ខេត្តបាត់ដំបង ៖ ព្រះវិហារដ៏ចំណាស់ដែលមានអាយុកាលជាង៣០០នៅក្នុងវត្តសំរោងក្នុង ស្ថិតនៅភូមិសំរោងក្នុង ឃុំសំរោងក្នុង ស្រុកឯកភ្នំ ខេត្តបាត់ដំបង ទំនងអាចនឹងត្រូវរៀបចំឲ្យមានការអភិរក្សទុកជាសម្បត្តិវប្បធ៌ ឬជាសម្បត្តិបេតិកភ័ណ្ឌជាតិ ដើម្បីទាក់ទាញភ្ញៀវទេសចរចូលទស្សនា និងធ្វើការស្រាវជ្រាវ ។ នេះបើយោងតាមប្រសាសន៍លោកស ខេង នាយករដ្ធមន្ត្រីស្ដីទី រដ្ធមន្ត្រីក្រសួងមហាផ្ទៃ។
ក្នុងនាមជានាយករដ្ធមន្ត្រីស្ដីទី លោកស ខេង បានមានប្រសាសន៏បែបនេះជាសាធារណៈនៅចំពោះមុខមន្ត្រីនានា ព្រះសង្ឃ តាជីដូនជី ប្រជាពលរដ្ធ និងសិស្សានុសិស្សប្រមាណជិត២.០០០នាក់ ក្នុងគ្រាដែលលោកបានអញ្ជើញជាគណៈអធិបតីក្នុងពីធីកាត់ឬសសីមាព្រះវិហារថ្មី នៅក្នុងវត្តសំរោងក្នុងខាងលើនេះ កាលពីព្រឹកថ្ងៃទី២៩ មីនា ២០១៥។
លោកនាយករដ្ធមន្ត្រីស្ដីទីបានមានប្រសាសន៍ថា តាមព័ត៌មានដែលលោកទទូលបាន គឺខាងក្រសួងវប្បធម៌ និងវិចិត្រសិល្បៈមានគម្រោងចង់អភិរក្សនូវ«ព្រះវិហារចាស់»ដែលមានអាយុកាលរាប់រយឆ្នាំនៅក្នុងវត្តសំរោងក្នុងនេះទុកជាសម្បត្តិវប្បធម៌ជាតិ ឬជាសម្បត្តិបេតិកភ័ណ្ឌជាតិ។ ប៉ុន្តែលោកព្រួយបារម្ភអំពីគុណភាពសំណង់ ក្រែងមិនអាចនៅគង់វង្ស បើមិនបានថែទាំ ឬមិនបានជួសជុលឡើងវិញនៅផ្នែកខ្លះ។
តាមប្រវត្តិសង្ខេបនៅក្នុងសន្ទរកថារបស់លោកមៀច សុមន៏ អភិបាលស្រុកឯកភ្នំ បានឲ្យដឹងថា វត្តសំរោងក្នុងនេះគឺមានវ័យចំណាសជាងគេ បើប្រៀបធៀបទៅនឹងវត្តនានានៅក្នុងខេត្តបាត់ដំបង មានផ្ទៃដីទំហំ២៩,៩៣៧ម៉ែត្រក្រឡា ដែលត្រូវបានកសាងក្នុងអំឡុងពុទ្ធសករាជ២២៥០ និងគ្រឹស្ដសករាជ១៧០៧។
ក្នុងសម័យនោះទីតាំងវត្តនេះ ជាទីស្មសានប្រកបដោយព្រៃឈើធំៗ ក្នុងនោះមានដើមសំរោងដ៏ធំ១ដើមទំហំមុខកាត់២ម៉ែត្រ។ ដូច្នេះហើយទើបក្រោយពេលសាងសង់វត្តនេះរួច បុព្វដូនតាខ្មែរក្នុងសម័យនោះបានដាក់ឈ្មោះវត្តនេះថា ជា«វត្តសំរោងក្នុង»រហូតមានឈ្មោះបោះសំឡេងដល់បច្ចុប្បន្ននេះ៕
ចែករំលែកព័តមាននេះ