ខេត្តកំពង់ចាម ៖ ពិតជាគួរឲ្យសង្វេគណាស់ ដោយក្មេងស្រីឈ្មោះខុន ស៊ាងឡេង អាយុ២ឆ្នាំ ត្រូវបានក្រុមក្មេងទំនើងមួយក្រុមមានគ្នា៣នាក់ ចាក់លេច១ផ្លែដាវ ដោតជាប់នឹងដើមទ្រូង ធ្លាយពីម្ខាងទៅម្ខាង ដ៏ឃោរឃៅព្រៃ.ផ្សៃបំផុត ស្លា.ប់ក្នុងថ្លុកឈាម
ខេត្តកំពង់ចាម ៖ ពិតជាគួរឲ្យសង្វេគណាស់ ដោយក្មេងស្រីឈ្មោះខុន ស៊ាងឡេង អាយុ២ឆ្នាំ ត្រូវបានក្រុមក្មេងទំនើងមួយក្រុមមានគ្នា៣នាក់ ចាក់លេច១ផ្លែដាវ ដោតជាប់នឹងដើមទ្រូង ធ្លាយពីម្ខាងទៅម្ខាង ដ៏ឃោរឃៅព្រៃផ្សៃបំផុត ស្លាប់ក្នុងថ្លុកឈាម ។ ហេតុការណ៏នេះកើតឡើងនៅវេលាម៉ោង៧យប់ថ្ងៃទី១៤ មេសា ២០១៥ ស្ថិតនៅភូមិត្រពាំងកក់ ឃុំអូរស្វាយ ស្រុកកំពង់សៀម ដោយត្រូវបានសមត្ថកិច្ចស្រាវជ្រាវតាមប្រមាញ់ ចាប់ជនសង្ស័យបានចំនួន២នាក់ ជាមនុស្សញៀនថ្នាំផងដែរ ។
អ្នកស្រីសុខ សារុំ អាយុ៣៦ឆ្នាំ នៅភូមិឃុំកើតហេតុប្រាប់ឲ្យដឹងថា ដោយសារតែបាត់ប្អូនប្រុសឈ្មោះចាន់ យូរពេកមិនទាន់ឃើញត្រឡប់មកផ្ទះវិញនោះ រូបគាត់ និងក្មួយៗប្រុសស្រីមានគ្នា៧នាក់ បានដើរចេញពីផ្ទះទៅតាមរកប្អូន នៅផ្ទះផឹកស៊ី១កន្លែងរបស់ឈ្មោះ ស្រឿន ដែលមានចំងាយជាង១គីឡូម៉ែត្រ តែមិនបានឃើញនោះទេ នាព្រលប់ថ្ងៃទី១៤ មេសា ។
អ្នកស្រីប្រាប់បន្តថា ស្របពេលដែលកំពុងតែដើរនៅលើកំណាត់ផ្លូវលំក្រាលក្រួសក្រហម ត្រង់ម្តុំលូ នៅសល់ចំងាយប្រហែលជា១០០ម៉ែត្រ ដល់ភូមិនោះ ស្រាប់តែឃើញម៉ូតូ១គ្រឿង ជិះមកពីក្រោយ ប្រើប្រាស់ល្បឿនលឿន មានគ្នា៣នាក់ ពេលមកដល់កៀកនឹងក្រុមគាត់ ក៏មានជនមិនស្គាល់អត្តសញ្ញាណម្នាក់លើកដាវ ចាក់សំដៅលើឈ្មោះ សច្ចារ តែមិនត្រូវនោះទេ ដោយបានគេចទាន់ពេលវេលា ។ បែរជាទៅត្រូវក្មួយស្រីតូច អាយុ២ឆ្នាំ កំពុង តែពរនៅនឹងចង្កេះបងស្រីរបស់គេឈ្មោះ ស៊ាង ហាក់ អាយុ១១ឆ្នាំ ដោយបានផ្លោងខ្ទាតទៅទើរនឹងគម្ពោធព្រៃ ស្លាប់យ៉ាងខ្លោចផ្សារ ដាវដោតជាប់នៅក្រោមឃ្លៀកឆ្វេង ធ្លុះពីម្ខាងទៅម្ខាង ។ ចំណែកម៉ូតូរបស់ក្រុមឃាតករនោះ បានដួល បណ្តាលឲ្យរងការខូចខាត បន្តិចក្រោយមក ម្នាក់បានលើកម៉ូតូបញ្ឈរឡើងជិះបន្ដដំណើរ ទៅមុខ ចំណែកបក្សពួក២នាក់ទៀត បានរត់គេចខ្លួនតាមវាលស្រែ ទៅទិសខាងកើត ចូលក្នុងព្រៃគេចខ្លួនបាត់ ។
យុវជនឈ្មោះ មឿន សច្ចារ អាយុ១៨ឆ្នាំ ស្រុកកំណើតភូមិត្រពាំងកក់ ឃុំអូរស្វាយ ស្រុកកំពង់សៀម រស់នៅភូមិភូមិរំចេកប្រាប់ឲ្យដឹងថា ក្នុងពេលដែលដើរត្រឡប់មកពីរកបងឈ្មោះចាន់ វិញ មេឃរាងងងឹតផងនោះ បានឃើញម៉ូតូ១គ្រឿងជិះគ្នា៣នាក់ មកពីក្រោយ ដោយបានយារដៃលើកដាវប្រុងចាក់រូបគេ តែសំណាង បានប្រាសខ្លួនចូលទៅអែបចញ្ចើមថ្នល់ ក៏ផ្លែដាវនោះបានចាក់ត្រូវក្មួយស្រីរបស់គេ អាយុ២ឆ្នាំ ស្លាប់យ៉ាងសង្វេក ក្នុងចំណោមជនបង្កទាំង៣នាក់នោះមិនស្គាល់ម្នាក់ណានោះទេ មិនដឹងជាហេតុអីបានជាក្រុមនោះ មកតាមចាក់លើរូបគេទាំងមិនដឹងអ្វីសោះ ។
អ្នកស្រីស៊ាង ហ៊ត់ អាយុ៣០ឆ្នាំ ត្រូវជាម្តាយក្មេងស្រីដែលស្លាប់ខាងលើ ប្រាប់ឲ្យដឹងថា រាល់ថ្ងៃគាត់មានកូនចំនួន៤នាក់ក្នុងបន្ទុក ពេលមុនកើតហេតុកូនស្រីឈ្មោះ ស៊ាង ហាក់ អាយុ១១ឆ្នាំ ដែលពរប្អូនស្រីពៅ ឈ្មោះ ស៊ាង ឡេង ត្រូវបានក្រុមក្មេងទំនើង មកចាក់កូនស្រីគាត់ លេច១ផ្លែដាវ របូតចេញពីដៃបងស្រីរបស់គេ ស្លាប់ភ្លាមៗ ។ ទង្វើដ៏ឃោរឃៅនេះ សូមឲ្យសមត្ថកិច្ចតាមស្រាវជ្រាវ ចាប់ក្រុមឃាតករ មកផ្តន្ទាទោសឲ្យបានធ្ងន់ធ្ងរបំផុត នឹងព្រមទាំងបានទាមទារសំណងជំងឺចិត្ត ចំនួន១ម៉ឺនដុល្លារផងដែរ ។
លោកវរសេនីយ៏ត្រី ប៉ាក ជាតិ អធិការនគរបាលស្រុកកំពង់សៀម ប្រាប់ឲ្យដឹងដែរថា នៅពេលដែលមានហេតុការណ៏អំពើឃាតកម្មខាងលើ កម្លាំងប៉ុស្ត៏រដ្ឋបាលឃុំអូរស្វាយ បានរាយការណ៏មករូបលោក ក៏បានចុះទៅដល់កន្លែងកើតហេតុ ទាំងយប់ ថ្ងៃទី១៤ មេសា ២០១៥ ។ ជាមួយគ្នានោះ លោកឧត្តមសេ
នីយត្រី បែន រ័ត្ន ស្នងការនគរបាលខេត្ត ចាត់នគរបាលការិយាល័យបច្ចេកទេសខេត្ត ចុះមកពិនិត្យសពក្មេងទាំងយប់ផងដែរ ។ រហូតមកដល់ព្រឹកថ្ងៃទី១៥ មេសា បានឃាត់ជនសង្ស័យចំនួន២នាក់ ក្នុងនោះមាន១ ឈ្មោះ ស៊ន់ ផល ភេទប្រុស អាយុ១៩ឆ្នាំ នៅភូមិត្រពាំងកក់ ឃុំអូរស្វាយ ស្រុកកំពង់សៀម
ទី២ ឈ្មោះ ស្រ៊ុន ពិសី ហៅប៉ោង ភេទប្រុស អាយុ២៣ឆ្នាំ នៅភូមិរមូល ឃុំរអាង ស្រុកកំពង់សៀម បើតាមរយៈការធ្វើតេស្តទឹកនោមទាំង២នាក់ ជាមនុស្សញៀនថ្នាំ ត្រូវបាននាំខ្លួនមកកាន់អធិការដ្ឋានគរបាលស្រុកកំពង់សៀម សួរនាំ ។
សូមបញ្ជាក់ថា អង្គការ CPU របស់អូស្ត្រាលី នាព្រឹក ថ្ងៃទី១៥ មេសា បានចុះមកសហការជាមួយនឹងជំនាញបច្ចេកទេសខេត្ត ដោយបានប្រមូលស្បែកជើង១គូ ដែលជនសង្ស័យរបស់ក្រុមឃាតករ បន្សល់ទុកនៅកន្លែងកើតហេតុ ម្តុំលូទឹក ក្នុងភូមិត្រពាំងកក់ ឃុំអូរស្វាយ ស្រុកកំពង់សៀម ដើម្បីយកទៅពិនិត្យមើល
DNA ដែលមានឧបករណ៏បច្ចេកទេសខ្ពស់ អាចដឹងពីអត្តសញ្ញាណពួកឃាតករបាន ដូច្នេះពួកនោះទំនងជាមិនអាចរត់គេចពីសំណាញ់ច្បាប់បាននោះទេ ៕
ចែករំលែកព័តមាននេះ