យោងតាមប្រភពព័ត៌មានសន្តិសុខថា យុទ្ធជនក្រុមរដ្ឋអ៊ិស្លាមយ៉ាងតិច៣០នាក់ត្រូវស្លាប់កាលពីថ្ងៃទី២៩ មីនា ក្នុងការប្រយុទ្ធគ្នានានា និងក្នុងការវាយប្រហារតាមអាកាសរបស់ក្រុមចម្រុះនាំមុខដោយសហរដ្ឋអាមេរិកក្នុងខេត្តសាឡា ហ៊ីដឌីន និងខេត្តអានបាអីុរ៉ាក់ ។
គាំទ្រដោយបណ្តាយន្តហោះចម្បាំងរបស់ក្រុមចម្រុះ និងកងយន្តហោះអីុរ៉ាក់កងកម្លាំងសន្តិសុខអីុរ៉ាក់បានបន្តប្រតិបត្តិការយោធានៅខេត្តសាឡាហ៊ីដឌីន ប៉ុនប៉ងដណ្តើមយកទីក្រុងទីគ្រីត ទីប្រជុំជនខេត្តនេះពីពួករដ្ឋអ៊ិស្លាមវិញ ហើយសម្រេចបានការរុលទៅមុខខ្លះក្នុងស្រុក២ស្ថិតនៅភាគខាងត្បូង និងភាគខាងលិចខេត្ត ។
ការប៉ះទង្គិចគ្នា និងការបាញ់ផ្លោងយ៉ាងខ្លាំងក្លាដាក់ទីតាំងពួករដ្ឋអ៊ិស្លាមនៅតែបន្តនៅជុំវិញក្រុងទីគ្រីត ស្ថិតនៅចម្ងាយប្រមាណជា១៧០គីឡូម៉ែត្រខាងជើងក្រុងបាដាដ ។
យោងតាមសេចក្តីប្រកាសរបស់ក្រសួងការពារប្រទេសអីុរ៉ាក់ថា សរុបយុទ្ធជនក្រុមរដ្ឋអ៊ិស្លាម២៦នាក់ត្រូវកងកម្លាំងសន្តិសុខសម្លាប់ក្នុងការប៉ះទង្គិចគ្នានានា ។
កាលពីយប់ថ្ងៃទី២៥ មីនា កន្លងមកនេះ នាយករដ្ឋមន្ត្រីអីុរ៉ាក់លោកហៃអីុឌ័រ អាល់អាបាឌី ប្រកាសថា កងកម្លាំងអីុរ៉ាក់ចាប់ផ្តើមដំណាក់កាលចុងក្រោយនៃប្រតិបត្តិការដើម្បីរំដោះទីក្រុងទីគ្រីត និងបណ្តាផ្នែកខាងជើងនៃខេត្តសាឡា ហ៊ីដឌីន ជាមួយការជួយទ្រទ្រង់តាមអាកាសរបស់ក្រុមចម្រុះអន្តរជាតិនាំមុខដោយអាមេរិក ។
ការវាយប្រហាររបស់កងទ័ពអុីរ៉ាក់ដើម្បីរំដោះទីក្រុងទីគ្រីតបានអូសបន្លាយពេលចាប់តាំងពីជិត២សប្តាហ៍មកហើយ ដោយសារពួករដ្ឋអ៊ិស្លាមបានរាយគ្រាប់បែក និងគ្រឿងផ្ទុះជាច្រើនពាន់គ្រាប់នៅតាមអគារ និងរថយន្តទាំងឡាយក្នុងទីក្រុង ។
ចាប់តាំងពីថ្ងៃទី២ មីនា មក ទាហានអុីរ៉ាក់ប្រមាណជា៣០.០០០នាក់ និងពួកជីវពលសម្ព័ន្ធមិត្តជាច្រើនពាន់នាក់បានចូលរួមក្នុងការវាយលុកដ៏ធំមួយនៅអីុរ៉ាក់ប៉ុនប៉ងដណ្តើមយកទីក្រុងទីគ្រីតពីពួករដ្ឋអ៊ិស្លាមវិញ ។
នៅខេត្តអានបា ក្រុមចម្រុះបានវាយប្រហារតាមអាកាសប្រឆាំងបណ្តាទីតាំងពួករដ្ឋអ៊ិស្លាមនៅភាគខាងកើតទីប្រជុំជនខេត្ត គឺក្រុងរ៉ាម៉ាឌី ដោយកម្ទេចរថយន្ត១គ្រឿងជាមួយបណ្តាសមាជិកក្រុមនេះជិះក្នុងរថយន្តនោះ ។
ចំណែកឯអគ្គលេខាធិការ អ.ស.ប លោកបាន គីមូន បានមកដល់ក្រុងបាដាដ កាលពីថ្ងៃទី៣០ មីនា ដើម្បីជួបជាមួយបណ្តាមេដឹកនាំអីុរ៉ាក់ ក្នុងនោះមាននាយករដ្ឋមន្ត្រីផង ។
ទស្សនកិច្ចនេះរបស់លោកធ្វើឡើងពេលអីុរ៉ាក់ប៉ុនប៉ងវាយរុញច្រានពិសេសជាមួយការវាយលុកលើទីក្រុងទីគ្រីតនូវពួកជីហាដក្រុមរដ្ឋអ៊ិស្លាម ដែលដណ្តើមកាន់កាប់ផ្នែកមួយយ៉ាងធំនៃប្រទេសនោះ ៕
ចែករំលែកព័តមាននេះ