រាជធានីភ្នំពេញ ៖ ក្រសួងអប់រំ យុវជននិងកីឡា និងអង្គការអេអិលស៊ីកុមុយនីកេសិនស៍ រៀបចំការប្រឡងថ្លែងសុន្ទរកថា ភាសាជប៉ុនលើកទី៨ សម្រាប់សិស្សវិទ្យាល័យនារសៀលថ្ងៃទី២៩ មីនា នៅសាកលវិទ្យាល័យជាតិគ្រប់គ្រងដោយមានការអញ្ជើញចូលរួមជាកិត្តិយសពីលោក ពិត ចំណាន រដ្ឋលេខាធិការក្រសួងអប់រំ យុវជន និងកីឡា លោក KURONIYA TAKAYOSHI តំណាងស្ថានទូតជប៉ុនប្រចាំកម្ពុជា និងភ្ញៀវកិត្តិយសជាច្រើនរូបទៀត ។
លោក KURONIYA TAKAYOSHI តំណាងស្ថានទូតជប៉ុនប្រចាំកម្ពុជាមានប្រសាសន៍ថា ពិធីប្រឡងថ្លែងសុន្ទរកថា ភាសាជប៉ុនលើកទី៨ សម្រាប់សិស្សវិទ្យាល័យកម្ពុជា ពេលនេះ ធ្វើឡើងដើម្បីបង្កើនសមត្ថភាពនៃការសាកល្បងព្រមទាំងផ្តល់បទពិសោធន៍ថ្មីៗជូនពួកគាត់។ រាជរដ្ឋាភិបាលជប៉ុនបានជំរុញ និងឧបត្ថម្ភដល់ក្រសួងអប់រំរបស់កម្ពុជា ដូចជាផ្តល់ឱកាសដល់អ្នកទាំងអស់គ្នាបានទៅសិក្សានៅប្រទេសជប៉ុនជាលក្ខណៈផ្លាស់ប្តូរវប្បធម៌ និងភាសាជប៉ុនគ្រប់កម្រិត ។ ជាក់ស្តែង កន្លងទៅថ្មីនេះៗ មានសិស្សបានប្រឡងជាប់ និងទទួលបានអាហារូបករណ៍ទៅសិក្សាបន្តនៅប្រទេសជប៉ុននៅអំឡុងខែមេសា ខាងមុខផងដែរ ។
លោកបានសំណូមពរទៅដល់សិស្សានុសិស្សកម្ពុជាទាំងអស់ដែលបាននិងកំពុងសិក្សាភាសាជប៉ុន ត្រូវចេះចាប់យកឱកាស និងបង្កើតនូវមិត្តភាពរវាងកម្ពុជា និងជប៉ុនឲ្យកាន់តែប្រសើរឡើងនាថ្ងៃអនាគត ។លោក KATAMI ZAWA គណៈកម្មការដាក់ពិន្ទុសម្រាប់ការប្រឡងថ្លែងសុន្ទរកថាមានប្រសាសន៍ថា តាមការសង្កេតរបស់លោក ចំពោះការសិក្សានៅថ្នាក់វិទ្យាល័យនៅកម្ពុជាមានការរីកចម្រើន ហើយលោកសូមចូលរួមត្រេកអរដែលឃើញនូវលទ្ធផលបែបនេះ ។ ក្នុងនាមជាគណៈកម្មការដាក់ពិន្ទុក្នុងការប្រឡងសម្រាប់សិស្សវិទ្យាល័យនៅលើពិភពលោកបានបន្តកិច្ចការនេះអស់រយៈពេលជាង២០ឆ្នាំកន្លងមក ឃើញមានការវិវឌ្ឍចំពោះសិស្សដែលបានសិក្សាភាសាជប៉ុន គឺមានការកើនឡើង ។
ជារួម ការប្រឡងថ្ងៃនេះចំពោះសិស្សដែលបានជាប់ចំណាត់ថ្នាក់លេខ១នឹងត្រូវបានជ្រើសរើសឲ្យទៅប្រឡងនៅប្រទេសជប៉ុនជាលក្ខណៈពិភពលោក ។គួរបញ្ជាក់ថា សម្រាប់ការប្រឡងថ្លែងសុន្ទរកថាជាភាសាជប៉ុនពេលនេះសិស្សដែលត្រូវចូលរួមប្រឡងមានចំនួន៨នាក់ មកពីវិទ្យាល័យ ហ៊ុន សែន សេរីភាព ហ៊ុន សែន ទួលទំពូង វិទ្យាល័យមិត្តភាពជប៉ុន ហ៊ុន សែន ក្រគរ និងជា ស៊ីម សាមគ្គី ៕
ចែករំលែកព័តមាននេះ