មតិទូទៅរមែងយល់ថា សុនខជាមិត្តដ៏ល្អរបស់មនុស្ស ប៉ុន្តែសម្រាប់អ្នកគាំទ្របាល់ទាត់ គួរតែគិតឱ្យច្បាស់ ក្រោយពីអ្នកគាំទ្របាល់ទាត់ក្លិប Chelsea ម្នាក់បានខាតបង់សំបុត្រទស្សនាការប្រកួតបាល់ទាត់ប្រឺមីញេលីកអង់គ្លេស ដែល Chelsea បើកទ្វារទទួលភ្ញៀវ Man Utd នៅថ្ងៃទី១៨ មេសា ខាងមុខ ។
លោកឆាលី អេតវើុដ អ្នកគាំទ្រក្លិប Chelsea នៅក្រុងរិកហេម បានចំណាយប្រាក់ជាង២០០ផោន ស្មើនឹងជាង៣០០ដុល្លារទិញសំបុត្រចំនួន៣សន្លឹក ដោយមានគម្រោងនាំគូស្នេហ៍ និងកូន២នាក់ទៅទស្សនាការប្រកួតបាល់ទាត់ដែល Chelsea បើកទ្វារទទួលភ្ញៀវ Man Utd ក្នុងក្របខ័ណ្ឌប្រឺមីញេលីកអង់គ្លេស ។ បច្ចុប្បន្នក្លិប Chelsea ស្ថិតនៅកំពូលតារាងមាន៦៧ពិន្ទុពីការប្រកួតចំនួន២៩លើក នាំមុខក្លិប Man City ស្ថិតនៅលំដាប់ទី២ ចំនួន៦ពិន្ទុ និងមានការប្រកួតតិចជាង១លើក ។
ក្តីស្រមៃរបស់អ្នកគាំទ្រខាងលើស្ទើរតែសាបសូន្យក្រោយពីសំបុត្រផ្ញើទៅដល់ផ្ទះ លោកឆាលី ស្ថិតនៅកន្លែងការងារ ចំណែកកូនទៅសាលាធ្វើឱ្យសុនខ អាយុ១២ខែ ឈ្មោះ អេលសា ពូជ «West Highland Terrier» ខាំក្រញីខ្ទេចខ្ទី ។ សំបុត្រទស្សនាការប្រកួតនេះមិនស្ថិតក្នុងសភាពអាចប្រើប្រាស់បានធ្វើឱ្យលោកឆាលី ត្រូវទាក់ទងទៅក្លិប Chelsea ដើម្បីប្តូរថ្មី រួមទាំងបង់ប្រាក់បន្ថែម ។ ទោះជាយ៉ាងណាក៏ដោយ លោកឆាលី នៅតែមិនអស់ចិត្តចំពោះបុគ្គលិករបស់ក្លិបដែលយកសំបុត្រទៅដាក់ផ្ទះរបស់លោក បណ្តាលឱ្យសុនខខាំកម្ទេចចោលនោះថាជារឿងពិត ឬក៏មិនមែន ?
ចែករំលែកព័តមាននេះ