ខេត្តកំពង់ស្ពឺ ៖ មុខសញ្ញាជួញដូរគ្រឿងញៀនសកម្ម២នាក់ត្រូវកម្លាំងនគរបាលស្រុកសំរោងទងឃាត់ខ្លួន ខណៈពួកគេកំពុងចែកចាយគ្រឿងញៀនកាលពីវេលាម៉ោង៥ និង២៥នាទី ថ្ងៃទី១ មេសា ២០១៥ នៅចំណុចខាងត្បូងវត្តអង្គតាឡឹក តាមបណ្តោយផ្លូវជាតិលេខ៣១ ក្នុងភូមិអង្គតាឡឹក ឃុំសំបូរ ស្រុកសំរោងទង ។
លោកវរសេនីយ៍ត្រី យុត សុផល អធិការនគរបាលស្រុកសំរោងទងបានឱ្យដឹងថា មុខសញ្ញាជួញដូរគ្រឿងញៀនទាំង២នាក់ ម្នាក់ឈ្មោះផល វណ្ណា ភេទប្រុស អាយុ៣១ឆ្នាំ មុខរបរមិនពិតប្រាកដ និងម្នាក់ទៀតឈ្មោះចាន់ រាម ភេទប្រុស អាយុ២៣ឆ្នាំ មុខរបរមិនពិតប្រាកដ ។ ទាំង២នាក់រស់នៅក្នុងភូមិអង្គតាឡឹក ឃុំសំបូរ ស្រុកសំរោងទង ។
លោកអធិការបន្តថា ដោយមានការចង្អុលបង្ហាញពីលោកស្នងការខេត្ត លោកក៏បានឱ្យលោកម៉ិច សុភាន់ អធិការរងទទួលបន្ទុកផ្នែកព្រហ្មទណ្ឌដឹកនាំកម្លាំងធ្វើការស្រាវជ្រាវកំណត់មុខសញ្ញាច្បាស់រហូតដល់ល្ងាចថ្ងៃទី១ មេសា ២០១៥ ក៏ជួបប្រទះឃើញមុខសញ្ញាទាំង២នាក់ជិះម៉ូតូ១គ្រឿងម៉ាកគុបជ្រុង ពណ៌ស្លែ គ្មានស្លាកលេខ ពេលនោះកម្លាំងរបស់លោកក៏ឃាត់ខ្លួនដើម្បីសួរនាំ និងឆែកឆេរស្រាប់តែឃើញថ្នាំញៀនប្រភេទម៉ាទឹកកកនៅសល់១កញ្ចប់តូច រួចសមត្ថកិច្ចក៏នាំមកសាកសួរនៅអធិការដ្ឋាននគរបាលស្រុកសំរោងទង។
ក្រោយពីសួរនាំរួច សមត្ថកិច្ចបានដកហូតថ្នាំញៀន១កញ្ចប់តូច ម៉ូតូ១គ្រឿង និងទូរស័ព្ទដៃ១គ្រឿងកសាងសំណុំរឿងបញ្ជូនទៅស្នងការខេត្ចាត់ការបន្តតាមនីតិវិធី៕
ចែករំលែកព័តមាននេះ