករណី បើប្រៀបធៀបទៅនឹងឆ្នាំ២០១៤ មាន០៩ករណី និងមានមនុស្សស្លាប់០១នាក់ផងដែរ៕
ចែករំលែកព័តមាននេះ