ខេត្តបន្ទាយមានជ័យ ៖ អ្នកទោសស្ត្រីចំនួន៥នាក់ដែលមានកូនជាប់នឹងខ្លួនត្រូវបានព្រះមហាក្សត្រឡាយព្រះហស្តលើកលែងទោសមុនថ្ងៃបុណ្យចូលឆ្នាំខ្មែរប្រពៃណីជាតិ និងធ្វើពិធីដោះលែងនៅរសៀលថ្ងៃទី១២ មេសា ២០១៥ នៅពន្ធាគារខេត្តបន្ទាយមានជ័យ។
ពិធីដោះលែងអ្នកទោសស្ត្រីនេះធ្វើឡើងក្រោមអធិបតីភាពលោក នុត សាអាន រដ្ឋលេខាធិការក្រសួងមហាផ្ទៃ ដោយមានការអញ្ជើញចូលរួមពីលោកឧត្តមសេនីយ៍ទោ ហ៊ិន សុផល ប្រធានពន្ធាគារខេត្តបន្ទាយមានជ័យ លោក សួន បរវរ អភិបាលរងខេត្តបន្ទាយមានជ័យ និងមានការចូលរួមពីមន្ត្រីពន្ធាគារខេត្តបន្ទាយមានជ័យផងដែរ។
អ្នកទោសស្ត្រីដែលត្រូវបានដោះលែងទាំង៥នាក់នោះ ១-ឈ្មោះ ឡេវ ឡាន កើតឆ្នាំ១៩៩០ មានទីលំនៅគីឡូម៉ែត្រលេខ៤ សង្កាត់ផ្សាកណ្តាល ក្រុងប៉ោយប៉ែត ឃុំខ្លួនថ្ងៃទី០១ មករា ២០១៤ ត្រូវបានកាត់ទោសឱ្យជាប់ពន្ធនាគារ២ឆ្នាំពីបទចោរកម្ម ២-ឈ្មោះ ឈុំ ផល្លី (ហៅស្រីណែត) កើតឆ្នាំ១៩៨៣ រស់នៅភូមិ១ សង្កាត់ព្រះពន្លា ក្រុងសិរីសោភ័ណ ឃុំខ្លួនថ្ងៃទី០១ ឧសភា ២០១៤ ត្រូវបានកាត់ទោស៥ឆ្នាំ ពីបទជួញដូរសារធាតុញៀន ៣-ឈ្មោះ ហ៊ុន ចាន់ណា កើតឆ្នាំ១៩៨៨រស់នៅភូមិធ្លក ឃុំបន្ទាយឆ្មារ ស្រុកថ្មពួក ឃុំខ្លួនថ្ងៃទី២៦ ធ្នូ ២០១៣ ត្រូវបានកាត់ទោស២ឆ្នាំ ពីបទជួញដូរខុសច្បាប់សារធាតុញៀន ៤-ឈ្មោះ ភៀន រដ្ឋា កើតឆ្នាំ១៩៩៣ រស់នៅភូមិព្រៃទទឹង ឃុំអូរប្រសាទ ស្រុកមង្គលបូរី ឃុំខ្លួនថ្ងៃទី០២មករា២០១៥ ត្រូវបានកាត់ទោស៦ខែពីបទចោរកម្ម បច្ចុប្បន្នមានផ្ទៃពោះ និង៥-ឈ្មោះ ផេង សារ៉ាយ កើតឆ្នាំ១៩៨៥ រស់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ឃុំខ្លួនថ្ងៃទី០៣ ឧសភា ២០១៤ ត្រូវបានកាត់ទោស៤ឆ្នាំពីបទជួញដូរគ្រឿងញៀន៕
ចែករំលែកព័តមាននេះ