ភូមាចុះហត្ថលេខាលើគម្រោងបទឈប់បា.ញ់គ្នាថ្នាក់ជាតិ
បណ្តាអ្នកចរចាសន្តិភាពរបស់រដ្ឋាភិបាលភូមា និងបណ្តាក្រុមប្រដាប់អាវុធជនជាតិភាគតិច កាលពីថ្ងៃទី៣១ មីនា នៅទីក្រុងរ៉ង់ហ្គូនបានចុះហត្ថលេខាជាបណ្តោះអាសន្នលើគម្រោងកិច្ចព្រមព្រៀង
បណ្តាអ្នកចរចាសន្តិភាពរបស់រដ្ឋាភិបាលភូមា និងបណ្តាក្រុមប្រដាប់អាវុធជនជាតិភាគតិច កាលពីថ្ងៃទី៣១ មីនា នៅទីក្រុងរ៉ង់ហ្គូនបានចុះហត្ថលេខាជាបណ្តោះអាសន្នលើគម្រោងកិច្ចព្រមព្រៀងឈប់បាញ់គ្នាថ្នាក់ជាតិ ACN ដែលមាន៧ជំពូកមួយក្រោយការចរចាគ្នា កាលពីថ្ងៃទី២៩ មីនា មក ។
ប្រធានាធិបតីភូមា លោក ថេន សេន មានវត្តមានក្នុងឱកាសនៃពិធីចុះហត្ថលេខាលើឯកសារនោះ ដោយគណៈកម្មាធិការការងារទទួលបន្ទុកធ្វើឱ្យមានសន្តិភាព UPWC និងក្រុមសម្របសម្រួលសម្រាប់បទឈប់បាញ់គ្នាថ្នាក់ជាតិ NCCT របស់បណ្តាក្រុមប្រដាប់អាវុធជនជាតិភាគតិច ។
សមាជិក៥រូបរបស់ UPWC និងរបស់ NCCT បានចូលរួមក្នុងការចុះហត្ថលេខា លើឯកសារនេះ ។
ថ្លែងមុនពេលចុះហត្ថលេខាលើគម្រោងកិច្ចព្រមព្រៀងឈប់បាញ់គ្នា លោកថេនសេនចាត់ទុកបណ្តាអ្នកចរចាសន្តិភាព ថាជាស្ថាបនិកសន្តិភាពដែលនឹងត្រូវចារឈ្មោះក្នុងប្រវត្តិសាស្ត្រ ។ លោកបន្តថា ការចុះហត្ថលេខានេះ បើកផ្លូវទៅរកការចរចាគ្នាខាងនយោបាយ ។
បេសកជនពិសេស អ.ស.ប ប្រចាំភូមាលោក VIJAY NAMBIAR ក៏មានវត្តមាននាឱកាសចុះហត្ថលេខាលើកិច្ចព្រមព្រៀងរួមជាមួយបេសកជនពិសេសរបស់ក្រសួងការបរទេសចិនលោក វា៉ង យីញហ្វាន ដែរ ។
គម្រោងកិច្ចព្រមព្រៀងឈប់បាញ់គ្នាថ្នាក់ជាតិត្រូវបានបង្ហើយកាលពីថ្ងៃទី៣០ មីនា ដែលកំណត់ពីការបញ្ចប់ការចរចាសន្តិភាពរយៈពេលដែលទៅ១ឆ្នាំ៤ខែ ។
គេគ្រោងថា គម្រោងកិច្ចព្រមព្រៀងឈប់បាញ់គ្នាថ្នាក់ជាតិ នឹងត្រូវចុះហត្ថលេខាជាផ្លូវការនាពេលខាងមុខនៅរដ្ឋធានីណៃពិដោ ដោយមេដឹកនាំរដ្ឋាភិបាលនិងមេដឹកនាំនៃបណ្តាក្រុមប្រដាប់អាវុធជនជាតិភាគតិច ៕
ចែករំលែកព័តមាននេះ