រាជធានីភ្នំពេញ ៖ ក្មេងស្រីអាយុ៦ឆ្នាំម្នាក់ បានស្លាប់យ៉ាងអាណោចអាធ័ម បន្ទាប់ពីត្រូវមិត្តភក្តិរបស់ឪពុក បានមកផឹកស៊ីនៅក្នុងផ្ទះ រហូតដល់ស្រវឹងយកកាំភ្លើងបាញ់គំរាមសង្សារ ខណៈឈ្លោះប្រកែកគ្នា ហើយគ្រាប់កាំភ្លើងបានផ្លាតចំក្មេងស្រីដែលជាកូនរបស់ម្ចាស់ផ្ទះតែម្តង ហេតុការណ៍នេះកើតឡើងកាលពីវេលាម៉ោង០៤ និង៤០នាទីរសៀល ថ្ងៃទី១៧ មករា ២០១៥ ស្ថិតនៅសង្កាត់កាកាប ខណ្ឌពោធិ៍សែនជ័យ ។
ប្រភពបានឱ្យដឹងថា ក្មេងស្រីរងគ្រោះមានឈ្មោះហ៊ឹម វណ្ណនីទៀង អាយុ៦ឆ្នាំ ។ ចំណែកជនដៃដល់ឈ្មោះឡាយ ជាមន្ត្រីប៉េអឹមម្នាក់ ។
ប្រភពបន្តថា មុនពេលកើតហេតុ ឪពុកម្តាយក្មេងស្រីរងគ្រោះ និងជនដៃដល់ជាមួយសង្សារបានអង្គុយផឹកស៊ីជុំគ្នា នៅក្នុងផ្ទះ បានប្រហែលជាង១ម៉ោង ស្រាប់តែជនបង្កមានជម្លោះជាមួយសង្សាររបស់ខ្លួនយ៉ាងខ្លាំង រហូតដល់បុរសជាមន្ត្រីប៉េអឹមបានដកកាំភ្លើងបាញ់គំរាម តែអកុសលគ្រាប់កាំភ្លើងនោះ ក៏ផ្លាតចំកណ្តាលដើមទ្រូងក្មេងស្រីរងគ្រោះស្លាប់តែម្តង ។
ប្រភពបានបន្តទៀតថា ក្រោយពីកើតហេតុ ជនបង្កត្រូវបានសមត្ថកិច្ចឃាត់ខ្លួន បន្ទាប់ពីឪពុកម្តាយរបស់ក្មេងស្រីរងគ្រោះទៅដាក់ពាក្យបណ្តឹង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ