រាជធានីភ្នំពេញ ៖ សពលោក ប៉ែន សមិទ្ធិ ប្រធានក្លឹបអ្នកកាសែតកម្ពុជា និងជានិពន្ធនាយកកាសែតរស្មីកម្ពុជាត្រូវបានរៀបចំពិធីបូជាតាមប្រពៃណីហើយកាលពីវេលាម៉ោង៩ និង១០នាទីព្រឹក ថ្ងៃទី០២ មេសា ២០១៥នេះ នៅវត្តលង្កា
រាជធានីភ្នំពេញ ៖ សពលោក ប៉ែន សមិទ្ធិ ប្រធានក្លឹបអ្នកកាសែតកម្ពុជា និងជានិពន្ធនាយកកាសែតរស្មីកម្ពុជាត្រូវបានរៀបចំពិធីបូជាតាមប្រពៃណីហើយកាលពីវេលាម៉ោង៩ និង១០នាទីព្រឹក ថ្ងៃទី០២ មេសា ២០១៥នេះ នៅវត្តលង្កា រាជធានីភ្នំពេញ។
លោក ខៀវ កាញារីទ្ធិ រដ្ឋមន្ត្រីក្រសួងព័ត៌មានបានអញ្ជើញចូលរួម និងប្រទានភ្លើងបូជាសពលោក ប៉ែន សមិទ្ធិ ក្រោមវត្តមានក្រុមគ្រួសារ សាច់ញាតិ ជិតឆ្ងាយ រួមទាំងអ្នករួមអាជីពជាច្រើននាក់ក្នុងទឹកមុខក្រៀមក្រំ និងក្តីស្រណោះអាឡោះអាល័យចំពោះលោក ប៉ែន សមិទ្ធិ ដែលបន្សល់ទុកនូវស្នាដៃជាច្រើនក្នុងអាជីពសារព័ត៌មាន ។
មុនពិធីបូជាសពលោក ប៉ែន សមិទ្ធិ លោកប៉ែន បូណា ប្រធានស្តីទីអ្នកកាសែតកម្ពុជាបានឡើងអានសាររំលែកទុក្ខរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចក៏បានចូលរួមសម្តែងការសោកស្តាយ និងរំលែកទុក្ខចំពោះក្រុមគ្រួសារលោក ប៉ែន សមិទ្ធិ។
គួរបញ្ជាក់ថា លោក ប៉ែន សមិទ្ធិ បានធ្វើមរណកាល កាលពីថ្ងៃច័ន្ទទី៣០ មីនា ២០១៥ វេលាម៉ោង៧ និង២០នាទីព្រឹកដោយរោគាពាធិ ក្នុងជន្មាយុ៥៥ឆ្នាំ ដោយបន្សល់ទុកភរិយាជាទីស្រឡាញ់ និងបុត្រាបុត្រីចំនួនបីនាក់។ ស្នាដៃលេចធ្លោរបស់លោក រួមមានជាស្ថាបនិក និងនិពន្ឋនាយកកាសែតរស្មីកម្ពុជា ស្ថាបនិក និងជាប្រធាន ក្លឹបអ្នកកាសែតកម្ពុជា វែបសាយព័ត៌មាន www.cen.com.kh និងវែបសាយព័ត៌មានភាសាអង់គ្លេស www.thecambodiaherald.com ។
លោក ប៉ែន សមិទ្ធិ កើតនៅ ថ្ងៃទី១៦ តុលា ១៩៦០ នៅភូមិកំពង់ចាម ឃុំកំពង់ចាម ស្រុកកំពង់សៀម ខេត្តកំពង់ចាម ក្នុងគ្រួសារកសិករមួយដែលមានប្រវត្តិជាអ្នកសិក្សារៀនសូត្រ។ កាលពីកុមារភាពលោកគឺជាក្មេងដ៏ឧស្សាហ៍រៀនសូត្រ និងគោរព តាមដំបូន្មានឪពុកម្តាយចាស់ព្រឹទ្ធាចារ្យ។ លោកបានសិក្សានៅសាលាបឋមសិក្សាវត្តដីដុះ ក្នុងស្រុកកំពង់សៀម ខេត្តកំពង់ចាម បន្ទាប់មកសិក្សានៅវិទ្យាល័យឥន្ទ្រទេវី ទួលគោក រាជធានីភ្នំពេញ រហូតដល់ឆ្នាំ១៩៧៥។
លោកត្រូវបានចាត់ទុកជាសិស្សឆ្នើមនៅក្នុងថ្នាក់។ ចាប់ពីឆ្នាំ១៩៧៥-១៩៧៩ លោករស់នៅក្នុងរបបប៉ុលពតនៅភូមិកន្សោមអកឃុំកន្សោមអក ស្រុកកំពង់ត្របែក ខេត្តព្រៃវែង។ ពីឆ្នាំ១៩៧៩-១៩៨០ គឺក្រោយរបបប៉ុលពតលោកបានសាងផ្នួសជាសាមណេរនៅវត្តកំរែង ស្ថិតនៅក្នុងស្រុកបាភ្នំ ខេត្តព្រៃវែង។
ចំពោះការសិក្សាជាន់ខ្ពស់វិញ លោក ប៉ែន សមិទ្ធិ បានទទួលសញ្ញាបត្រជាន់ខ្ពស់ជាច្រើនដូចជា បានទទួលសញ្ញាប័ត្រស្រាវជ្រាវវប្បធម៌ខ្មែរ រាជធានីភ្នំពេញ (១៩៨០-១៩៨១)។ ទទួលសញ្ញាបត្រជាន់ខ្ពស់ផ្នែកវិទ្យាសាស្ត្រនយោបាយនៅវិទ្យាស្ថានង្វៀនអាយគួក ទី៧នៃប្រទេសវៀតណាម (១៩៨៤-១៩៨៦) និងទទួលបរិញ្ញាបត្រ ផ្នែកសារព័ត៌មាន នៅអតីតសហភាពសូវៀតនាឆ្នាំ១៩៨៧។
ជាការកត់សម្គាល់នៅក្នុងឱកាសនាពិធីបូជាសពលោក ប៉ែន សមិទ្ធិ ក្រោយពីតំណាងក្រសួងព័ត៌មានអានសេចក្តីសម្រេចរបស់រាជរដ្ឋាភិបាលកម្ពុជា លោក ខៀវ កាញារិទ្ធ រដ្ឋមន្ត្រីក្រសួងព័ត៌មាន បានអញ្ជើញបំពាក់គ្រឿងឥស្សរិយយសព្រះរាជាណាចក្រកម្ពុជា ថ្នាក់មហាសេរី វឌ្ឍន៍ ជូនសពលោក ប៉ែន សមិទ្ធិ មុននឹងប្រទានភ្លើងបូជាសព៕
ចែករំលែកព័តមាននេះ