រាជធានីភ្នំពេញ ៖ លោក ប៉ែន សមិទ្ធិ និពន្ធនាយកនៃកាសែតរស្មីកម្ពុជា និងជាប្រធាននៃគេហទំព័រ cen.com.kh (Cambodia Express News) ព្រមទាំងជាប្រធានក្លិបអ្នកកាសែតកម្ពុជា (ក.អ.ក) បានទទួលមរណភាព ក្នុងជន្មាយុ៥៤ឆ្នាំ កាលពីវេលាម៉ោង៦និង១០នាទីព្រឹក ថ្ងៃទី៣០ មីនា ដោយរោគាពាធ ។
លោក ប៉ែន សមិទ្ធិ គឺជាអ្នកសារព័ត៌មានកម្ពុជា ដ៏មានស្នាដៃលេចធ្លោបំផុតមួយរូប ហើយលោកបានចូលរួមចំណែកយ៉ាងសំខាន់ក្នុងការធ្វើឲ្យរីកចម្រើនលើវិស័យសារព័ត៌មាននៅក្នុងប្រទេសកម្ពុជា ។ អ្នកសារព័ត៌មានជាតិ និងអន្តរជាតិទាំងអស់ តែងតែស្គាល់និងគោរពរូបលោក ដោយសារតែរូបលោកជាអ្នកសារព័ត៌មាន និងជាមេដឹកនាំប្រកបដោយសមត្ថភាពនិងចំណេះដឹងខ្ពង់ខ្ពស់ ហើយបានចូលរួមសកម្មភាពជាច្រើន ដើម្បីផលប្រយោជន៍អ្នកកាសែត និងសង្គមទាំងមូល ។
លោកបានប្រើពេលវេលាពេញមួយជីវិត ដើម្បីការអភិឌ្ឍក្នុងវិស័យសារព័ត៌មាន ។ អ្នកកាសែតគ្រប់រូប ចាត់ទុកមរណភាពរបស់លោក ប៉ែន សមិទ្ធិ គឺជាការបាត់បង់ដ៏ធំធេងនៃវិស័យព័ត៌មាននៅកម្ពុជា និងមេដឹកនាំប្រកបដោយ សមត្ថភាព ការទទួលខុសត្រូវ និងព្រហ្មវិហារធម៌មួយរូប ។
លោក ប៉ែន សមិទ្ធិ កើតនៅថ្ងៃទី១៦ តុលា ឆ្នាំ១៩៦១ នៅភូមិកំពង់ចាម ឃុំកំពង់ចាម ស្រុកកំពង់សៀម ខេត្តកំពង់ចាម ក្នុងគ្រួសារកសិករមួយ ដែលមានប្រវត្តិជាអ្នកសិក្សារៀនសូត្រ។ កាលពីកុមារភាព លោក ប៉ែន សមិទ្ធិ បានសិក្សានៅសាលាបឋមសិក្សាវត្តដីដុះ ក្នុងស្រុកកំពង់សៀម ខេត្តកំពង់ចាម បន្ទាប់មកលោកសិក្សានៅវិទ្យាល័យឥន្ទ្រទេវី ក្នុងខណ្ឌទួលគោក រាជធានីភ្នំពេញ រហូតដល់ឆ្នាំ១៩៧៥ ។ លោកត្រូវបានចាត់ទុកជាសិស្សឆ្នើមនៅក្នុងថ្នាក់រៀន ។
ក្នុងរបបប៉ុលពត (១៩៧៥-១៩៧៩) លោករស់នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង ។ ក្រោយរបបប៉ុលពត ពីឆ្នាំ១៩៧៩-១៩៨០ លោកបានសាងផ្នួសជាសាមណេរ នៅវត្តបាភ្នំ ស្ថិតនៅក្នុងស្រុកបាភ្នំ ខេត្តព្រៃវែង ។ ចំពោះការសិក្សាជាន់ខ្ពស់វិញ លោកបានទទួលការសិក្សាជាន់ខ្ពស់ជាច្រើនដូចជា ៖
-ទទួលសញ្ញាបត្រស្រាវជ្រាវវប្បធម៌ខ្មែរ រាជធានីភ្នំពេញ (១៩៨០-១៩៨១) ។
-ទទួលសញ្ញាបត្រជាន់ខ្ពស់ផ្នែកវិទ្យាសាស្ត្រនយោបាយ នៅវិទ្យាស្ថានង្វៀនអាយគួក ទី៧ នៃប្រទេសវៀតណាម (១៩៨៤-១៩៨៦) ។
-ទទួលបរិញ្ញាបត្រផ្នែកសារព័ត៌មាននៅអតីតសហភាពសូវៀត នាឆ្នាំ១៩៨៧ ។
ចំពោះបទពិសោធន៍ការងារ ៖ លោក ប៉ែន សមិទ្ធិ ត្រូវបានចាត់ទុកថាជាអ្នកសារព័ត៌មានវិជ្ជាជីវ: មានសមត្ថភាពខ្ពស់ និងបានចូលរួមចំណែកយ៉ាងធំធេងបំផុតធ្វើឲ្យវិស័យសារព័ត៌មាននៅប្រទេសកម្ពុជា មានការរីកចម្រើន។ នៅខែមេសា ឆ្នាំ១៩៩៣ រហូតដល់បច្ចុប្បន្ន លោកជាស្ថាបនិក និងជានិពន្ធនាយកកាសែតរស្មីកម្ពុជា ។ ខែកក្កដា ឆ្នាំ២០០៨ រហូតមកដល់បច្ចុប្បន្ន លោកជាអគ្គនាយកនៃគេហទំព័រ cen.com.kh (Cambodia Express News)។ ខែកញ្ញា ឆ្នាំ២០០៨ រហូតដល់ឥឡូវ សាស្ដ្រាចារ្យ នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍នៃសាកលវិទ្យាល័យភូមិន្ទភ្នំពេញ ។ ពីឆ្នាំ១៩៨៦-១៩៩៣ លោកជានិពន្ធនាយកកាសែតភ្នំពេញ ។ ពីឆ្នាំ១៩៨១-១៩៨៦ លោកជាអ្នកយកព័ត៌មាន និងក្រោយមកជាអ្នកនិពន្ធនៅកាសែតភ្នំពេញ ។ ពីឆ្នាំ១៩៧៩-១៩៨១ លោកជាបុគ្គលិកមន្ទីរឃោសនាការ និងព័ត៌មានរាជធានីភ្នំពេញ ។
សកម្មភាពសង្គម ៖ ខែសីហា ឆ្នាំ២០០០ រហូតមកដល់បច្ចុប្បន្ន លោកជាស្ថាបនិកមួយរូបនិងធ្វើជាប្រធានក្លិបអ្នកកាសែតកម្ពុជា (CCJ) ។ ក្លិបអ្នកកាសែតកម្ពុជា ក្រោមការដឹកនាំរបស់លោក បានក្លាយជាសមាគមអ្នកសារព័ត៌មានមួយ ដែលបានបំពេញការងារយ៉ាងសកម្មក្នុងការបម្រើផលប្រយោជន៍អ្នកសារព័ត៌មានទាំងអស់នៅក្នុងប្រទេសកម្ពុជា ។
ដោយឡែក ពាក់ព័ន្ធនឹងមរណភាពលោក ប៉ែន សមិទ្ធិ នេះដែរ លោក ឆាយ សុផល ប្រធានស្តីទីរដ្ឋបាលក្លិបអ្នកកាសែតកម្ពុជា និងក្នុងនាមជាអ្នកសារព័ត៌មានមួយរូប និងធ្លាប់ជាសហការីរបស់លោក ប៉ែន សមិទ្ធិ ជាង១៥ឆ្នាំមកនេះ ក៏បានសម្តែងការសោកស្តាយយ៉ាងខ្លាំងផងដែរ ។
លោក ឆាយ សុផល បានសសេរសារនៅក្នុងគណនេយ្យហ្វេសប៊ុករបស់លោកថា «ខ្ញុំពិតជាមានការសោកស្តាយជាពន់ពេក ចំពោះការបាត់បង់រូបលោក ដែលជាការបាត់បង់ធនធានមនុស្សដ៏សំខាន់នៅក្នុងវិស័យព័ត៌មាននៅកម្ពុជា ។ លោក ប៉ែន សមិទ្ធិ មិនត្រឹមតែជាអ្នកសារព័ត៌មានអាជីពដ៏ពូកែប៉ុណ្ណោះទេ ប៉ុន្តែលោកជាអ្នកសម្របសម្រួលដ៏ចំណាននៅក្នុងវិស័យសារព័ត៌មាន និងសង្គម ។ លោកជាមនុស្សរួសរាយ ជួយលើកស្ទួយសិទ្ធិសេរីភាពអ្នកសារព័ត៌មានគ្រប់រូប ទោះជាអ្នកសារព័ត៌មាននោះមាននិន្នាការនយោបាយខាងណាក៏ដោយ លោកតែងតែជួយការពារអ្នកកាសែតពីការរំលោភបំពាននានា ជួយកសាងសមត្ថភាពអ្នកសារព័ត៌មាន និងកសាងទំនាក់ទំនងរវាងអ្នកសារព័ត៌មានជាតិ ជាមួយអ្នកសារព័ត៌មានអន្តរជាតិ» ។
ក្លិបអ្នកកាសែតកម្ពុជា ក៏បានសារលិខិតចូលរួមរំលែកទុក្ខជាមួយក្រុមគ្រួសាររបស់លោក ប៉ែន សមិទ្ធិ ផងដែរ ក្នុងនោះ ក.អ.ក ចាត់ទុកមរណភាពរបស់លោក ប៉ែន សមិទ្ធិ គឺជាការបាត់បង់មេដឹកនាំ ប្រកបដោយការទទួលខុសត្រូវ និងព្រហ្មវិហារធម៌មួយរួប សម្រាប់វិស័យសារព័ត៌មាននៅកម្ពុជា ។ ក.អ.ក ក៏សូមអំពាវនាវដល់សមាជិកសមាជិកា ក.អ.ក រួមទាំងអ្នកសារព័ត៌មានទាំងអស់ ចូលរួមក្នុងពិធីបុណ្យសពលោក ប៉ែន សមិទ្ធិ ដែលប្រារព្ធធ្វើ នៅគេហដ្ឋាន ផ្ទះលេខ១ ផ្លូវ១៤៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
ចំណែកសារព័ត៌មាន «កោះសន្តិភាព» លោកឧកញ៉ា ថុង អ៊ុយប៉ាង ជាស្ថាបនិក រួមជាមួយលោក ប៉ុល សារឿន ជានិពន្ធនាយក ក្នុងនាមកោះសន្តិភាព លោកថ្លែងថា សូមសម្តែងនូវក្តីវិយោគក្តុកក្តួល និងសោកស្តាយក្រៃលែងចំពោះមរណភាពនេះ ។ ការបាត់បង់លោក ប៉ែន សមិទ្ធិ គឺជាការបាត់បង់ធនធានមនុស្សមួយដ៏កម្ររកបាន ខាងវិស័យសារព័ត៌មាន ។ ក្នុងជីវិតរស់នៅខាងសារព័ត៌មាន លោក ប៉ែន សមិទ្ធិ ជាកុលបុត្រខ្មែរមួយរូប បានរួមចំណែកធំធេងណាស់ ជួយដល់សង្គមជាតិ ដែលជាគុណបំណាច់ដ៏ឧត្តុង្គឧត្តមមិនអាចបំភ្លេចបាន ។
ក្នុងនាម សហការីកោះសន្តិភាពទាំងអស់ សូមចូលរួមរំលែកទុក្ខដ៏ក្រៀមក្រំនេះជាមួយគ្រួសារនៃសព ៕
ចែករំលែកព័តមាននេះ