រាជធានីភ្នំពេញ ៖ ក្មេងប្រុសម្នាក់ទើបតែអាយុ១៣ឆ្នាំ និងកំពុងតែរៀនថ្នាក់ទី៥ តែមិនសូវចូលសាលាទេ បែរជាទៅញៀនល្បែងហ្គេមងើបមុខមិនរួច មិនតែប៉ុណ្ណោះកូនប្រុសនេះ ថ្លើមធំហ៊ានលួចលុយឱពុក-ម្តាយរាប់រយដុល្លារទៅលេងល្បែងថែមទៀត ដោយសារនិងការអត់ទ្រាំពុំបាន ហើយប្រដៅកូនមិនស្តាប់ និងខ្លាចកូនធ្លាក់ទៅប្រព្រឹត្តអំពើអបាយមុខផ្សេងៗទៀតនោះ កាលពីព្រឹកថ្ងៃទី២ មេសា ២០១៥ ម្តាយបានចាប់កូនប្រុសរូបនេះ ប្រគល់ទៅឱ្យប៉ូលិសប៉ុស្តិ៍ទឹកថ្លា ខណ្ឌសែនសុខ ចាត់ការម្តង ។
ប្រភពបានឱ្យដឹងថា នៅចំពោះមុខប៉ូលិស ក្មេងប្រុសខាងលើបានយំខ្លាចប៉ូលិស និងបានលើកដៃសំពះសុំទោសម្តាយថា ឈប់លួចលុយទៅលេងហ្គេមទៀតហើយ ។
ចំណែកឯម្តាយឈ្មោះចាន់ លីណា អាយុ៣៦ឆ្នាំ ជាអ្នកធ្វើការនៅក្រុមហ៊ុនមួយ និងមានទីលំនៅក្នុងសង្កាត់ទឹកថ្លា ខណ្ឌសែនសុខ បានបញ្ជាក់ថា កូនប្រុសម្នាក់នេះវក់នឹងល្បែងហ្គេមមែនទែន ពោលក្មេងប្រុសនេះនៅកន្លែងលេងហ្គេមជាងនៅផ្ទះខ្លួនឯង គឺចេញពីផ្ទះបាត់ៗ ដោយទៅលេងហ្គេមនៅមិនឆ្ងាយពីផ្ទះក្នុងសង្កាត់ទឹកថ្លានោះទេ ។
ប្រភពបន្តថា ក្មេងប្រុសរូបនេះហ៊ានលួចលុយចំនួន៣ដងហើយ អស់លុយចំនួន៣០០ដុល្លាថែមទៀត ។ ដោយសារតែអប់រំមិនស្តាប់និងទ្រាំមិនបាន ទើបម្តាយដាច់ចិត្តចាប់កូនពីកន្លែងលេងហ្គេមមកប្រគល់ឲ្យប៉ូលិសចាត់ការម្តង។ ទោះបីបែបណា ប៉ូលិសបានត្រឹមតែអប់រំ និងប្រគល់ទៅឱ្យម្តាយវិញ ដោយសារតែកូននេះជាអនីតិជន។
គួរបញ្ជាក់ថា ល្បែងហ្គេមប្រភេទអ៊ីនធើរណេតបង្កប់ល្បែងភ្នាល់បាល់ចាញ់ឈ្នះរាប់រយរាប់ពាន់ និងល្បែងស៊ីសងហ្គេមប្រភេទបាញ់ត្រី និងល្បែងកន្ទុយលេខបានកំពុងរីកដុះដាលនៅក្នុងខណ្ឌសែនសុខ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ