ខេត្តឧត្តរមានជ័យ ៖ លំនៅឋានរបស់ប្រជាពលរដ្ឋយ៉ាងហោចណាស់ចំនួន៦១ខ្នងត្រូវបានដួលរំលំ និងប៉ើងដំបូល រីឯស្ត្រីម្នាក់រងរបួសធ្ងន់ដោយសារផ្ទះរលំបោកត្រូវក្បាល ខណៈមានភ្លៀងធ្លាក់មួយមេធំលាយឡំនឹងខ្យល់បក់បោកខ្លាំង
ខេត្តឧត្តរមានជ័យ ៖ លំនៅឋានរបស់ប្រជាពលរដ្ឋយ៉ាងហោចណាស់ចំនួន៦១ខ្នងត្រូវបានដួលរំលំ និងប៉ើងដំបូល រីឯស្ត្រីម្នាក់រងរបួសធ្ងន់ដោយសារផ្ទះរលំបោកត្រូវក្បាល ខណៈមានភ្លៀងធ្លាក់មួយមេធំលាយឡំនឹងខ្យល់បក់បោកខ្លាំង កាលពីវេលាម៉ោង៨យប់ ថ្ងៃទី៣១ មីនា ២០១៥ នៅក្នុងឃុំបាក់អន្លូង ស្រុកត្រពាំងប្រាសាទ។
លោកនៅសំ តារារិទ្ធ អភិបាលស្រុកត្រពាំងប្រាសាទបានឲ្យដឹងថា លំនៅឋានរបស់ប្រជាពលរដ្ឋចំនួន៣ភូមិក្នុងឃុំបាក់អន្លូង ក្នុងនោះមានភូមិស្រែល្អចំនួន២០ខ្នងផ្ទះ ភូមិទួលប្រសើរចំនួន២៦ខ្នងផ្ទះ និងភូមិសុខសេរីចំនួន១៥ខ្នងផ្ទះដែលត្រូវដួលរលំ និងប៉ើងដំបូលមានចំនួន៦១ខ្នង ខណះមានភ្លៀងធ្លាក់មួយមេធំលាយឡំនឹងខ្យល់បក់បោកខ្លាំង។
ចំណែកស្ត្រីដែលរងរបួសធ្ងន់ឈ្មោះម៉ៅ គឿន អាយុ៤៩ឆ្នាំ រស់នៅក្នុងភូមិស្រែល្អ កំពុងសម្រាកព្យាបាលក្នុងមន្ទីរពេទ្យ។
លោកអភិបាលស្រុកបន្តថា នៅពេលនេះអាជ្ញាធរ បានបញ្ជូនក្រុមការងារឱ្យចុះទៅអន្តរាគមន៍ ជួយដល់ប្រពលរដ្ឋរងគ្រោះដោយសារខ្យល់រលំផ្ទះ និងបានឲ្យអាជ្ញាធរភូមិ-ឃុំរៀបចំកន្លែងស្នាក់នៅបណ្តោះអាសន្នជូនពួកគាត់ និងធ្វើរបាយការណ៍អំពីទំហំនៃការខូចខាត។
គ្រោះមហន្តរាយខ្យល់ព្យុះ ក្រៅពីលំនៅឋានរបស់ប្រជាពលរដ្ឋជាច្រើនខ្នង ឯដំណាំមួយចំនួន រួមទាំងដើមឈើផ្សេងៗដែលនៅក្បែលំនៅឋានប្រជាពលរដ្ឋ និងដើមឈើនៅក្នុងព្រៃក៏ត្រូវខ្យល់រលំដួលបាក់មែកធ្លាក់មកដីជាច្រើនកន្លែង តែមិនបានប៉ះពាល់ដល់សត្វពាហនៈគោក្របីទេ៕
ចែករំលែកព័តមាននេះ