រាជធានីភ្នំពេញ ៖ បុរសម្នាក់និងស្ត្រីវ័យក្មេងម្នាក់បានឈ្លោះប្រកែក និងប្រតាយប្រតប់គ្នា នៅតាមទីសារធារណៈបង្កអោយមានការភ្ញាក់ផ្អើលយ៉ាងខ្លាំង ដល់មនុស្សម្នាមកចោមរោមមើល ដោយសារតែធានាគេ រឿងជំពាក់លុយចំនួន១ពាន់ដុល្លារ ហើយអ្នកខ្ចីព្យាយាមគេចខ្លួនមិនព្រមសងនោះ ត្រូវវ័ណ្ឌ.កស្រ្តីអ្នកធានា ។ ករណីប្រតាយប្រតប់គ្នានេះ បានបង្កការភ្ញាក់ផ្អើលឡើងកាលពីម៉ោង៥ល្ងាច ថ្ងៃទី១៤ ខែមេសា ឆ្នាំ២០១៥ នៅចំណុចខាងមុខផ្ទះលេខ៧៩៧ ផ្លូវព្រះមុនីវង្ស កែងនឹង ផ្លូវលេខ៤៨៨ ក្នុងសង្កាត់បឹងត្របែក ខណ្ឌចំការមន ។
តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា ការឈ្លោះប្រកែកគ្នាដែលឈានទៅដល់ការប្រតាយប្រតប់គ្នាបង្កអោយមានការភ្ញាក់ផ្អើលដល់គេឯងនៅតាមទីសារធារណៈនេះ គឺរវាងបុរសម្នាក់ឈ្មោះហ៊ុយ តារា ហៅស្រស់ អាយុ២៩ឆ្នាំ ជាអ្នកអោយលុយគេខ្ចី និងស្ត្រីវ័យក្មេងម្នាក់ឈ្មោះ យូគីម ធីតា អាយុ២៨ឆ្នាំ ជាអ្នកដែលធានាឱ្យគេមកខ្ចីលុយ ។ មុនពេលកើតហេតុស្ត្រីវ័យក្មេងខាងលើបានជិះរថយន្តបាឡែន ពណ៌ទឹកប្រាក់ គ្មានស្លាកលេខ មួយគ្រឿងតែម្នាក់ឯង ក្នុងទិសដៅពីត្បូងទៅជើងតាមបណ្តោយផ្លូវព្រះមុនីវង្ស លុះដល់ចំណុតកើតហេតុ ក៏បានបើកបត់ឆ្វេងទៅទិសខាងលិចតាមបណ្តោយផ្លូវលេខ៤៨៨ បានតែបន្តិចក៏មានរថយន្តមួយម៉ាកវិស្តូ ព៌ណលឿង ពាក់ស្លាកលេខភ្នំពេញ២X-២០៥៥ មួយគ្រឿងជិះគ្នា៤នាក់ (ប្រុស៣នាក់ ស្រីម្នាក់) បានបើកមកស្ទាក់មុខ ។
តាមប្រភពដដែលបានប្រាប់បន្តទៀតថា ពេលដែលមានរថយន្តមួយគ្រឿងបើកមកឈប់ពីមុខរថយន្តរបស់ខ្លួនរួចហើយ ភ្លាមនោះស្ត្រីវ័យក្មេងរូបនោះ ក៏បានបើកកញ្ចក់រថយន្តរបស់ខ្លួន ហើយក៏ត្រូវបុរសម្នាក់ឈ្មោះហ៊ុយ តារា ហៅស្រស់ និងបក្សពួកនោះ ស្ទុះចេញមកក្របួចសក់នាងជាប់ ដោយប្រតាយប្រតប់គ្នា និងយកទូរស័ព្ទដៃម៉ាក iPhon6 plus មួយគ្រឿង ពីនាងទៅបាត់ផងដែរ ។
ពេលដែលភាគីទាំងពីរកំពុងតែឈ្លោះប្រកែក និងប្រតាយប្រតប់គ្នា កម្លាំងនគរបាលប៉ុស្តិ៍ ក៏បានចុះមកធ្វើអន្តរាគមន៍ នឹងនាំពួកគេទាំងពីនាក់ ទៅធ្វើការសម្របសម្រួលគ្នា នៅឯប៉ុស្តិ៍នគរបាលបឹងត្របែកផងដែរ ។
ក្រោយពីកម្លាំងនគរបាលនាំខ្លួនគូជម្លោះទាំងពីរនាក់ ទៅដល់ប៉ុស្តិ៍រួចហើយ ទើបបានដឹងថា ជម្លោះខាងលើនេះ គឺកើតឡើងដោយសារតែ កន្លងមកស្ត្រីវ័យក្មេងខាងលើ ធ្លាប់បានធ្វើជាអ្នកធានាអោយស្ត្រីម្នាក់ទៀត ទៅខ្ចីលុយគេ ចំនួន១ពាន់ដុល្លារ ដោយបុរសខាងលើជាអ្នកអោយខ្ចី ។ ក្រោយពីខ្ចីលុយបានហើយ សងមិនទាន់គ្រប់ផង ស្ត្រីរូបនោះក៏បានគេចវេស មិនសងបង្គ្រប់ ទើបពេលនេះ មានជម្លោះកើតឡើង រវាងអ្នកទាំងពីរនាក់នៅតាមផ្លូវសាធារណៈបែបនេះទៅ ៕
ចែករំលែកព័តមាននេះ