ខេត្តរតនគិរី ៖ ក្រៅពីការងារថែរក្សាការពារសណ្តាប់ធ្នាប់សុវត្ថិភាពជូនប្រទេសជាតិ និងប្រជាពលរដ្ឋ កម្លាំងអ.ហ និងយោធាខេត្តរតនគិរី ជាច្រើននាក់បានចូលរួមដាំផ្កាក្នុងសួនតាមផ្លូវសាធារណៈ នាព្រឹកថ្ងៃទី៣១ ខែមីនា ឆ្នាំ២០១៥ នេះ ។ សកម្មភាពដឹកនាំកម្លាំងដាំផ្កាដោយលោកឧត្តមសេនីយ៍ត្រីខាំ ស៊ុក មេបញ្ជាការតំបន់ប្រតិបត្តិការសឹករងខេត្ត និងលោកឧត្តមសេនីយ៍ត្រី គឹម រស្មី មេបញ្ជាការអ.ហ ខេត្តរតនគិរី ។
បើតាមលោកមេបញ្ជាការទាំង២រូបខាងលើប្រាប់ឲ្យដឹងថា ដោយមានការណែនាំពីលោកថង សាវុន អភិបាល និងប្រធានគណៈបញ្ជាការឯកភាពខេត្តដល់កម្លាំងប្រដាប់អាវុធចូលរួមលើកស្ទួយកែលម្អសោភ័ណភាព ក្នុងក្រុងបានលុង ឲ្យស្រស់បំព្រង សម្រាប់បង្ហាញឲ្យភ្ញៀវទេសចរណ៍ជាតិ-អន្តរជាតិមកលេង ក្នុងទឹកដីភូមិភាគឦសាន នៃប្រទេសកម្ពុជា និងប្រជាពលរដ្ឋក្នុងខេត្តរតនគិរី ទាំងមូលក្នុងឱកាសបុណ្យចូលឆ្នាំប្រពៃណីខ្មែរ នឹងឈានចូលមកដល់នាពេលថ្ងៃខាងមុខ ។
លោកឧត្តមសេនីយ៍ គឹម រស្មី បញ្ជាក់ឲ្យដឹងទៀតថា ផ្កាជាច្រើនប្រភេទយកមកដាំមានដូចជា៖ ផ្កាដកខឹម ផ្កាតែ ផ្កាគរលាន់ ផ្កាជ្រៃក្រឹម ផ្កាដកប៉ារ៉ា ផ្កាម្ចុលខ្មែរ និងផ្កាម្ចុលថៃជាដើម ។ លោកបន្តថា ផ្កាជាច្រើនប្រភេទនេះ ត្រូវបានលោកថង សាវុន អភិបាលនៃគណអភិបាលខេត្តរតនគិរី ជាអ្នកទិញមកពីរាជធានីភ្នំពេញ ដើម្បីថែកជូណដល់មន្ទីរអង្គភាពជុំវិញខេត្ត និងអាជ្ញាធរក្រុងបានលុង យកទៅដាំលម្អក្នុងសួនច្បារទុកជាប្រយោជន៍សាធារណៈ ។ បើទោះបីស្ថិតក្រោមកម្តៅថ្ងៃយ៉ាងណាក៏ដោយ គេឃើញកងកម្លាំងខាងលើមានទឹមុខសប្បាយរីករាយ ជាមួយនឹងសកម្មភាពចូលរួមដាំផ្កាដោយពុំខ្លាចការនឿយហត់នោះឡើយ ៕
ចែករំលែកព័តមាននេះ