រញ្ជួយដីនៅប៉ាពូអាស៊ីនូវែលហ្គីណេនិងចិន
ការរញ្ជួយដីខ្លាំងមួយកម្រិតដល់៧,៥រីស្ទ័រ កើតមានកាលពីថ្ងៃទី៣០ មីនា ក្នុងដែនទឹកនៃឆ្នេរសមុទ្រប៉ាពូអាស៊ីនូវែលហ្គីណេ បណ្តាលឱ្យមានការភ័យខ្លាចរលកយក្សដីគ្រោះថ្នាក់មុនពេល
ការរញ្ជួយដីខ្លាំងមួយកម្រិតដល់៧,៥រីស្ទ័រ កើតមានកាលពីថ្ងៃទី៣០ មីនា ក្នុងដែនទឹកនៃឆ្នេរសមុទ្រប៉ាពូអាស៊ីនូវែលហ្គីណេ បណ្តាលឱ្យមានការភ័យខ្លាចរលកយក្សដីគ្រោះថ្នាក់មុនពេលលុបចោលការប្រកាសអាសន្នស៊ូណាមីវិញ ។
ចំណុចកណ្តាលនៃការរញ្ជួយដីនោះ ស្ថិតនៅជម្រៅ៣៣គ.ម និងចម្ងាយ៥៥គ.មពីទីក្រុង កូកូប៉ូ លើកោះ NOUVELLE BRETAGNE និងចម្ងាយ៧៨៧គ.មពីរដ្ឋធានី PORT MORESBY ។
វិទ្យាស្ថានភូគម្ភសាស្ត្រអាមេរិក USGS រាយការណ៍ពីការរញ្ជួយដីនោះ រួចមជ្ឈមណ្ឌលប្រកាសអាសន្នស៊ូណាមីនៅប៉ាស៊ីហ្វិក បានចេញការព្រមានពីរលកយក្សស៊ូណាមីដ៏គ្រោះថ្នាក់ ដែលអាចកើតមាននៅតាមតំបន់ឆ្នេរសមុទ្រស្ថិតក្នុងរង្វង់ ១០០០ គ.ម ជុំវិញចំណុចកណ្តាលនៃការរញ្ជួយដីនោះ ។ ក៏ប៉ុន្តែ ការគំរាមកំហែងស៊ូណាមីបានកន្លងផុតដោយពុំមានការខូចខាតគួរឱ្យកត់សម្គាល់ណាមួយឡើយ ។
នៅក្រុងកូកូប៉ូ ស្ថិតនៅជិតចំណុចកណ្តាលនៃការរញ្ជួយដីប្រជាជនក្រុងនេះប្រមាណជា២០.០០០នាក់មានការភ័យខ្លាច ។ មានការញ័ររង្គើរខ្លាំងធ្វើឱ្យរបស់របរនានាជ្រុះធ្លាក់រួចមនុស្សម្នានាំគ្នារត់ចេញមកខាងក្រៅ ។
ចំណែកនៅប្រទេសចិនវិញមានការរញ្ជួយដីកម្លាំង៥,៥រិស្ទ័រមួយ កាលពីថ្ងៃទី៣០ មីនា ដែរ នៅស្រុក JIANHE ខេត្ត GUIZHOU ភាគនិរតីប្រទេស ។
យោងតាមមជ្ឈមណ្ឌលប្រព័ន្ធរញ្ជួយដីចិនថា ការរញ្ជួយដីនេះកើតមាននាវេលាម៉ោង៩និង១៧នាទី ម៉ោងក្នុងស្រុក ក្នុងជម្រៅ៧គ.ម ។ ពុំមានការបាត់បង់ជីវិតមនុស្ស ឬខូចខាតសម្ភារត្រូវបានរាយការណ៍ឡើយ ៕
ចែករំលែកព័តមាននេះ