លោកស្រី ពុង ឈីវកេក មិនទទួលយកតំណែងសមាជិកទី៩ គ.ជ.ប
រាជធានីភ្នំពេញ ៖ ទីបំផុតទៅ ប្រធានអង្គការសិទ្ឋិមនុស្សលីកាដូ លោកស្រី ពុង ឈីវកេក បានបញ្ជាក់នៅក្នុងសេចក្តីថ្លែងការណ៍ថ្ងៃនេះថា លោកស្រី
រាជធានីភ្នំពេញ ៖ ទីបំផុតទៅ ប្រធានអង្គការសិទ្ឋិមនុស្សលីកាដូ លោកស្រី ពុង ឈីវកេក បានបញ្ជាក់នៅក្នុងសេចក្តីថ្លែងការណ៍ថ្ងៃនេះថា លោកស្រីមិនអាចទទួលយកតំណែងជាសមាជិកទី៩នៃគណៈកម្មាធិការជាតិរៀបចំការបោះឆ្នោត(គ.ជ.ប)ថ្មីនោះបានទេ ។
យ៉ាងណាក៍ដោយនៅក្នុងសេចក្តីថ្លែងការណ៍ចុះថ្ងៃទី៣១ មីនា ២០១៥ ដែលត្រូវបានគេបង្ហោះនៅក្នុងបណ្តាញទំនាក់ទំនងសង្គម (Facebook) នាប៉ុន្មាននាទីមុននេះ លោកស្រី ពុង ឈីវកេក មិនបានបញ្ជាក់ពីមូលហេតុពិតបា្រកដដែលលោកស្រីមិនទទួលយកតំណែងនេះទេ គ្រាន់តែបញ្ជាក់ថា តួនាទីជាសមាជិកទី៩ “សម្រាប់ខ្ញុំគឺជាសមាជិកឯករាជ្យម្នាក់ ពិតជានឹងរួមវិភាគទានយ៉ាងសំខាន់ដល់អព្យាក្រឹតភាពនៃស្ថាប័នរៀបចំការបោះឆ្នោត ដើម្បីសម្រេចបេសកកម្មរបស់ខ្លួនស្របតាមរដ្ឋធម្មនុញ្ញនិងច្បាប់ជាធរមាន “ប៉ុណ្ណោះ។ ជាមួយគ្នានេះដែរ លោកស្រីប្រធានអង្គការសិទ្ឋិមនុស្សលីកាដូ ក៍បានសុំអភ័យទោសចំពោះជនរួមជាតិទំាងឡាយដែលមានជំនឿលើលោកស្រី ហើយដែលអាចមានការខកចិត្តដោយសារការសម្រេចនេះ ។
មកដល់ម៉ោង១០និង២០នាទីព្រឹកថ្ងៃទី៣១មីនា កោះសន្តិភាពមិនអាចរកការសុំអត្ថាធិប្បាយបន្ថែមបានទេពីលោកស្រី ពុង ឈីវកេក ដោយទូរស័ព្ទលោកស្រីទទួលការហៅចូលជាច្រើនដង ប៉ុន្តែពុំមានអ្នកលើកទទួល ។
គួរបញ្ជាក់ថា ក្រោយកិច្ចព្រមព្រៀងរវាងគណបក្សប្រជាជនកម្ពុជា និងគណបក្សសង្គ្រោះជាតិកាលពីថ្ងៃទី២២ កក្កដា ២០១៤ ទាក់ទងទៅនឹងការកែទម្រង់និងការរៀបចំស្ថាប័នបោះឆ្នោតថ្មីនោះ ក្រុមអ្នកវិភាគបានប្រមើលមើលឃើញថា សម្រាប់តំណែងបេក្ខភាពសមាជិកទី៩ នៃគ.ជ.បថ្មី ដែលជ្រើសរើសដោយគណបក្សទំាងពីរដែលទទួលបានអាសនៈសភាសម្រាប់នីតិកាលទី៥នេះ នឹងអាចត្រូវបានជ្រើសរើសលោកស្រី ពុង ឈីវកេក ។
មកដល់ម៉ោង១០និង៤០នាទីថ្ងៃអង្គារដដែលនេះ អ្នកនំាពាក្យគណបក្សនយោបាយទំាងពីរមិនអាចរកការសុំអត្ថាធិប្បាយភ្លាមៗនៅឡើយទេ ជុំវិញការសម្រេចរបស់លោកស្រី ពុង ឈីវកេក មិនទទួលយកតំណែងសមជិកទី៩គ.ជ.បនេះ ៕
ចែករំលែកព័តមាននេះ