ខេត្តបន្ទាយមានជ័យ ៖ ដើម្បីអនុវត្តគោលនយបាយភូមិ/ឃុំមានសុវត្ថិភាព សំដៅលុបបំបាត់នូវការដាំដុះ ការផលិត ការជួញដូរ ការចែកចាយ និងការប្រើប្រាស់គ្រឿងញៀនខុសច្បាប់ ។ លោកឧត្តមសេនីយ៍ត្រីអាត់ ខែម ស្នងការនគរបាលខេត្តបន្ទាយមានជ័យក៏ដូចជាលោកវរសេនីយ៍ឯកឆេន ឈួត ស្នងការរងប្រឆាំងបទល្មើសតែងតែដាក់ចេញនូវបទបញ្ជាដល់ការិយាល័យនគរបាលប្រឆាំងគ្រឿងញៀនឲ្យសហការជាមួយកម្លាំងនគរបាលមូលដ្ឋានចុះប្រតិបត្តិការបង្ក្រាបឲ្យក្តៅគគុក និងដូចជាភ្លៀងរលឹមចំពោះបញ្ហាគ្រឿងញៀន។
ជាលទ្ធផលនៅវេលាម៉ោង៤ និង៣០នាទីរសៀើ ថ្ងៃទី៣០ មីនា ២០១៥ កម្លាំងនគរបាលការិយាល័យប្រឆាំងគ្រឿងញៀនដឹកនាំដោយលោកវរសេនីយ៍ទោធិន ស៊ីនដេត នាយការិយាល័យប្រឆាំងគ្រឿងញៀន បានសហការជាមួយកម្លាំងនគរបាលនៃអធិការដ្ឋាននគរបាលក្រុងសិរីសោភ័ណ ចុះប្រតិបត្តិការបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀនមួយកន្លែងនៅចំណុចផ្ទះសំណាក់ថ្មពេជ្រ ស្ថិតក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដោយមានកិច្ចសហការជាមួយម្ចាស់ផ្ទះសំណាក់ផងនោះ ទើបសមត្ថកិច្ចឈានដល់ចាប់ឃាត់ខ្លួនជនសង្ស័យជួញដូរ និងប្រើប្រាស់គ្រឿងញៀនបានចំនួន១៧នាក់ ជាបន្តបន្ទាប់ និងវត្ថុតាងមួយចំនួនមកកាន់ស្នងការដ្ឋាននគរបាលខេត្ត ដើម្បីរៀបចំសំណុំរឿងតាមនិតិវិធីច្បាប់៕
ចែករំលែកព័តមាននេះ