ខេត្តបាត់ដំបង ៖ យុវជន៣នាក់ស្លាប់ និង៣នាក់ទៀតរងបួសធ្ងន់-ស្រាល ខណៈបើករថយន្តផឹកទឹកត្នោតជូរចាក់ធុងបាស់រាំលេងយ៉ាងសប្បាយក្នុងថ្ងៃបុណ្យចូលឆ្នាំ ក៏ជួបគ្រោះថ្នាក់ចរាចរណ៍បណ្តាលឱ្យក្រឡាប់រថយន្ត កាលពីរសៀលថ្ងៃទី១៥ មេសា ២០១៥ ស្ថិតនៅលើកំណាត់ផ្លូវជាតិលេខ៥ ត្រង់ចំណុចភូមិកកោះ ឃុំកកោះ ស្រុកមោងប្ញស្សី ។
ប្រភពបានឱ្យដឹងថា ជនរងគ្រោះដែលស្លាប់ ១-ឈ្មោះសំ ពេជ្រ អាយុ១៦ឆ្នាំ ២-ឈ្មោះប៉ែត ស្រូច អាយុ២៤ឆ្នាំ និង៣-ឈ្មោះតឿ
ខេង អាយុ២២ឆ្នាំ ចំណែក៣នាក់ទៀតដែលរបួសធ្ងន់-ស្រាល គេនៅមិនទាន់ស្គាល់ឈ្មោះទេ ដោយឡែកអ្នកបើកបរឈ្មោះភឿន
ហ៊ាញ អាយុ២៣ឆ្នាំ បានរត់គេចខ្លួននៅពេលជួបគ្រោះថ្នាក់ភ្លាម ។
សាក្សីដែលឃើញហេតុការណ៍បាននិយាយថា ដំបូងគេឃើញក្រុមជនរងគ្រោះបានជិះរថយន្តមកពីទិសខាងលិច ស្រែកហ៊ោកញ្ជ្រៀវរាំយ៉ាងសប្បាយនៅលើរថយន្តជាមួយនឹងសម្លេងធុងបាស់លាន់កងរំពងផង។ សាក្សីបន្តថា ពេលពួកអ្នកជិះកំពុងរាំលេងនៅលើរថយន្តបណ្ដើរ គេឃើញអ្នកកាន់ចង្កូតក៏ឆ្លៀតលើកដៃរាំម្ដងម្កាលជាមួយគេដែរ លុះដល់ចំណុចខាងលើ ក៏ស្រាប់តែរថយន្តពួកគេរេចង្កូតចេញពីផ្លូវក្រឡាប់ច្រើនត្រឡប់ចូលក្នុងស្រែ បណ្ដាលឱ្យមានអ្នកស្លាប់ និងរបួសធ្ងន់ធ្ងរតែម្ដង ។ សាក្សីបញ្ជាក់ថា អ្នកភូមិបានរត់ទៅជួយអន្តរាគមន៍ភ្លាមៗដែរ ហើយគេឃើញធុងបាស់ និងប៊ីដុងដាក់ទឹកត្នោតជូរធ្លាក់រប៉ាត់រប៉ាយពេញស្រែជាមួយជនរងគ្រោះ។
សមត្ថកិច្ចបាននិយាយដែរថា ក្រោយពេលកើតហេតុ កម្លាំងជំនាញក៏បានចុះទៅពិនិត្យនៅកន្លែងកើតហេតុភ្លាមៗដែរ ហើយបាននាំយករថយន្តបង្កគ្រោះថ្នាក់នេះ ទៅរក្សាទុកនៅអធិការដ្ឋាននគរបាលស្រុកមោងប្ញស្សី ដើម្បីរង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ