រាជធានីភ្នំពេញ ៖ អ្នករត់រ៉ឺម៉កម៉ូតូស្រវឹងជោកម្នាក់ទៅទិញមឹកយកទៅសែនឆេងម៉េងបានបើករ៉ឺម៉ករេពេញផ្លូវទៅបុកម៉ូតូសង់កូរ៉េពីក្រោយបណ្តាលឲ្យក្រឡាប់រ៉ឺម៉កម៉ូតូ ហើយចោទថាម៉ូតូជាអ្នកបុករ៉ឺម៉កម៉ូតូខ្លួនទៅវិញ ។
រាជធានីភ្នំពេញ ៖ អ្នករត់រ៉ឺម៉កម៉ូតូស្រវឹងជោកម្នាក់ទៅទិញមឹកយកទៅសែនឆេងម៉េងបានបើករ៉ឺម៉ករេពេញផ្លូវទៅបុកម៉ូតូសង់កូរ៉េពីក្រោយបណ្តាលឲ្យក្រឡាប់រ៉ឺម៉កម៉ូតូ ហើយចោទថាម៉ូតូជាអ្នកបុករ៉ឺម៉កម៉ូតូខ្លួនទៅវិញ ។ ហេតុការណ៍នេះបានកើតឡើងកាលពីវេលាម៉ោង៨ និង៣០នាទីយប់ ថ្ងៃទី១ មេសា តាមផ្លូវវេងស្រេង ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។
សាក្សីឃើញហេតុការណ៍បានឲ្យដឹងថា មុនពេលកើតហេតុរ៉ឺម៉កម៉ូតូបើកបរដោយបុរសម្នាក់ក្នុងស្ថានភាពស្រវឹងជោកជាំមានដឹកមឹកកន្លះកេសនៅលើរ៉ឺម៉កម៉ូតូបើកបរពីលិចទៅកើត ស្របគ្នាជាមួយម៉ូតូសង់កូរ៉េ ពណ៌ក្រហម អត់ស្លាកលេខ ជិះគ្នា២នាក់ ពេលមកដល់ចំណុចខាងលើអ្នកបើករ៉ឺម៉កម៉ូតូស្រវឹងខ្លាំងពេកបើករ៉ឺម៉កម៉ូតូរេពេញផ្លូវទៅបុកពីក្រោយម៉ូតូសង់កូរ៉េពេញទំហឹងបណ្តាលឲ្យរ៉ឺម៉កម៉ូតូក្រឡាប់ដួលបែកក្បាលបន្តិច ចំណែកអ្នកជិះម៉ូតូរងរបួសស្រាល ។
បើតាមសម្តីរបស់អ្នកបើករ៉ឺម៉កម៉ូតូមានឈ្មោះ យិន សុងភី ភេទប្រុស អាយុ៣៥ឆ្នាំ ស្នាក់នៅសង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅខេត្ត កំពង់ចាម បានឲ្យដឹងទាំងរវើរវាយថា មុនពេលកើតគាត់ទើបនឹងត្រឡប់មកពីទិញមឹកយកទៅសែនឆេងម៉េងនៅស្រុកកំណើតថ្ងៃទី២ មេសា នេះ មិនទាន់បានទៅសែនផងក៏ត្រូវម៉ូតូបុករ៉ឺម៉កម៉ូតូរបស់គាត់ឲ្យក្រឡាប់កំពប់មឹករបស់គាត់ ។ ពេលដែលប្រជាពលរដ្ឋឮអ្នកបើករ៉ឺម៉កម៉ូតូប្រាប់ថាម៉ូតូបុករ៉ឺម៉កម៉ូតូរបស់គាត់បែបនេះនាំគ្នាសើចគ្រប់គ្នា ដោយសារតែរ៉ឺម៉កម៉ូតូជិះនៅខាងក្រោយម៉ូតូ ។
ចំណែកជនរងគ្រោះមានឈ្មោះ ពីង ធូ ភេទប្រុស អាយុ២៤ឆ្នាំ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ក្រោយពេលកើតហេតុអ្នកបើករ៉ឺម៉កម៉ូតូបានហៅក្រុមរ៉ឺម៉កម៉ូតូមកជួយអន្តរាគមន៍ដែរ ប៉ុន្តែមិនមានអ្នកមកជួយទេ ព្រោះគេដឹងថាគាត់ស្រវឹងទៅហើយ បន្ទាប់មកទើបភាគីទាំងពីរធ្វើការចរចាគ្នា ដោយខាងម៉ូតូទាមទារសំណង២០ដុល្លារ ត្រូវអ្នករត់រ៉ឺម៉កម៉ូតូសង១៥ដុល្លារបញ្ចប់រឿង ៕
ចែករំលែកព័តមាននេះ