ខេត្តកំពត ៖ ចម្ការម្រេចមួយកន្លែងត្រូវបានអគ្គិភ័យឆាបឆេះអស់គ្មានសល់ បន្ទាប់ពីបុរសចំណាស់ម្នាក់មានចម្ការម្រេចក្បែរគ្នានោះដែរ បានយកភ្លើងទៅដុតព្រៃ ក៏បណ្តាលឱ្យឆាបឆេះចម្ការគេអស់៧៥០ជន្លង់ ដែលហេតុការណ៍នេះកើតឡើងកាលពីវេលាម៉ោង០៥ល្ងាចថ្ងៃទី២៦ មីនា ២០១៥ ស្ថិតនៅចំណុចភូមិអង្គរជ័យ ឃុំដំណាក់កន្ទួតខាងត្បូងស្រុកកំពង់ត្រាច ។
ប្រភពបានឱ្យដឹងថា បុរសដែលបង្កឱ្យមានអគ្គិភ័យដោយអចេតនានេះឈ្មោះប៊ុន សាមឿន អាយុ៦៤ឆ្នាំ មានទីលំនៅក្នុងភូមិ-កើតហេតុខាងលើ ហើយត្រូវបានគាំងបេះដូងសន្លប់ បន្ទាប់ពីមានការភិតភ័យពេក ។ ចំណែកម្ចាស់ចម្ការម្រេចរងគ្រោះឈ្មោះញ៉ែម ឌី អាយុ៤៦ឆ្នាំ និងប្រពន្ធឈ្មោះហង្ស ភាព អាយុ៤៥ឆ្នាំ មានទីលំនៅក្នុងភូមិកើតហេតុខាងលើនោះដែរ ។
ប្រភពពីម្ចាស់ចម្ការរងគ្រោះបានឱ្យដឹងថា ចម្ការម្រេចរបស់គាត់ត្រូវរងខូចខាតទាំងស្រុងដែលមានចំនួន៧៥០ជន្លង់ ទើបតែដាំបានរយៈពេល២ឆ្នាំប៉ុណ្ណោះ តែទោះជាមិនទាន់បានផលពេញក៏ដោយ ក៏គាត់បានចំណាយទុនអស់រាប់ម៉ឺនដុល្លារដែរ ។ គាត់មិនទាន់បានដាក់ពាក្យបណ្តឹងទៅអាជ្ញាធរទេ ដោយនៅថ្ងៃទី២៧ មីនា អ្នកបង្កបានសុំជួបគ្នា ដើម្បីធ្វើការចរចា ប៉ុន្តែត្រូវរូបគាត់ទាមទារឱ្យជួយសងថ្លៃខាតបង់ ជម្រើស១-ត្រូវសងថ្លៃខាតបង់ម្រេចមួយគុម្ព ១០០ដុល្លារ និងជម្រើស២-ត្រូវដោះដូរម្រេចគ្នា ព្រោះម្រេចរបស់អ្នកបង្កគឺ នៅជាប់ចម្ការគាត់តែម្តង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ