រាជធានីភ្នំពេញ ៖ ការនាំចូលសាច់ជ្រូកពីប្រទេសជិតខាងមកផ្គត់ផ្គង់លើទីផ្សារ មានចំនួនច្រើនពីមួយឆ្នាំទៅមួយឆ្នាំ ដែលជាហេតុធ្វើឲ្យក្រុមហ៊ុនក្នុងស្រុកមួយចំនួនប្រឈមនឹងបញ្ហា ដោយមិនអាចគ្រប់គ្រងតម្រូវការនៅលើទីផ្សាររបស់ខ្លួនបាន ដោយសារការនាំចូលជ្រូកពីក្រៅប្រទេសមានតម្លៃថោកជាង ។
លោក ប៉ូច សុរិទ្ធី អគ្គនាយក្រុមហ៊ុនគ្រីនហ្វីត បានឲ្យដឹងថា នៅដើមឆ្នាំថ្មី តម្រូវការ និងតម្លៃផលិតផលរបស់ក្រុមហ៊ុនបានធ្លាក់ចុះ ដោយសារតែជ្រូកដែលប្រជាជនចិញ្ចឹមបានលក់នៅលើទីផ្សារមានតម្លៃថោក ជាហេតុធ្វើឲ្យពួកគាត់ផ្អាកការចិញ្ចឹមជាបណ្ដោះអាសន្ន ទើបធ្វើឲ្យការលក់ចំណីជ្រូកធ្លាក់ចុះ ។ ម្យ៉ាងទៀតបញ្ហាធំបំផុតដោយសារតែការនាំជ្រូកចូលពីក្រៅស្រុកមានចំនួនច្រើនដែលធ្វើឲ្យប៉ះពាល់ដល់តម្លៃជ្រូកក្នុងស្រុក ។
លោកបញ្ជាក់ថា សព្វថ្ងៃក្រុមហ៊ុនមានសមត្ថភាពផលិតចំណីសត្វបានប្រមាណ២៥០តោនក្នុងមួយថ្ងៃ និងមានតម្លៃលក់ចេញជាមធ្យម៦៥០ដុល្លារក្នុងមួយតោន ។ ចំពោះទីផ្សារដែលយើងទទួលបានការកុម្មង់ចំណីសត្វច្រើនមានដូចជា ខេត្តកំពង់ស្ពឺ កំពង់ចាម បាត់ដំបង សៀមរាប កំពង់ធំ កណ្តាល តាកែវ និងខេត្តកំពត ជាដើម ។
ទាក់ទងនឹងតម្រូវការចំណីជ្រូក និងតម្លៃសាច់ជ្រូកនេះ លោករំពឹងថា នៅខែបន្ទាប់វានឹងកើនឡើងវិញដូចកាលពីឆ្នាំ២០១៤ មានន័យថា ក្នុងមួយឆ្នាំ វាតែងតែឡើងឬចុះទៅតាមតម្រូវការជាក់ស្តែងនៅលើទីផ្សារ ។ ដោយឡែកកាលពីឆ្នាំ២០១៤ ក្រុមហ៊ុនគ្រីនហ្វីត ផលិតចំណីសត្វបានប្រមាណ៧ម៉ឺនតោន ហើយនៅក្នុងឆ្នាំថ្មីនេះ ក្រុមហ៊ុនមានគម្រោងផលិតចំណីសត្វឲ្យបាន១០ម៉ឺនតោន កើនលើសឆ្នាំមុន៣០% ដោយពឹងផ្នែកលើចក្ខុវិស័យ និងយុទ្ធសាស្ត្ររបស់ខ្លួន ។
លោក ចាន់ សុធា អគ្គនាយក្រុមហ៊ុន ហ៊ុក ហៀង ចែកចាយសាច់ជ្រូកស្រស់ បានឲ្យដឹងថា នៅដើមឆ្នាំ២០១៥នេះ គិតពីខែមករា ដល់ខែមីនា សាច់ជ្រូកសុទ្ធមានតម្លៃប្រមាណ១៧.០០០រៀលក្នុង១គីឡូក្រាម បើធៀបបនឹងចុងឆ្នាំ២០១៤ មានតម្លៃប្រហែល១៩.០០០រៀលក្នុង១គីឡូក្រាម។ ការធ្លាក់ថ្លៃក្នុងរយៈពេលនេះ លោកយល់ថាដោយសារតែឈ្មួញនាំចូលជ្រូករស់ពីប្រទេសជិតខាងមានតម្លៃថោកជាងតម្លៃជ្រូកក្នុងស្រុក ។
លោកបន្តថា សព្វថ្ងៃក្រុមហ៊ុនផ្គត់ផ្គង់សាច់ជ្រូកស្រស់នៅលើទីផ្សារក្នុងរាជធានីបានប្រហែល៤តោនក្នុង១ថ្ងៃ ហើយក្រុមហ៊ុនមានជ្រូករស់ប្រហែល៧ពាន់ក្បាលក្នុងកសិដ្ឋានសម្រាប់ឆ្លើយតបទៅនឹងតម្រូវការនៅលើទីផ្សារ ។ នៅឆ្នាំថ្មីនេះ បើទោះបីជាតម្លៃសាច់ជ្រូកលក់នៅលើទីផ្សារធ្លាក់ចុះបន្តិចក្តី តែចំពោះក្រុមហ៊ុនរបស់លោកមានគម្រោងនឹងបង្កើនការផ្គត់ផ្គង់សាច់ជ្រូកនៅក្នុងរាជធានីឲ្យកើនឡើងប្រមាណ៨តោនក្នុង១ថ្ងៃ ។
បើតាមរបាយការណ៍កាំកុងត្រូលដែលផ្តល់ដោយក្រសួងពាណិជ្ជកម្មបានបង្ហាញថា កាលពីឆ្នាំ២០១៤ កម្ពុជានាំចូលជ្រូកមកពីប្រទេសថៃ និងវៀតណាមមានចំនួន៣.៩៨០តោន និង២៥.៨២៧ក្បាល (Unit) គិតជាទឹកប្រាក់មានប្រមាណ៤.៥៩៨.២៩៣ដុល្លារអាមេរិក បើធៀបរយៈពេលដូចគ្នាកាលពីឆ្នាំ២០១៣ មានទឹកប្រាក់ប្រមាណតែ២.៥៧៣.២២៥ដុល្លារ កើនឡើងប្រមាណ៧៨,៧០% ៕
ចែករំលែកព័តមាននេះ