ខេត្តសៀមរាប ៖ ខ្លោងទ្វារ «អង្គរសង្ក្រាន្ត» ឆ្នាំ២០១៥ ជារចនាបថថ្មីកំពុងត្រូវបានសាងសង់យ៉ាងមមាញឹក បន្ទាប់ពីខ្លោងទ្វារចាស់ បានរងការវាយប្រហារដោយពាក្យសម្តីរិះគន់យ៉ាងចាស់ដៃ ហើយត្រូវបានគេលួចដុតឆេះបាត់រូបរាងហើយនោះ ។
តាមរយៈនៃការសាងសង់ខ្លោងទ្វារតាមរចនាបថថ្មី សង្គ្រាមពាក្យសម្តីតាមសង្គមហ្វេសប៊ុក ដែលធ្លាប់បានធ្វើការវាយប្រហាររិះគន់ទំនងជានឹងបាត់ឥទ្ធិពលទៅវិញ បន្ទាប់ពីខ្លោងទ្វារចាស់ បានឆេះនៅសល់តែតួ និងអ្នករៀបចំកម្មវិធីដ៏ធំនេះ បានសម្រេចចិត្តធ្វើការផ្លាស់ប្តូរដាក់ខ្លោងទ្វារ «អង្គរសង្ក្រាន្ត» ថ្មីមួយមកជំនួសវិញ ។ រហូតមកដល់ពេលនេះ ក្រុមជាងកំពុងញាប់ដៃញាប់ជើង រុះរើខ្លោងទ្វារចាស់ និងរៀបចំដំទ្បើងតាមគំនូសព្រាងខ្លោងទ្វារថ្មី ដែលទើបនឹងគូរជាថ្មី ។
សហភាពសហព័ន្ធយុវជនកម្ពុជា ដែលជាអ្នករៀបចំព្រឹត្តិការណ៍អង្គរសង្ក្រាន្តឆ្នាំ២០១៥ ដឹកនាំដោយលោក ហ៊ុន ម៉ានី បានបញ្ជាក់ថា ខ្លោងទ្វារលើកក្រោយនេះ មានលក្ខណៈជាខ្មែរ «ជាងមុន» ។ ការរចនាថ្មីនេះ មតិជាតិបានសម្តែងនូវការកោតសរសើរខ្លោងទ្វារថ្មីនេះថា អាចទទួលយកបាន ព្រោះបង្ហាញពីរចនាបថរបស់ខ្មែរមិនដូចខ្លោងទ្វារចាស់មានរចនាបថដូចវៀតណាមឬចិន ។
អតីតមន្ត្រីជំនាញមួយរូបនៃក្រសួងវប្បធម៌ និងវិចិត្រសិល្បៈ លោក វ៉ា រឿន ដែលបច្ចុប្បន្នកំពុងរស់នៅក្នុងប្រទេសបារាំង និងដែលធ្លាប់ផ្តល់មតិទៅលើខ្លោងទ្វារចាស់នោះ បានសម្តែងការសប្បាយចិត្ត នៅពេលដែលបានឃើញខ្លោងទ្វារក្រោយ ដោយលោកចាត់ទុកថា មានការបោះជំហានទៅរករចនាបថខ្មែរច្រើនជាងមុន៕
ចែករំលែកព័តមាននេះ